Malaysia ah naupang deihdandan kileithei cizen veh aw

Malaysia ah naupang deihdandan kileithei cizen veh aw

Malaysia gampen naupang zuakna phualpi khat hi ci’n Al Jazeera News te’n Friday ni in suahkhiamawk uh ahih manin kumpi thunei te nuamhetlo uhhi. ‘Malaysian Babies For Sale’ cih thulu tawh Documentary khat Al-Jazeera Television Station te’n akhah khiatna vaitawh kisai Malaysia Inspector-General of Police Tan Sri Khalid Abu Bakar in mankhinlo hi cih genkhiatna nei hi.

Thukanpipa genna ah Malaysia gampen naupang kizuak omvetlo bel cihtheih omlo hi. Ahi zongin tua Al-Jazeera te pulakkhiat bangin baihtak in deihbangbang naupang kileithei cihbang omlo hi ci’n gencianna neihi.

Tuaban ah Royal Malaysia Police (PDRM) te’n Ministries leh Agencies tuamtuam tetawh kipawlkhawm in gamsung ah Human Trafficking pen ki limkankhiat mahmah cihzong genkhia hi. Adiak in numei leh naupang tepen amasapen in ki koihden hi cihzong genkhia hi.

Al-Jazeera te pulakkhiat thupiang tawh kisai in kumpi thuneite’n limtak in ki kankhiading a, akisam bangin Action kilading hi ci’n Statement ah pulakkhia uhhi.

Hihvai tawh kisai akicianzaw in Al Jazeera English te ii YouTube panin ki enthei hi. 24 November 2016 ni in Minute 25:50 asau Video khat khahkhia uh a, tuasung ah kicingtak in pholakkhia dikdek uhhi.

Naupang pen deihdandan in kileithei cimawk hi. Bang minam deih? Chinese, Philippines, Indonesia, Vietnam, Burmese, Thai cihbang in deihdandan ki ngahthei cimawk hi.

Tualak ah Chinese pen tammansakdiak uh cihi. Tuaciang in numei sangin pasal pen tammansakzaw uhhi. Aci avom te sangin a ngo piante kideihzaw, kikhawng baihzaw cilai hi. Naupang khatciangin US$1500 panin US$2500 kikal bangin kileithei cihi.

anuai ah YouTube Video zong na enkawmkawm in…

Malaysia: Babies For Sale – 101 East

More: Cuba ah kilaihgawpna a piangsakpa Fidel Castro sita

Hih Video Clip hangin mi honkhat matlehhen thuak hamtangding uhhi. Upmawhhuai hetlo Siavuan pipi leh kumpi nasem honkhatzong kihel cimawk hi. Hun tampi leh sum tampi bei in hihbangthu akankhia Al-Jazeera News tezong thupi mahmah hi. Kawlgam sungah honglut uhhenla, thumanlo nasemteng hong pholak khiagawpleh lunggulhhuai mahmah hi. ZD Sawltak #zomidaily