Thai gamsung ah Bus tuahsia in meikuanggawp, Myanmar 21 in sihlawh

Thai gamsung ah Bus tuahsia in meikuanggawp, Myanmar 21 in sihlawh

Thailand, Tak Province sungah tuni Friday (March 30) zingsanglam in Myanmar Worker bekbek apua Bus golpikhat tuahsia in, meikuanggawp cih Bangkok Post pan kiza hi. Hih tuahsiatna hangin Myanmar gammi 21 takin sihlawh uh a, adang mi 27 tepen meikuang panin suaktathei uhhi.

Asuakta mi 27 tezong liamgawp uh ahih manin, zato ah kipuaksak uhhi.

Tak Province panin Reports akigenkhiatna ah tua Bus pen Myanmar Workers te’n abupsaap “Chartered Bus” kici hi. Bus sungah Passenger bekbek akigawm in 50 bang atuang uh kici hi.

Tua Myanmar Workers tepen Work Permit abawlsak, Registration amankhit uhciangin Mae Sot Province panin Pathum Thani aom Nava Nakorn Industrial Zone ah aciahlam uh ahihi.

Thai gamsung ah Work Permit abawlpen mi tultampitak ahih manin, hamsasak mahmah, hun sawtpi beisak uhhi. Hih Bus tungah atuangkha Myanmar Passenger tepen Labour Ministry tungah naseptheih nadingin Work Permit angahkhit uhciangin anasep nading uh Nava Nakorn Industrial Zone zuanin lungdamtak in aciahkiklam uh hihtuak a, lamkal ah atuahsia uh ahihi.

Bus atuahsiatna munepn Mae Thor, Taksin Maharat National Park gei, Highway 12 Kilometer 60 na ah atuahsia ahihi.

Hih Bus tuahsiatna akigen masakna ah Bus Engine sungteng meikang in, tuapan in amanlangin meikuang kilawh zatzat in, Bus abup in akuanggawp kici hi.

Police te genkhiatna ah hih atuahsia Bus sungah Myanmar Workers akigawm in mi 48 atuang uh cihi. Bus Driver papen Thai gammi hi a, azi inzong zui ahih manin, hih Bus sungah akigawm in mi 50 atuang uh cihi.

Bus meikuang in asi tepen amel kitheiloh zahdongin kangtumgawp ahih manin, ami kua cih khentheih nadingin Experts kisam hi ci’n Police te’n genkhia uhhi. Police Officer khatin agenkhiatna ah Bus sungah meikuangtawh akanglum tepen nakkatlua mahmah ahih manin, numei leh pasal zong kikhen theiloliang hi ci’n genkhia hi.

More: Thai gamsung ah Motor Accident in Myanmar gammi 3 meikangtum, 10 liam

Thai gamsung aomkha Myanmar gammi te gensawnna ah hih Bus atuahsiat hunpen Friday zingsanglam 2:00am hunpawl hiding ci uhhi. Bus Engine mei akat ciangin Bus Driver in kongkhak honsaklo in, amah kumziau ahih manin, Myanmar Passenger te asungah awkcip uhhi. Tuabangin a awkcip te lakah Bus Window sukha in apusuak, ataikhiaman tengbek asuakta uhhi ci’n Zin Min Htun kici Thai gamsung aom Myanmar gammi khatin genkhia hi. Sawltak #zomidaily