Breaking news: Texas Sang kikapna ah sangnaupang 18 leh Sang Sia 1 si
U.S gam Texas Sate, Uvaide khua, Robb Elementary School (Tan lang pan Tan 5) ah Kum 18 apha Salvador Ramos aci migilo khat in automatic rifle and handgun thaute tawh kap gawp ahih manin Sangnaupang no 18 leh Sang sia khat si ci in in CNN leh news tuamtuam ten genkhia uh hi.
Kikapna apian zawh ciang Texas Governor Abbott in elementary school kikapna ah sangnaupang no 15 leh Sangsia khat si aa, thau akap migilo pa zong si pah hi ci in news te tung genkhia masa pen hi. Tua zawh ciang aliam te Zato ah kipuak aa, sangnaupang 3 sih beh in asi avekpi sangnaupang 18 pha to ta ahi hi. Zato ah atung tampi omlai ahih manin tua te bang ciang tung hiam cih kithei nailo hi.
Robb Elementary School Sang ah Hispanic minam 90% om uh aa, akaplum pa (migilo pa) zong Hispanic minam te mah hi ci uh hi. Migilo pa pen tua veng aaom Uvalde High School ah Sangnaupang khat mah hi aa, amah guak bek ngamta ci uh hi. Hih migilo pa pan Robb Elementary School Sang ah mithat dingin hong pai ma in a Pi (grandmother) kaplum masa aa tua zawh ciang Sang ah va pai in sangnaupang te akap gawp hi ci in Texas State Senator Roland Gutierrez in CNN tung genkhia hi.
Hih Robb Elementary School kikapna pen mi 17 sihna 2018 Marjory Stoneman Douglas High School, Parkland, Florida kikapna zawh ciang a nasia pen hi ci uh hi. US te taangthu sung ah 2012 kum Sandy Hook Elementary School, Newtown, Connecticut Kikapna pen a nasia pen hi aa, tualai ah mi 26 si hi. Hih kikapna apian zawh ciang White House tungaa akikhai US Flag pen alang ah khiam suk uh aa, President Biden in zong thu gen na nei hi. Hih kikapna vai aza mimal khat ciat kidah tek, kicik ze tek hi.
Sangnaupang nau neen kinei tek ahih manin Nu leh Pa te zong kipatau tek aa, mailam ah Sang tengah bang cih Security om thei ding cih kingaih sun tek hi. Asi aliam mimal khat aading thu ngetna ah phawk tek ni. Ref: CNN, ABC, Fox news *** Zing nitak ciang News Update zong LIVE tawh kikhah ding ahih manin kimu tek ni… Thomas On Sian Mung (Thomas Mung Guite) Washington D.C May 24, 2022
Comment piaknop aomleh...