The Second Coming (Tua Nihvei Paina)

The Second Coming (Tua Nihvei Paina) – James 5: 7 – 12

Kammal “Second Coming” cih Lai Siangtho sungah om lian lo. Khrih ong paikik ding “Return” Cih kammal bel 318 vei LStho sungah kimu hi. Apocrypha cih laibu dangte RC te in zang uh a tuate sungah a genna ah Jesuh in van a kah ding ciangin a khutmee nih lak ci-in kigen hi. Pawlkhatte in hih pen AD kum 2000 a cin ciang hi ding hi, ci-in genkholhna nei pah uh hi. Pawl khat in a nihveina hong pai kik ding a cihna hi ci-in gen uh hi. Bangbang in ih gen zongin Lai Siangtho pualam thu kigen peuh mah upna zuih nadingin a kizat ciangin a tamzaw upkhialhna, muanlahna, sankhialhna, pomkhialhna, paikhialhna le siatna piang thei zelzel zaw hi, cih kimu thei hi. Jesuh ong paikik ding theihnopna bek hi loi a nai, a ni, a kha, a kum theihnopna ah kinialna, upkhialhna piang thei hi. Topa in mailam thu ding theih kholhnopna deih lo hi. Lai Siangtho sungah upmawh loh lai tak, tha khat thu in cih bangin gen zaw hi. Hih in Christian te ih kigin den ding deihna ahi hi. Zing ciangin hingtang vankah ding bangin kigen gawpna le Topa ong paikik ta ding ahih manin ut bangbangin om gawp, kineih khem gawp mawk lehang kiginna maan ahi ding hiam? A si nawn lo dingin kingaihsun a, Topa aw ong pai mengmeng in ci-in thungetna pen kiginna maan ahi ding hiam? Topa aw, kei ka hih leh mawhnei mi ka hi hi. Ka sih ding pen maan takpi in ka thei hi. Ahi zongin bang hunin si ding cih kithei lo ka hih manin, sih nuam in ong si sak in ci-in thungen zaw lehang tua pen kiginna maan hi zaw kha ding hi.

Heb 9: 28na ah Jesuh ong pai masakna le ong paikik nading thu tawh kisai genkakna nei hi. Amasa pen mawhna tawh kisai in Jesuh ong pai a, mi bangin ong pianna (incarnation), sal bangin kiniam koihna (servanthood), mawhlawh tawi-in a thuakna (bore our sin in the place of us), Singlamteh tungah sihna (died on the Cross for our redemption) cihte ong thuakin ong sem khin hi. Hong paikik ciangin a phuhsa Hotkhiatna (Salvation) tungtawnin amah tawh a mangkhawm dingin thu-ummite ong la ding hi. Jesuh ong pai kik ding tawh kisai in, Lai Siangtho sungah a khatveina, a nih veina, a thumveina cih bangin gen lo hi. Pawlkhatte a thumveina tawh buai thei ding ahih manin, Lai Siangtho sungah a nihveina (the Second Coming) ci-inkigelh lo hi. Ong paikik ding (will return) cih bang bekin gelh hi. Ahi zongin Jesuh ong paikik leh a nihveina hi ding ahih manin, a nihvei ong paikikna (the Second Coming) ci-in a kizang lel ahihna zong theih huai hi. Tua ahih manin a thumveina ding tawh buai lo ding hi hang. A kisam lo thudotna sangin a kisam thudotna kimangngilh pahpah thei hi. Buai loh dingteng tawh kibuai kha pahpah thei a, buaipih dingteng kibuai pih ngam lo zawsop thei hi.

Hih Jesuh Khrih ong paikik nading thu-upna (doctrine) pen Christiante thuak zawhna tha ong guan doctrine ahi hi. Tua ahih manin ei Christian te pen kiciam sese kul loin thuak zawhna tawh Topa’ zia a ngak dingte hi hang. Topa in ong paikik ciangin thukhempeuh ong khen ding hi. Ngak lah kei ni. Tha khat thu bangin ong tung ziau lel ding hi. Ahite hi, ahi lote hi lo, cihna tawh man sak ding hi hang. James 5: 12. Kiciam sese kul lo hi. Ih kiciam ciangin thumaan lo ahih lam kilang zaw hi. Kiciamna kul lo a, hong ki-um hong kimuang ih hih ding pen tuhun nunnung Christian te adingin hong manpha semsem ding hi. Hong bawlsiate tungah Topa aw thu hong khen sak mengmeng in ci-in thu ngen lehang Topa’ ong paikik ding ih ngakna bang phattuamna om ding hiam? Lai Siangtho sungah thuakzawhna tawh na ngak un ci hi. Eimau ut bangbangin gamta in, eimau ut bangbangin Topa sawlna pen Topa ong paikik ding thu hawmthawhna suak zaw kha ding hi.

Mangmuhna 20na ah kum 1000 tawh kisai in Christian Pawlpi sungah saanzia (view) thum om hi. Khatna pen Post-Millennialism kici hi. This view holds that the return of Christ will follow a thousand years period. Kum tulkhat maanna khit ciangin Jesuh ong paikik pan ding ci hi. Nihna pen Pre-Millennialism kici hi. This view holds that the return of Christ will come before the thousand year’s period. Kum tulkhat maanna ma-in Jesuh ong pai ding hi, ci uh hi. Thumna pen A-Millennialism kici hi. This view does not interpret the thousand years of Revelation 20 literally, but states that the millennium describes an undefined period of time. Usually this view holds that the return of Christ (the Second Coming) will take place after this (the now) period of time. Hih a thumna saanzia in ahih leh Mangmuhna 20na ah kum tulkhat pen a kicingsak numbat (perfect number) ci-in mu uh a, Khrih ong paikik ding pen a ni, a nai, a kum, a kha, tua ma (before), tua khit (after) cih bangin ciangtan hun nei sak lo uh hi. Topa Jesuh ong paikik ding pen hih hun nunung (tulaitak hun) bei nading hi ding hi ci-in sang uh hi.

Khrih ong paikik ding thu tawh kisai kinial huai lo hi. Hih bangin saanzia muhzia (view) thum bang a om hangin, Jesuh Khrih ong paikik ding ahihna (the return of Christ) le Christian te kigin ding a thupitna (readiness) thupomzia ah kithukim uh hi. Muhna saanna view a kibat loh hangin Lai Siangtho doctrine pi ahi, Jesuh Khrin ong paikik nading le thu-ummite ih kiginkholh den ding thupom ah kithu hual hi. Tua ahih manin hih bang nengneng muhna (view) te tawh Pawlpi sungah kikhenna a pian ding kisam lo a, ahi zongin Jesuh Khrih ong paikik ding le Christiante in lametna tawh ih ngak ding a kisapna thu kihilhna (the doctrine of the lasting) thu a nial mite tawh ih kipawl loh ding kisam hi. Ih upna pen muhna (view) tawh tuam lo ding hi hang. Laphuak siam pa in Topa ong pai hun ding (point of view) ka theih loh hangin, ka Uppa (the doctrine of the Son) ka thei hi na ci hi. Tua ahih manin Lai Siangtho doctrine tawh kituam lo upna neih huai lo hi. Ih upna doctrine tawh tuam sitset ni. The doctrine of the Trinity, the doctrine of Salvation, the doctrine of the church, the doctrine of the lasting, etc. Topa ong paikik nawn lo ding hi leh lungdamna thu gen kul nawn lo ding hi. Lungdamna thu gen loin, Mission khah loin ut bangbangin om lehang Topa ong paikik ding lametna lianpi tawh a ngak Pawlpi hi lo cihna hi a, a ihmu pawlpi bek hi loin a si pawlpi ih hih khak ding ki-et phat huai mahmah ding hi.

Philippines gam Manila Khua pi ah Pastoral Diploma kum 4 ka va kah lai in, ka sang Syapi pa un, Khrih zing ciang tu bang hun in ong pai ding hi leh tuni in ih nasep ciat citak takin ih sep kul veve hi, ong ci suangdalhi. “Supposing Christ will come tomorrow at this time, we still have our class today, is the right readiness” ci-in ong hilh ngei hi. Maan ka sa mahmah hi. Si nawn lo ding, hingtangin van kah ding, Jesuh ong pai baih ding ahih leh na sem nawn lo ding ci-in ut bangbangin omin gamta lehang kiginna maan (right readiness) ahi ding hiam? Jesuh in zong a mihing hihna tawh leitungah a om lai in a theih loh thu hi a, banghangin eite in kigin sawm loin ong paikik ding a ni, a nai thei nuam mawk ih hi hiam? Theih kholhna ah kiginna maan le cihtakna om thei ding ahi hiam?

Topa in a thei khol ding sangin a kiging dingin ong deih zaw hi. Kiginna ah upna le lametna maan om thei bek hi. Jesuh Khrih ong pai kik ding hi. Jesuh Khrih ong paikik mateng leitung hun bei ngei lo ding hi. Topa ong paikik mateng leitung thu bei nai lo ding hi. Kawlte’ naalee-muh zong bei lo ding hi. Jesuh ong paikik mateng, thulamdang nalamdang, gitlohna, siatna, galkidona, khua hun hoih lohna, kithahna, zawnna cihte omom dinga leitung’ hun, leitung thu bei lo ding hi. Khrih ong pai kik ciangin bei pan ding hi. Ka theih kholh thu kician mahmah khat om a, Topa ong pai kik ding hi. Ka thei loh thu pen ka sih khit hi zaw diam? Ka nuntak lai hi zaw diam? Kei in bangmah thei keng. Kuamah in a ni le a nai thei kei. A thei bangin a gen khol a om leh, kamsang zuauthei hi pah ding hi, ci-in ka thei hi. Tua bang mite’ nung ka zui ngei kei ding, na ci thei nai hiam? Topa in a ni a nai tawh theih kholh ding sangin nisim nai sim-in a kiging den dingin ong deih zaw hi.

Evan. Suang dal