Tein 100 vai ~ Lian Tuang

Tein 100 vai ~ Lian Tuang

Pu Thomas Khannote innkuan in Covid-19 vai a zat dingin sum Tein 100 piakkhiatna tawh kisai kitelkhialhna lai ki-at le phone mahmah tawh ong kidong ngeingai pian ahih manin a thu om zia kigen beh nuam hang.

1. Tedim zato ah Covid-19 patient om a kicih ciangin Tedim, kawlpi bek hi loin gambup in kilinglawng mahmah a, nek le dawn ding banah zatui zaha bek tham loin innsung vanzat kisam dingte kilei henhan pah hi.

Natna kilawh thei ahihna tungtawnin Tedim le kawlpi ah van zuakna saite kikhak pah lailai ahih manin nek tawm ding a lei nuam mipite kipatau semsem hi.

2. Nek le dawn innsung vai bek hi loin zato lam a kisam van le nate banah zatui zaha bek hi loin hih vai ah akisam bangin a diangkhia a kipiakhia volunteer ( kumpi nasem, hausa upa, khangno, kipawlna,…., )te zat ding muktuam, khutsilna,…, a kisam pen tam mahmah cih pen I theih ciat ahi hi.

3. Hih bangin mun khempeuhah kisapna vive ahih laitakin Pu Thomas Khanno in mipi ading a kisapna mun a zat dingin tein 100 zat ding lunggulhna nei hi.

Amah tawh thu tampi ka kikupna uh ciangin hih Tein 100 pen tu laitaka mipi le zato lam, kumpi lam le khuasung vai kisapna peuhpeuh ah zang ding hi leng cihtak hetlo ding ahih teh

• A – Covid-19 hangin mipi sungah huantawm ding antang bei a omleh tuate ading kiging khol ding.
• B – Antang hamsatna, khua le tui khat peuh a om zenzenleh amanlang theithei in antang hawm pah ding
• C – Antang man a khan leh a met la loin zuak kik ding.
• D – Antang bei antang om nawnlo cih thu a omlohna dingin antang kiging khol ding
• E – Antang vai ah mipite a lung muan theihna dingin hanciam ding

F – Zomi sung leh Tedim khuapi sung mahmah ah Teih 100 sangin a tamzaw nangawn apiakhia zo ding mi tam mahmah a,tua te khat le khat kithanop suah zawhna ding

cih bang ngaihsutna siksan in antang vai kitangsapna mun peuhpeuhah zat dingin kigel hi. Thu dangdangte ah kisamlo cihna hi loin antang vai ah dongtuahna khat peuh a om zenzenleh mipite I kitodelhna ah noptuamna tawmkhat bek a om nading hanciam ding cihna hi hi.

4. Antang kisam khempeuh kipanpih ziahziah ding cihna zong hi pah loin Pu Thomas Khanno tungtawnin mipi tangpi tangta ading antang Tein 100 man kinei kingkeng hi cih ahi hi.

Mipi zat theih ding antang tampi a kibehlap lai nading le a langkhat lamah hih antangte a lamen a lunggulh dinmun I tun lohna ding zong I thu ngetna hi sak ni.

Tua ahih manin hih sum tein 100 pen emergency vai nasepna dang khat peuhpeuh le kipawlna khat peuhpeuh tungah kipiakhia loin antang vai kiginkholhna in kizang hi cih kitangko nuam hang.

Hih antang vai kiginkholhna ah a lunglut akua mahciat in mapang khawm ni. Antang vai ah Tedim pan bek hi loin kawlpi le mun tuamtuam pan mi khempeuh in i hih theihna ciat tawh mapang ciat ni cih kizawn beh nuam lai hang.

(Covid-19 vai ah Pu Thomas Khanno in sum zatna dang tampi nei lai kha thei dinga, ahi zongin kei telpih pen hih Teih 100 vai bek ahi hi.) Lian Tuang