Thailand ah Bomb puaktam, mi 18 liam

Thai gam leitawlam aom Yala Province sungah Bomb puahtapna hangin mi 18 liam cih Friday ni in Thai Army te in genkhia uhhi. Thailand leitawlam pen Muslim hiamtawi te phualsahna khat ahih manin Thai galkap te’n buaipihden uhhi.

2004 kum khitzawh Southern Thailand ah gamsung buaina hangin mi 6500 val in sihlawh khinta uhhi. Hih asi te atawmzaw pen khuasung mite hi a, Buddhist biakna leh Muslim biakna vaihang in buaina tampi omden hi.

Thailand pen agambup biakna ahihleh Buddhist hi a, ahi zongin Southern Thailand sung aom Yala, Pattani leh Narathiwat Province thumte ah Muslim te atamzaw om uhhi. Tuahang in abeisa kumsawtpipek akipan Thai leitawlam ah buaina omden hi.

Abeisa Thursday zanlam in Thailand leitawlam aom Yala Province sungah Bomb akizom in 14 puaktam a, Friday ni zingsangtung inzong Bomb 3 akizom in puaktam cih Regional Security Spokesman Colonel Pramote Prom-in in genkhia hi.

Akizom phial in Bomb 17 vei puaktam ahih manin mi 18 in liamlawh uhhi. ZD Sawltak