Thanksgiving Thungetna ~ Pu Go Sawm Khup
US Gam lam ah Thanksgiving Holidays hun hita ei! Mimal leh Innkuan Thupha san’sa teng hangin Lungdamkohna hunpha cihding hi inteh. Zogam lam ahbel Gam leh Minam tawh kisai thu kiza ziahziah in thangah huai, lawp huai, lungkim huai sa ing.
ZIC2019KL Khawmpi kici, tu kum February kha sung a, Kuala Lumpur khuapi a kibawl, Leitungbup Zomi-te Minam Khawmpi sung a Thukimna leh Thukhensatnate tungtawn in Minam Maban kalsuanna vive hi ci ing.
Zogam Lamka khuapi ah Zoland Territorial Council kingen ziahziah hi.. ZIC2019KL Khawmpi ah Chairman khat ahi Pu John K. Ngaihte leh a pawlte mahin madawk in ma pangzo uhhi. Thupi sa ing.
India gam Delhi khuapi ahzong ZIC2019KL Khawmpi akah Pu Golan Suanzanmung, Dr. Lam Khan Piang cihte ZSF pawlpi makaite in madawk in ma pang uhhi. Lungkim huai sa ing.
ZIC2019KL Khawmpi Thukhensatna khatmah ahi, Kawl gam sung a Zogam pan Meitei Gamnuaimite hawlkhiat ding tawh kisai in Lungphona zong Pu Kimtuang leh ZIC2019KL Khawmpi akah ZSYO pawlpi Makaite madawk in ma pang cih zahang. Asawtlo in Khuapite ahzong Lungphona kipan ding cih za ing.
Hih Khawmpi Thukhensatna Mabante Zomi MP-te inzong hong panpih in, taangpi taangtate Tangmi a hihna uhtawh Meitei Gamnuaimite Len omna tengbang vaville uh lunggulh huai sawnsawn ding hi.
Kawl gam pen tu laitak ICC, ICJ, Genocide cihte tawh a buai laitak hi a, 2008 Thukhunpi puahphatna, Panglong Khawmpi cihte hong kinawh theizaw dingin lam-etna om hi.
Hih bang hunte ah Zogam leh Zomi-te Maban tampi kimainawt thei ding ahih manin, tu Thanksgiving hunnuam sungteng in, sak leh khang, sim leh mal, tuipi galkhat a om Zomi khempeuh in kithutuak takin anungta Pasian tung ah Zogam phuh zawhna ding thu nakpi takin ngenkhawm ni. Pu Go Sawm Khup
Comment piaknop aomleh...