Thawhkiknate
(Resurrections)
Mi khempeuh a hun kibangin kithokiksak ding hi, ci-a Laisiangtho tawh kituak het lo ngaihsutna khat in Laisiangtho sunga genkholhnate a kikhiatna ah lungmanna tampi piangsak hi. Hih banga ngaihsutna ah thawhkikna tawh kisai Laisiangtho sunga genkholhna tampite hoihtakin kingaihsun kha lo, cih bel kilang mahmah hi. Laisiangtho in hong hilhna ah bel, thawhkikna khat bek om lo-in thawhkikna limlim sagih bang om zawsop a, pawlkhatte a beisa huna piang khin hi-in, pawlkhatte kum tul khat sung Khazih a maan ma leh a maan khit cih bangin hun sawtpipi in hal zawlai hi. Mi khempeuh amau’ hun ciat leh amau’ mun ciat ah thokik ding hi, ci-in Laisiangtho in hong hilh a, mihingte’ nuntakna tawntungin kizom paisuak ding hi, ci-in hong hilh hi. Thawhkikna thu i sinna ah genkholhnate leh mihingte’ upna leh ma-etnate a kizop ziate kimu thei ding hi.
A. Zeisu Khazih Thawhkikna
Thawhkikna khempeuh lakah a masapen bel, Thuciam Lui sungah kigenkhol-in (gentehna-in Late 16:9-10), tangthu-a a piang taktak ahihna lungdamna thubute ah kigena, Sawtakte’ Tangthu pan kipanin Thuciam Thak sungah upna thugil khata kigen Zeisu Khazih’thawhkikna ahi hi. Paul in ICorinthians 15 sunga a gen mahbangin thawhkikna thu pen Christian upna leh lam-etna khempeuh a kingakna upna thu laigil taktak ahi hi. Laisiangtho in thawhkikna khat sanga tamzaw a genna thu i genna ah, Zeisu Khazih’ thawhkikna pen a dangte tawh kibang lo-a tuampian vilvel a beisa huna piang khin thu khat ahihna i ciapteh ding thupi hi.
B. Jerusalem Khuapi-a
Misiangthote’ Thawhkikna
Khazih a thawhkik hun laitakin, Matthew 27:52-53 a a gen bangin thawhkikna i cih bangci bang hiam cih hong lak thu khat piang hi. Hih munah, Zeisu Khazih a si-a a thawhkik laitakin, “hante kihong hi; a ihmu misiangthote’ pumpite hong thokika, amah a thawhkik khit ciangin han sung panin hong paikhia uh a, khuapi siangtho sungah lut-in, mi tampite’ tungah a kilang uh hi” ci-in na gen hi.
A piandang simsim hih thupiang tawh kisai-in Laisiangtho mun dang khat beekah a kigen gehna om lo hi. Tua hante Khazih’ a sih laitaka kihong ahih hangin, Laisiangtho in hong hilhna ah, Khazih pen sihna pan a sia ngei nawn lo dingin thawhkikna pumpi tawh a thokik masapen hi, ci ahih manin, Khazih mahmah a thawhkik matengin tua misiangthote thokik lo hih leh kilawm hi. Lazarus-te banga huntakna kipiakik pawlkhat bel si kik lelin kivui kik lel dinguh a, Khazih bel sihna a thuak kik nawn peuhmah lo dinga thokik ahi hi.
Khazih’ thawhkik hun laitaka thokik, a mal mahmah-a zong a tam khol lo misiangthote’ thawhkikna bel, Siampite’ Laibu sunga biakpiakna a tangtunna hi leh kilawm hi. Jehovah’ pawite’ lakah a thumna (Siampi. 23:9-14) pen Israel mite in an lak a kipat ciang vua Topa’ mai-a veii dinga a kigawi nai lo buhphalte te Topa’ mai-a piakna leh a kila ding ante’ hangin a kilawm banga biakpiakna a neihna uh ahi hi. Khazih a thawhkik laitaka thokik misiangthote in sihna panin Khazih bek thokik lo-in anlak bangin genteh lehang, ama’ nungah tampi-in hong zui lai taktak ding hi, cih a lahna (token) ahi uh hi.
Mi pawlkhat in bel hih thawhkikna pen Lazarus-te’ thawhkikna bang hi lel hi, ci-in a ngaihsut uh hangin, Khazih’ thawhkik huna a thawhkikna un tua mite’ thawhkikna pen a tawntunga kimang ding thawhkikna ahihna hong laka, a sep dingteng uh asep khit uh ciangin vantungah kilato taktak ding uh hi. Thu khat ah, misi khempeuh thawhkikna khat bekah tho khawm lo ding ahihna zong hih thupiang in hong lak hi gige hi.
C. Pawlpi’ Thawhkikna
A misiangthote’ adinga Khazih’ hong paina thu leh Rapture thu i genna ah i gensa mahbangin, a mite’ adinga Khazih hong pai ciangin Khazih’ sunga sisa mite hong thokik dinguh a, nungta lai -a kikhel mite tawh hun laka Topa dawn-in vantungah kilato ding hi. I Thessalonians 4:13-18 leh I Corinthians 15:51-58 in hong hilh mahbangin, a thokik misiangthote leh a kikhel misiangthote in Khazih’ thawhkikna pumpi tawh a kibang thawhkikna pumpi ngah ding uh hi (I John 3:2). Pawlpi’ thawhkikna pen mi honpi thawhkikna lakah a masapen hi-a, tua nunga thawhkiknate’ madawk ahi hi.
D. Thuciam Lui
Misiangthote’ Thawhkikna
Job 29:25-26 a i muh mahbangin, Thuciam Lui sungah thawhkikna thu a kigen niloh hangin, genkholhna tampi na om khol lo hi. Ahi zongin, a kigenna munte i et ciangin, a mite’ adinga Khazih’ hong paina Rapture ah thokik lo-in, leitungah Khazih hong pai kik hun ciangin Thuciam Lui misiangthote thokik dinguh ahihna kitel hi.
Daniel 12 sung tang khatna ah Gimna Lianpi hun na kigena, tang nihna ah tua nunga zui pah ding leh tua tawh kisai a khupna bangin thawhkikna thu na kigen hi; tua ahih manin Thuciam Lui misiangthote Rapture ah thokik lo-in kumpi gam a kiphuh hun cianga thokik ding ahihna kitel mahmah hi. Job sungah zong hih bang thu mah kimu a, thawhkikna hun pen hong Tanpa leitungah a din hun ciang ding ahihna kimu hi.
Tua banglian mah-in, Isaiah 26 sunga leitung pan misite’ luangte a kiphotna thawhkikna thu a kigenna ah, Khazih in
leitung thu a khenna tawh kizomin na kigen hi. “Khazih’ sunga si mite” cih kammal in Rapture cianga kithokiksak ding mite kuate hiam cih hong hilh hi (I Thess. 4:16). “Khazih’ sunga” cih kammal in tuhun-a Khasiangtho baptaizna tungtawna thu-ummite’ dinmun hong laka, tua pen Thuciam Lui misiangthote’ tunga piang ngei lo, Sawltakte’ Tangthu 2 sungah a masapen-a piang ahihna kimu hi. Laisiangtho khia mite’ ngaihsutna a kilamdangin pawlkhatte in Thuciam Lui misiangtho zong Rapture ah thokik ding hi, a ci phial uh zongin, hih leitungah Khazih hong pai kik cianga piang ding ahihna kitel mahmah hi. Bang bang ahi zongin, kum tul maanna hun ma peuhmah-in Thuciam Lui misiangthote ahi a pawlpi ahi zongin kithokiksak ding hi.
E.Gimna Lianpi
Misiangthote’ Thawhkikna
Gimna Lianpi hun sungin a upna uh hanga thahna a thak mite a kumpi gam phut dinga Khazih hong pai kik ciangin kithokiksa ding ahihna a tuam vilvel-in kigen hi. Kilaakna 20:4 ah John in, “Zeisu’ ading teci a panna uh leh Pasian’ thu hanga ngawngtanna a thuak, sapi bia lo a, a tangtang tunguh ahi a a khut tung vuah ahi zongin sapi ciaptehna a ngah lote mite’ khate mu-in” tuate “Khazih tawh kum tul khat mang khawm uh hi” ci-in kigen hi.
Gimna Lianpi sunga a upna uh hanga thahna a thuak mite a kumpi gam phut dinga Khazih hong pai kik ciangin thokik dinguh ahihna hih lai ah siangtakin kigen hi. Kilaakna 20:5 ah, “A si midangte bel kum tul khat a bei matengin a hing kik kei hi. Hih pen thawhkikna masa ahi hi” ci-in kigen lai hi. Hih thawhkikna ma-in Khazih’ thawhkikna, pawlpi’ thawhkikna leh Thuciam Lui misiangthote’ thawhkikna, cih bangin thawhkikna dang om khin ahih manin bangci bangin hih thawhkikna pen thawhkikna masa hi thei ding ahi hiam, ci-in kidong nuam hamtang kha ding hi.
“Thawhkikna masa” a cih ciangin a hun-in a kihal mahmah hangin midikte’ thawhkikna khempeuh a genna ahi hi. Amaute khempeuh, mi gilote’ thawhkik ma-a thokik “a masa” te ahi uh hi. Hih thut tawh kizui-in, “thawhkikna masa” cih kammal pen bang hun bang hun-in thokik ta le uh, Khazih’ thawhkikna nangawn a khel misiangthote’ thawhkikna khempeuh a kigenna ahi hi.
F. Kum Tul Maanna
Misiangthote’ Thawhkikna
Kum tul maanna hun sunga misiangthote’ thawhkikna nading tawh kisai-in Laisiangtho in a genna mahmah om lo mawk ahih manin pawlkhatte bangin kum tul maanna sunga lut misiangtho peuhmah si nawn lo ding hi, ci uh hi. Kum tul maanna a bei cianga misiangthote’ kilaak nading tawh kisai zong Laisiangtho in gen kikeuh lo hi. Tuhi-a misiangthote’ adingin hih thute lunghihmawh nading tu om lo a, a kumpi gam phut dinga Khazih hong pai kik khit ciangin hih thute tawh ki kisai thute hong kilak thei lua hi.
Ahi zongin, Gimna Lianpi nawkin kum tul maanna sunga lut mi pawlkhat a kum mahmah uh zong ham khin dinga, kum tul taktak nungta khol kei le uh kilawm kisa limlim pong hi. Adam leh Christian masate mahmah zong kum tul khat na nungta lo uh hi. Tua ahih manin hotkhiatna ngah-in kum tul maanna sungah a lut-in a khankun uh a kisausak mahmah hangin pawlkhatte si kha ngel ding uh hi, ci-in kiseh thei hi.
Isaiah 65:20 ah, “Naungek-a si cih bang om lo dinga, a khan khin lopi-a si kuamah om lo ding hi: bang hang hiam cih leh naungeka site kum za pha ding hi; kum za a pha mawhnei mite in hamsiatna thuak ding uh hi” ci-in hong kigen hi. Kikhansau thei mahmah dinga, kum za a pha mite khangno lai mahmah ding uh hi, ci-in hih mun in hong hilh hi. Kum tul maanna hun sungah a ham khin mite nangawn a khan khin-in si pan bek ding uh hi. Kum za banga si mite bel a mawhna uh hanga si baih mahmah uh hi dinga, thukhenna lim-in sihna a tung ding ahi hi.
Bang bang ahi zongin kum tul maanna hun sunga si misiangtho om veve leh kilawm mahmah a, tuate kum tul maanna a bei ciangin kihtokiksak ding hi. Ahi zongin Laisiangtho sungah hih thu a kician liana a kigenna om lo a, tu-abangin gen lehang kikhial lo pen ding hi. Kum tul maanna sunga si misiangthote a kithawhkiksak hun mah-in a nungta lai misiangthote zong pawlpi a kilaktah mahbangin hih leitung pan sihna thuak lo-in kilakhia ding hi. Tuhun-a leitung leh vantungte a kisuaksiat nadinga kiginkholhna hi ding hi.
G.. Mi Gilo Mawhnei Mite’ Thawhkikna
Thawhkikna laka a nunungpen thawhkikna bel mi gilo mawhnei mite’ thawhkikna ahi hi. Kilaakna 20:11-15 ah, a lian a kang tokhom thukhenna tawh kizomin, a kithokiksak ngei nai lo a sisa mawhnei mite khempeuh kithokiksakin thukhenna thuak dingin Pasian’ mai ah kidingsak hi. Van thak leh lei thak a kibawl ma-a thukhenna nunungpen ahi hi. Hih thukhenna tawh kisai a cingzaw-in mailam ah i gen lai ding hi.
A huampi-in en lehang, mi khempeuh kithokiksak ding, ci-in Laisiangtho in hong hilh hi. Daniel in a gen mahbangin, “Leivui laka a ihmu mite hong khanglo dinga, pawlkhatte nuntak tawntungna leh, pawlkhatte tawntung thukhenna ah kithosak ding hi” (Dan. 12:2). Mite a sih hangin, mi khempeuh kithokiksak dinga, ahi zongin thawhkikna khempeuh kibang kim lo ding hi . Nuntakna-a thawhkikna pen minthanna tawh kidim thawhkikna hi a, thu-ummite in Khazih’ pumpi bang pumpi ngah ding uh hi.
Thukhenna thuak dinga thawhkikna bel lauhuai mahmah ding hi. Mihingte a tawntunga kimang ding pumpi kipia dinga, mawhna tawh kidim-in natna leh haksatna thuak dinga thawhkikna ahi hi. Dawimangpa leh a vantung mite bangin, mei liipi sungah a tawntungin om suak ding uh hi. Hih thu hang mah-in mei-a kaatna pan mite a kikaikhiat theih nadingin mite in leitung mong dongah lungdamna thu gen uh a (Jude 23), Pasian a um lo mite’ tunga tung pelmawh ding Pasian’ thangpaihna pan a hotkhiat zawh nadingun hanciam uh hi. Midikte’ adingin thawhkikna pen lam-et khempeuh’ bulpi hi a, rapture hong tun laitaka nungta lai mite in sihna ciam kha lo-in laktohna a ngah teii uh hangin, leitung mi a tamzaw han sung pana a thawhkikna uh tungtawnin leitung tawh a kituak pumpi panin vantung tawh kilawm ding pumpi-a a kikhel dinguh Pasian’ gelna ahi hi.
Dotna
1. A si mi khempeuh sihna pan a kithokiksak ding hiam?
2. Sihna pana a kithokiksak masapen kua ahi hiam?
3. Matthew 27:52-53 sunga kigen thawhkikna thu gen in.
4. Pawlpi’ thawhkikna thu gen in.
5. Bang thuteng hangin Thuciam Lui misiangthote hih leitunga Khazih hong pai kik hun ciangin thokik ding hi, ci thei i hi hiam?
6. Gimna Lianpi hun sunga si mite’ thawhkik nading thu Laisiangtho in bang hong hilh ahi hiam?
7. Kum tul maanna hun sungin a si mi a om ding hiam?
8. Kum tul maanna hun a bei ciangin a nungta lai-a om misiangthote bangci dinguh ahi hiam?
9. Mi gilo mawhnei mite’ thawhkikna thu gen in.
10. Hotkhiatna ngah mite’ thawhkikna pumpi leh a mangthang mite’ thawhkikna pumpite a kilamdanna gen in.
11. Bang hangin tawntung gawtna thu in mihing khempeuh tungah lungdamna thu hong gen nuamsak ahi hiam?
Rev. Zam Khat Kham
Comment piaknop aomleh...