Thai Mae La Refugee Camp ah amauleh amau akithat Suicide tam

Thai Mae La Refugee Camp ah amauleh amau akithat Suicide tam

Thai gamsung aom Mae La Refugee Camp ah amauleh amau akithat “Suicide Case” tamsemsem ahih manin, kumpi thunei te lunghimawh uh cih Irrawaddy pan kiza hi. Mae La Refuee Camp sungah gambel mi 40,000 bang omding kici a, tuasungpan makai Chairman Saw Honest in agenna ah 2016 kumsung bekbek in amauleh amau aki thahlupsawm Suicide Case 54 bang omhi ci’n genkhia hi.

Tua Suicide Case 54 lakah atamzawtham pen sisuak uh cihi. Hihbang thupiang pen ki lunghimawh mahmah ahih manin, banghang in hihbangin ki gamta hiam cih athu kankhiatding ki hanciam ci’n genkhia hi.

Community Leaders leh Camp Authorities te genkhiatna ah Suicide Case akipatna pen innkuansung buaina Domestic Violence, zu leh khamtheih guihtheih zatna cihte panin akipankhia hiding ci uhhi.

Saw Honest in agenna ah Suicide Case 20 pan 30 kiim bangpen zu leh guihtheih khamtheih zatna panin innkuansung buaina piangsak in akipankhia hi ci’n genkhia hi.

Refugee Camp sungah guihtheih khamtheih zatpen akikhamcip himahleh kizang veve cihi. Zu bekthamlo, kanza (Marijuana) leh Methamphetamines vankham akipan khamtheih tuamtuam kizang hi.

Mae La Camp pen Mae Sot khuatawh kinai in, Mae Sot panin zu leh khamtheih guihtheih ki ngahthei ziauziau ahih manin, Refugee Camp sungahzong azuaksawn mah na om hihtuak hi.

Thai gamgidung tengah Refugee Camps 9 bang om ci a, tualak ah Mae La Camp pen Suicide Case atampen in ki ciamteh hi.

Karen Refugee Committee (KRC) panin Spokesperson khat ii genna ah Suicide Case pen Camp’s Zone B panin atamzaw piangphadeuh a, amauleh amau aki thahsawm tepen aham amol akipan numei pasal omkawikawi cihi.

Pawlkhat kumcinglo in akiteeng teleh lungkiat natna Depression aneite zong kihel uh cihi. Hihbang in gamtatloh nadingin thuhilhna Awareness kineihpih in, thuhilhna Video tuamtuam zong ki ensak cihi.

Gamthumna Resettlement paipak theihloh manin akithat cihsangin guihtheih khamtheih zangin akithat hizaw ci’n makai te’n genkhia uhhi.

More: Thailand pan Refugee te Kawlgam ki ciahsakta

KRC banah Karen Women’s Organization (KWO) te’nzong mipite thuhilhna, thusinna Education & Awareness Training tuamtuam sinpih uh cih kiza hi. ZD Sawltak #zomidaily