Tedim Khuapi ah (20 Feb 2015)

Tedim Khuapi ah (20 Feb 2015)

Lai at dan siamlo pipi aa, TEDIM KHUAPI AH cih thulu tawh ka theih
sunsun lai ka at te hong simsak a, tha hong piate khempeuh tungah
lungdam hong ko ing.

TEDIM KHUAPI AH – Tu ni Zomi namni ahih hang hiding hiam aw, khuahun
tawm hong lum in om dan khat bang hong nuam keei cih ding hi. Sakollam
veng a om kimawlna innpi ah zomi namni kibawl aa, tua lai ah mitam in
zong thupi peuhmah cih ding hi. Zan nitak in Shalom te mawtaw neu tawh
Zominamni kibawl na ding thu tangkona zong hong om aa, mi hong lawpsak
tuam mahmah cih ding hi. Tu ni tak bang the Leilum veng teng Leilum
EBC ah, Lawibual veng teng Lawibual Tuiphum ah, Sakollam veng teng
Sakollam Tuiphum biakinn ah cih bangin kikhopkhopna om cing ci-in hong
kitangko aa, khangnote bang lawp mahmah uh hi. Tuni sun in Zomi namni
pahtawina in khua sungah ninbung sawmnih leh khat ZYA- Tedim vaihawmna
tawh kihawm lailai ahih manin Tukum Zomite ih thupi’tna hong kilang
semsem sak lai ahih manin ih lungdam semsem lai hi.

Ka omna mun pan in ka khuadak zel a, kagalmuh mualte ka et the khuamui
kai in mualte bang kitel zolo liangin hong om a, “Galkhua donleng
lenmui kai, huihkhi lang ee, senngaih aw” ci la bang lungsung ah hong
suak a, laphuak siam U Golian bang ka mitkha in ka mu pah keei mai
hi. Hih khuamui kaite aw, April 23 pan kibawl ding Zosuan Tuailai
khawmpi hong muakkhol na hi uh tam ci in ka na lungngai kha aa, ahuh
hong tun teh zong hong siim un aw, ci ka lungsim tawng pan ka na
khokhol a, hong mang ding danin ka lungsim in theihna khat na nei hi.

Khualamte in zong lo hong halta hi ding hiven Tedim khuapi tung
tengah, lohalna holte hong leng diaidiai in lung hongleng sak peuhmah
aa, mundang a om ka mipihte in khuamui kai leh lohalna lengte hong muh
pih le uh ut sing ka na cici a, Zosuan Tuailai khawmpi aw hong tung
mengmeng in ci in ka omna mun pan ka nasamsam khol kha mai hi.
A beisa kal nih lai in, Korea pan cidamna lam asiam te hong pai in,
EBC biakin bulphuh khawnkong in cina vel in thupha tampi hong bawl uh
aa, sum haksa a sate in nuamna tampi tawh innlam hong zuan uh hi.
Zosuan tate koitakteng ah om aa, ei zong ee, ih neihsa te gawmkhawm in
kumkhat khatvei Korea te sepbang sem zolo ding maw ci-in ka na khuisa
kha mawk hi.

Zo Baptist Association khawmpi leh, EBC khawmpi nai ta ahih manin buai
mahmah leh nop ci ding ahih manin Pasian thu sim nuam kisa in Tedim
khuapi a om te kinak lawp mahmah tek hi.

tplian