Malaysia Zomi Khuado 2014 Ka Siimna – 4
Thugenpa in a thu bulpatna zong “A laute ciah un, kei laulo hi ing” cih hangsantak, kiciantak, kitel setset in hong gen a, i nak vang hanhan tawh kibang hi. Hilua veh aw, hilua veh aw ciin kilusu ngeungeu bek hi. ZAM makaipipa bang a ciltui kaai liang hi in ka thei hi. Zinmang hihna tawh thugen Pa Hang Khan Lian mah in thu bun in thu gen siam a, ahi zong gen ngam takpi hi. Mipite kisap leh mipite adingin gen giapgiap, awng kheh ngam ahih manin mipi in khut kibeng ziahziah hi. Zogam pen Zomi te in a luah ding gam hi. Zogam sungah Zomi in vai a hawm ding hi. Zogam sungah Zomi a teen ding hi…cihte a thubulpi hi a, zong ahi takpi hi. Tuhun khuahun tawh kituak in a kisam penpen laitak ahi hi. Zinmangpa gen bangin Zomi kicih ding a kihta, a lau, a linglawngte a ut leh ciah hen, a laulo, a angtang, Zomi a sihpih ngam om lel hi. Minam a Pasian in hong bawlna a angtanglo, a utlo a om leh amau thu hi – tua banga minam hihna nangawn a dinpih ngamlote zong it huai mahmah masa hetlo lel hi. Malaysia ah Zomi kipawlna ah min khum bekbek zong 27,000 val pha a, a vakkhia thei nailo, min khum man nailo zong hunkhop omlai cih kithei hi. Tuate in hong khum khit uh ciang Khuado, Zomi Nam Ni cihte hong nuam semsem lai ding hi. (A thugen a kicingzaw in ama laigelhna sungah kimu thei ahih manin hih lai ah kong guang kik nawn kei hi. Ama gelhna sungah na sim khin ding uh lamen ing. A video zong hong kihawmkhia pah dingin lamen ing.)
Pahtawina Hun:
ZAM in Zogam leh Zomi adingin mi phatuamngai leh midangte adinga nasem pahtawi huaite min kaikhawm in pahtawina pia uh a, etlawm mahmah hi. A diak in Zomi te tenna leitang gamthak ah pau leh ham kibanglo in kihona a lemloh ciangin a kisam banga kam hong phensak dingin mi kisam mahmah hi. Kamphen ding cih zong a baih hilo a, kampau 
siam khempeuh zong kamphen thei hilo leuleu hi. Tua ahih manin minam leh a kisamzaw te adingin a sem, a gim, a tawlte a kilawm pahtawina uh leh mipi mai ah lungdam kohna, lungdam lahna in a dinkhiatsak uh a etlawm leh a hoih ahi hi. Mipi in khutbeng ziahziahin lungdamna kiko a, ‘hin gim nam’ sak mahmah hi. Zomi bek hilo minam khempeuh hih bangin a haksazaw, a kisamzawte a kihuh, a kidomto liailiai a ngeina hi. UNO nangawn a kisamte domsang dinga kiphuan ahi hi. Zomi sungah huh kulte kinusialoin kihuh kipanpih ciat ahih manin nakpi takin lungdam huai kasa mahmah a, makaite zong geel siam uh kasa mahmah hi.
Mipi adingin huhna a sem te bek hilo in mipi kalsuan dan ding, minam kalsuanna dingah a kilawm nasep a sem honpi khat na om hi. Tuate lak ah natna hoihlo a ngahte adingin sum leh pai a zonpih, zato a puak, cina luna khat peuh omleh zato ah a puak, sihna tuak a om ciang a luang va pham in hankhuk a tangsak, sum leh pai leh leitang a zonsak mite nakpi takin pahtawi dingin a kisam ahi hi. Tua banga semte in pahtawi ding lametna leh deihna tawh sem peuhmah lo ding uh hi cih pen mipi theihsa ahi hi. Ahi zongin mipi zong lungdam hi cih a kilatsak nopna uh pen a gel siamna uh leh a kilawm hi a, zong hih tangtang dingin a hoih ahi hi. Mimal in, innkuan in, beh leh phung in lungdamko in na pahtawi khin kha mai thei hi, ahi zongin Zomi minam bup mai ah a kipahtawina om nailo ahih manin hih bang hun ah kipahtawi pen a pahtawina ngahte lah hampha, a pahtawite lah thusiam sa ing. Zomite pen pupa hun pan thusiam a kituh dente hi hang. Zongeina hoih sungah thusia kidem cih om ngeilo a, thupha bawl ding pen kidemna siangtho khat hi den hi.
ZAM makaite in amau a pattah, a dinpih, amau kha kham a paihsak upate (ZAM Advisers) pahtawina leh lungdam lahna a bawl uh zong siam uh kasa hi. Makaite, upate pen minam adingin vangil hi in amau theihna leh amau khuamuh masakna in laidal laikung tawh a kigelh khin theilo thuciamtehna ahih manin pahtawi huai mahmah hi. Zomi te tuhun ciang laigelh ki ukta in laidal tungah kiciamteh zaw deuh ta napi thu leh la tampi a kiciamteh zo khinlo omlai a, tuate upate in amau khuak sungah na kemcing uh hi. Zomi te laibusaal teng i upate khuak sungah kiciang venvan hi!
Zolia leh Zotaangte hong pai deudeu leuleu:
Thugenna khit, pahtawina khit ciangin mipi in a ngaklah leh a pua lama zuntha a pusuak pakte nangawn nawhsa a hong dianglut kikna uh Zolia Zotaang kitelna ding music hong ging ciaiciai ciang ahi hi. Den in khat vei hong kidawk khin uh a, tun a nihveina in mipi mai ah Zopuan tuamtuam tawh kizemsa in hong paikhia deudeu leuleu uh hi. Amasa pen banglo in tun bel a dawhsang (stage) tung bek ah hilo in a endik, judges te mai ah zong hong kilak uh hi. Kei bang endikte nung gual ah kitu ahih manin Zolia te bang a paknamtui uh kiza vauvau baan lel hi! A nik bawk uh a sangkhai deuh uh ciang bang ka gei a tute ka hehpih mai hi, banghang hiam cih leh a cil uh na valhvalh uh ahih manin!!
A vekpi vua hong pai deudeu khit uh ciangin mipi mai ah kihelh diamdiam in hong pai leuleu uh a, thudotna hun hong tungta hi. Kei bang Zolia No. 3 na Lia Vung Saan Cing dongkha ka hih manin ka angtang gawp mai hi. Dongkha cih ciang amau lai dok in koh nambat tawh a kituak penpen a kidong hi a, aman kei nambat dok kha hi. Ka dotna bel tomcik hi.
Dotna: Tuni i Khuado zat nuam na sa hiam?
Dawnna: Nuamsa mahmah ing.
Dotna: Tua ahih leh, Zomi te’n Khuado zat toh zel hoih na sa hiam? Banghang in?
Dawnna: Zomi te’n i Khuado zat toh zel hoihsa mah ing. Banghang hiam cih leh i Zongeina i kepna leh Zomi i hihna a kiciamtehna khat hi a, pupa ngeina i kepna leh i Zongeina a thupina a kilahna zong hi. Ka lungdam.
Mark 100 lak pan mark tampi ngah pah hi. Dotna in a deihna pen Khuado bang hi a, Khuado zat a manphatna bang hiam? a ci nuam ahi hi. A dawnna zong hoih a, zong dawngkha in, themkhat sau deuh lai leh cih a dongte deihna ahih hangin a lamet dawnna leh a zaknop thu genkha veve ahih manin a dawng siam mawhlo leh Zomi ngeina a thei numei khat hi cih kitheipah hi. Zolia khat in i Khuado, Sialsawm, Zomi Nam Ni cih khawng a kicing takin theilo a Zolia kidemna khawng hong kihel ding uh a kideihlo, a kilamenlo ahi hi. Tua manin Zomi ahih na a kithei takpi hiam cih telnopna zong hi a, Zolia in tel hi in a dongte in thei pah uh hi. Tua manin a mark tam piak huai pawl hipah hi.
Zotaangte zong tua bang mahin kidong a, Zomi Nam Ni zat zel a hoih hiam, bang hang Zomi Nam Ni thupi hiam cih a kidot ciangin a dawng theilo Zotaang kidemna ah kihel khawng zong na om veve mawk hi. Pawlkhat ta leuleu pen Zomi te mailam ah bangci kalsuan leng kikhangto baih ding hiam cih bang a kilawm taka hong dawng thei om leuleu hi. Zomi sungah khangno thungaihsun pipi om hi, cih ahi hi. Zolia khat bang Zomi numeite lapsangna dingin bang sem ding na hiam? ciin a kidot ciangin a gen ding bei theilo phial hi – pilna guan ding, khutsiam sinsak ding, cidamna thu hilh ding cih bangin a kicing takin a numeipihte lapsangna ding khawng na ngaihsun khin tek uh hi.
Tutung Zolia leh Zotaang kitelna ah dotna leh dawnna te pan ka lungsim ah hong om thu khat pen nidang sangin tu khangah khangnote in minam leh gam khantohna ding, mimal leh innkuan khantohna ding, pawlpi leh khuasung khantohna ding bang kisam, bangci sep ding, kuatawh sem ding, koi pan kipan ding, cihte nakpi in na ngaihsunta uh, thu na kan mahmahta uh hi cih ka mu hi. Pawlkhat bangin Zolai thu leh Zokam thu, Zomi te gamdang tunna thu, Zomi te galkap suahna thu banah leitung thupiang tuamtuamte hangin Zogam leh Zomi in a kiginkholh ding thute kicing takin gen thei uh hi. Zomi te thumuhna, thutheihna leh thutheihnopna khang mahmahta, mi tate pil mahmahta hi cih kimu hi. Zomi te mit kihumcip sak nawnlo a, khua mu nuam peuh leh a mit kihongta, khuadak nuam peuh leh mualsang dawn pan dak theita, thugil kan nuam peuh leh laibu sim ding kingahta cih hong phawksak hi. Hih bangin a kipaitoh zel leh Pu Lengtong Pauno kammal kawm pak hileng, “Zogam hong paal ding hi”, hong paal hak nawnlo ding hi, tun zong a paalpaal hita hi. I tunna ciangciang pan mainawt lai ni. I tunna ciang en lehang zong i kipatna sangin nakpi in kisangkhaita hi.
Nuam panpan ei guai….
(zop lai ding)
Hau Za Cin
Phuitong Liim
www.hauzacin.blogspot.com
Comment piaknop aomleh...