Tedim gam pan tukum tan 10 laivuan mi 285 pha

Tedim gam pan tukum tan 10 laivuan mi 285 pha cingel veh aw. Cikha ah ava vuanto zong pawlkhat om hih tuak.

Lai vuan mibup:

• Cikha 176
  Tonzang 124
  Tedim 285
  Vekpi gawm 585

Chin state ah township 9 a om lak ah township 5 ah tan 10 lai vuan om hi. Tua township 5 teng pen:

• 1. Tonzang
  2. Tedim
  3. Hakha
  4. Kanpetlet
  5. Paletwa
  Tua teng ahi hi

Covid hang leh Kapvid hang in sangnaupang atamzaw kum 2 kizom in sang akahlo uh suak hi. Akhansan laitak uh ahih man in zi leh pasal anei mangkhin zong tampi omta uh hi

Tukum sang kihon kik June kha ciang tua kum 2 akahlo khinte akah ngam nawn mawk uh diam kaci hi. Akhang khollo tading in bel zumhuai luasam kei ven cin akhang mahmah tepawl bel maizum khathei unteh maw.

Leitung ah mingongtat (terrorist) a kiciamteh Taliban te’n zong hunkhat lai in numeite sangkah ding phallo ngei uh a tu’n bel phal ta nong uh hi. Geneva Convention ah galkidona ah sang leh zato sukkhak loh ding ki limgen mahmah hi

Geneva Convention pen MAH te tawh kipawl peuh ai maitam maw. Zogam leh Zomite’ sungah ki-itna, kilemna, leh lungmuan khamuanna hong omta hen Mung Laan Thang (Yangon)

Tuni tan 10 lai vuanna manta hi

Tonzang pan mi 124 in laivuan in Cikha pan 176 in vuan ahih man in Tonzang gam pan avuan vekpi mi 300 pha hi. Tedim BEHS (1) leh BEHS (2) ah zong laivuan honkhat mah om cih kazak hang mimal phazah taktak bangzah cih kathei kei hi.

Ataktak in Tonzang pan mi 228 leh Cikha pan mi 208 agawm mi 436 in vuan ding in min apiaksa uh ahi hi. Laivuan madeuh in sangpi ah kikapna a om ciang in pawlkhat Lau in Lai avuan ngam nawnlo uh ahi hi

Tonzang sangsiapinu Siama Sawm Niang zong sang ahonlohna ding in thautang leh Lai kipia mah tase leh “Ken hih naupangte’ mailam ding khaktan kei ning” ci’n hangsan tak in sang ahong veve ahi hi

Township Education Officer Sia Thang Sian Mung in zong vauna tampi ngah mah tase leh hangsan tak in khawllo in amaban azom suak ahi hi.

Thupi uh kasa a zahtak huai zong kasa hi. “Ka nuntakna lauhuai hi” cih paulam in sangkhak nuam le uh akingah lua ahi hi CNF leh apawl te’n Senam a Meitei te avakap khit ciang bang un akiim a khuate in tua paulam in sang akhak mang uh ahi hi

1998 kum phawk huai

Galkap kumpi mah ahi SPDC te’ hunlai in siamsin pawipi (Students’ Festival ကျောင်းသားပွဲတော်) ci in kum khat khatvei ta mun tuamtuam ah bawl kawikawi uh hi.

1998 kum in tua Siamsin Pawipi pen Chin state khuapi Hakha ah hong bawl uh hi. Tua kum in Chin state sung a tan 10 te Lai ongsak ziahziah lel uh hi. Tuate sung pan siavuan khawng engineer khawng pawlkhat hong om veve sam hi.

Kum 30 Planning

Tulaitak a kawlgam pilna lamsang kalsuanzia pen SPDC hun lai pek a agelsa uh ahi kum 30 planning tawh apaipai ahi hi. Kua kumpi kua kumpi akah zong in kum 30 acin dong kikhelnapi om paklo ding hi.

Kimetzaw Ding

Ei teng ih kitottot sesang kilem diamdiam leng bel ih metzaw hamtang ding hi. Khanglui te’n “Zawng’ nek ngau in thuak lawh” acih uh ih bat loh ding thupi ding hi.

Hunkhat lai in Chin state bup aukzo te ih hih hang tulaitak khuapi khat a uk AD khat nangawn om nawnlo ih hih lam phawk huai kasa hi.

Ka Lungdamna Khat

Kawl galkap te’n tutung tutna hong lakkik leuleu vua kipan Zogam ah thautawi kipawlna tuamtuam hong piangkhia hi. Kawl te’n eiteng kisia gawp ding in eiteng mah kikap a buaicip ding a ong hawlhawl mah tase le uh Pasian’ thupha tawh tuni dong akilangh tang in ei leh ei kikap nai samlo ih hih man in ka lungdam mahmah hi Ei teng akitawng kineih in na kilem khinkhian leng bel ih galte nak buai inteh ci ing

Hong Thuum Ing

Thautawite hong lungduai mahmah unla na mipih na sapihte uh hong ngim hetkei un cih zahtakna lianpi tawh hong thuum ing Lungdam Mung Laan Thang (Yangon)