Syria galkap te’n Aleppo simding kipankik hi ci

Syria galkap te’n Aleppo simding kipankik hi ci

Sept. 23, 2016: Syria ah ceasefire hun behlap ding vai New York ah leitung makai tuamtuam ten a hanciam hangin piang zo lo ahih manin Syria galkap ten rebelste ukna Aleppo district sung lak kikna dingin galdo kipan ta hi ci-in zan in pulak uh hi. Hih thu pen zan in Aleppo tung lam panin mun tuamtuam kikap a, mei kuang leh meikhu in Aleppo a tuamcip khit nungin Syrian defence ministry in zan nitak in a pulak ahi hi.

Zan zingsang in Syrian Observatory for Human Rights in a beisa kha a kipanin zan in Aleppo kikapna nasia nasia pen lai a, mei kuang nasia mahmah in, zan bekin mi sagih sih beh hi ci-in gen hi. Syria galkap leh a kipawlpih ten July kha pek panin rebelste ukna Aleppo nisuahna lam a kim khat na umcih khin zo uh hi. Aleppo nisuahna lamah mi 25,000 kiim teng hi.

Syria galkap ten Aleppo lak kikna dingin galdo kipan kik hi cih a tangko khiat khit uh minute sawt kihal loin US leh Russia in ceasefire hun sottoh beh ding kikupna nei uh a, ahih hangin thukimna nei zo lo uh hi. Hih ceasefire pen nung kal in US leh a pawl ten Syria galkap 62 a kaplup manun Syria galkap ten Aleppo kap hong kipan kik uh ahi hi. Ceasefire hun a bei khit a sawt loin UN ten huhna van a puakna uh mawtaw kikapsak a, mi 20 in sihna tuak hi. US in Russiate kap hi ci-in a ngawh hangin Russia leh Syria in nial a, tua hunin US leh a pawlte’ tuithe vanleng tua kiim ah leng hi ci-in lehngawh hi.

Zan in New York ah gam 23 kipawlna International Syria Support Group (ISSG) ah US Secretary of State John Kerry in US leh Russia in lampi khat zui-in na kisem khawm thei nawn lo ding hi ci hi. Kithukimna piang thei lopi-in leitung mite zak dingin kithukimna om hi kici thei nawn lo ding a, kikaptuahna khawl lo pi-in kikaptuahna khawl ta hi ci-in ka kipawlpihte (rebels) uh kiang ah kici thei nawn lo ding hi ci hi.

Syria gam-a UN palai Staffan de Mistura in New York khawmpi ding sawtpi ngaklah takin kingak a, Russia leh US in kilemna ding nakpi takin a hanciam hangin lungkiat huai takih hih khawmpi a hawmpi suak a, a mawkna suak ahih manin na mahmah hi ci hi. Kikupkhawmna nasia takin kinei napi thukimna bangmah piang zo loin hih khawmpi bei hi ci-in gen beh hi. -Al Jazeera and agencies/ Thang Khan Lian