Tembaw tungah mi nih

Tembaw tungah mi nih

Thupatna: Teembaw i cih in tuipi tunga mihingte khualzinna akizang khat ahi hi. Tuihual le huihpite tuakkha thei hi. Tua haksatnate pen khatveivei ciangin a tuang mite mawhna peuh na hithei zanzan hi. Mihingte i nuntakna sungah zong nisim in teembaw tung tuangin khual a zinzinte ihi hi. Innkuan teembaw; pawlpi teembaw; mission teembaw; khuasung teembaw; minam teembaw etc..,te zangin a zinzinte ihi hi. LST sunga teembaw tuang minihte thu lungngai khawm dih ni.

1. Jonah

Jonah pen Nineveh khuapi a pai ding kimlai pailo zaw in Tarshish khua lam zuanin Teembaw tuangin hong zin khia hi. Tuipi laizang hong tun uh ciangin huihpi nakpitak hong nunga a teembaw uh hong kisia dektak liang hi. Tua ciangin mi khempeuh patau in lauthawng uh a, amau pasian tek bia in, kua mawhna hang hiam? ci-in ai a san uh hi.

Ai a san uh leh Jonah tung hong tu mawk hi. Tua ciangin Jonah in mite kiangah “..Hong dom to unla, tuipi sungah hong khia un; tua hileh no adingin tuipi hong dai ding hi; banghanghiam cih leh hih huihpi na thuakna uh keima’ hang ahi hi, cih ka thei hi.., a ci hi (Jonah 1:12). Tuaciangin Jonah domto in tuipi sungah a khiat uh leh tuipi a daai pah hi (v.15).

2. Sawltak Paul (Sawl. 27)

Sawltak Pawl le thongkia mi pawlkhatte Italy gam zuanin teembaw tawh Rome galkapte a uk bu Julias makaihna in khual hong zin uh hi. Khawlmun Nuam kici khua hong tung uh a, ni tampi a taam uh hi. Khualzin zomin pai kik ding hong geel uh ciangin Paul in, “Lawmte aw, tu-in teembaw tawh khualzin ding lauhuai ta a, teembaw leh a vanpuakte a siat genloh, mihing mahmah zong i sih lawh ding lauhuai hi,” ci-in a ngaihsutna a gen hi (v.10).

Ahi zongin Paul genna mang loin hong pai teitei uh leh, “Leilu Nisuahna Huihpi” hong tuak petpet uh hi. Mi khempeuh lungkham in lamet bei kisa in sih ding bek ngak in a om lai tak un Paul in, “…..tu-in note lunghimawh kei un. Teembaw sia bek dinga, mihing a si kuamah omlo ding hi,” ci-in a gen hi (v.22b).

An ne lo, tui dawnlo in ni 14 bang hong hih ciangin Paul in amaute tha pia in an a ne sak hi (v.33-36). Teembaw a siat ciangin tui peekin galkah ding hong kul ta hi, tua ciangin galkapte in thongkiate a tai sim dinguh lauthawng uh ahih manin thah ding a sawm uh hi. Ahi zongin Paul hangin kuamah kithat lo in, a suakta uh hi.

Lungngaih ding

• Nang hangin teembaw in huihpi a tuak kha hiam?
• Nang hangin teembaw tuangte in lungkhamna a thuak kha hiam?
• Nang hangin teembaw tuangte in lungkhamna sung pan lungnopna a ngah hiam?
• Nang hangin teembaw sunga gilkial mite’n gilvahna a ngah lawh hiam?
• Nang hangin sihna thahna tuak dingte’n suahtakna a ngah hiam?
• Nang hangin teembaw tuangte’n a nungta Pasian a theihlawh hiam?

Thukhupna

I nisim nuntakna ah innkuan teembaw, pawlpi teembaw, mission teembaw, khuasung teembaw, minam tembaw,etc..,a tuangtuang ihi hi. I tuanna teembaw in ei hangin haksatna a thuaklawh hiam? Jonah bangin ei hangin a thuaklawh khak leh zong kei khialhna hi, ci thei leng huihpi hong daipah ding hi.

Paul bangin ih khualzinna ah hong piang thei ding lauhhuainate i pulak thei hiam? I pulak bangin hong kimang kei zongin i tuahkhak buaina sungah i kithuakpihte ading mah in i hanciam veve hiam? Mite adingin lametna khuavak a tangsak, gil a vah sak, nuntakna a honkhia i hizaw hiam? Nang buaina piangsak maw? Buaina veng sak..? Lungdam, Dong Mung