India gamsung ah tapasal deihluat manin kumsim in numeino 240,000 in sihlawhden

India gamsung ah tapasal deihluat manin kumsim in numeino 240,000 in sihlawhden

India gamsung ah pasal thupisak luatna “Sex bias” hangin kumsim in tanumei 240,000 bangin sihlawhden uh cih AFP pan kiza hi. Numei leh pasal ki khenluatna “Gender Discrimination” hangin hihbangin numeino te’n thahlup athuak uh hi a, tuabangin asihlawh tepen kum 5 nuaisiah numeino te ahihi.

The Lancet Medical Journal sungah hihthu akankhia Researcher te’n agelhkhiatna ah hihpen naupaai laitak in numei cih akitheih ciangin akiphiatziau bekzong hinawnlo hi. Tuasangin sukzawlai hi.

Numei leh pasal ki deidanna “Gender-based discrimination” cihpen asuahkhiatding ki khamcipna bekzong hilo hi. Asuahkhiat khitciangin hoihtak aki keplohna hangin asi tezong huamhi ci’n hihvai akankhia Studay abawl co-author Christophe Guilmoto (Paris Descartes University) in genkhia hi.

Numei pasal liangko kikimna “Gender Equity” cihpen akibangin sangkah pilsintheihna, nasep theihna, Politic septheihna cihciangbek hilo hi. Asuahcil akipan hoihtak in kikepna, Vaccination hoihtak ki sutsakna, alim tha aomding nektheih kipiakna leh anuntak acidam nadingin hoihtak kikepna tezong ahuam ahihi.

India gamsung ah numei pen kideih masalo ahih manin, pawlkhat in anaupaai laitak in agilsung ah numeino cih atheihleh nauphiatziau uh a, pawlkhat in agai laitak in aphiat keiphial zongin asuahkhiat khitciangin gina keplo, akisam zatui zaha pialo, Nutrition kicinglo cihbangin akhuanung ah asizong tampi om kici hi.

Paris Descartes University panin Christophe Guilmoto leh Study abawlkhoppih alawmte’n hihbangin kankhiatna aneihding uhciangin leitung gam 46 panin Population Data te kaikhawm in, tuatungtawn in leitung ah kumkhatin numeino bangzah bangin bawlsiatthuak, sihlawh cihte hoihtak akankhia uh ahihi.

2000 kum panin 2005 kum kikal in asuakkhia naungek numeino 1000 lakah 19 tepen numeino ahih hangin asihlawh cimawk hi.

Tuapen kumsim in aki tuattoh ciangin naupang numeino 239,000 bangin kumsim in sihlawh uhhi.

Austria gamsung aom International Institute for Applied Systems Analysis (IIASA) te’n Statement akhahkhiatna ah India gamsungah numeino kum 5 nuaisiah asi te ii 22% pen numei ahihhang in asi uh ahihi, Gender bias hang ahihi ci’npulakkhia uhhi.

More: Papi khatin tapasal deihin azi kumkhatsung in nau 4 veitak phiatsak ahih manin sihlawh

India gamsung veve, Northern India huamsung aom Uttar Pradesh, Bihar, Rajasthan, Madhya Pradesh State sungteng ah hihbangdan buaina, naungek numeino asi tamphadiak cisawnsawn hi.

Tuabang in Researcher te’n Study hoihtak abawlna panin India gamsung ah tapasal deihluat manin kumsim in numeino 240,000 in sihlawhden ciliang a, khasiat huai bekthamlo, lipkhap huai mahmahhi. Leitung ah pasal bekbek omin, numei omvetkei lehlah ki cimawh mahmah zelding mataw….. Sawltak #zomidaily