Tanu khat nei hi leng

Tanu khat nei hi leng

“U Thang na tanu gen pian sin aw. Tan 8 bek hi pan zawl lai ngah ta!” “Tua ka tanu khialhna om maw?” “Bang khialh loh na ding! Tan 8 bek pha pan ki hoih sak nuam a ki puah puah a nitum!” “Tua ahoih nop pen mawhna maw leh?” “Nang na cih keh ken ci ta ding kai maw.” “Na om hithiat o Ngaih, ken gen ning maw.”

“Boih” “Hawi Papa” “Ong pai sin aw, na sangkah na a lemlem hia?” “Lem mah ei Papa” “Na nu’n gen hong nei na?” “Kinungak sak lua kio, no cia cia ka phak lai naupang bang a om lai ung ci.”

“Boih nang naupang na hih leh hih loh nang le nang ki thei pen teh. Ko na nu na pa te muhna ah bel nang pen naupang hi den teh. Tun nang zong kum 13 a cing ding hita, nungak nuam ta.” “Ihk kei naupang bek hi pan Papa”

Ka nuihza in nui kha ingh. Naupangte zong nulepa tung hi bang in ki ngek sak thei zel cih thei khinkhian ka hih man hi.

“Boih aw na ki nungak sak nop pen ken hong thukim pih ingh. A ki hoih sakte kizep ki puahna lam ah ki muanna nei pah uh ai ve.Tua aih man na ki hoih sak nopna pen hong thukim pih ingh. Khat na theih ding ah bangcia hoih kul hiam, cih na tel kul masa.” “ Koi dan in maw Pa?”

“Ki hoih sak cih pen ei le ei et lawmna ding a kizepna hi. Boih, nang paak huan khat nei in a hoih mahmah ding a puah zel zel ci pak o. Na paak huan a mu khempeuh in hoih si ae ci a en en le uh na nuam dia?”

“ Nuam ae maw Pa.” “ Na paak huan sung ah na muh peuhpeuh, a lut nuam peuh na lut sak dia?” “ Lut sak lo ae maw Pa.” “Tua le bang na hih kul.” “ Ka paak huan uum in huang bawl ning.”

“Tua dan hi ei Boih, na paak huan a hoih ding a na puah bang nang zong ki zem ding. A hoih paak huan a en en nuam a om mah bang naang hong ki et a hoih hong ki sak ciang lungdam in ki pak in. Aih hang hoih hong sa hong paakta na muh khempeuh tawh ki thuah ken la huang sung ah lut sak ken. Numei na hihna vang tawh na huang um in.”

“Aw leh, Pa” “ Zawl lai hong ki pia ci hilo ahia?” “He” “ Bang dan in na om a?” “ Ka maizum in lau lah lau ingh”

“Ei leh ei Ki muanlohna in maizumna hong piang sak thei hi ei Boih. Nang le nang ki muanglo naih ciang a a zum nai ve. Nang khialhna na bawl loh pi, na zumna ding thu omlo pi Boih. Ong lai piak uh na sang na?” “Sang lo ae Pa, ken taisan ziau.”

“Hansanna pen thahatna tung ki ngalo. Ki upna ki muanna tung ah kinga aive Boih. Nang na khialh loh thute nawk ngam ding, lau aa taisan kullo. Tua dan cih teh phunsan aa paang bet pah ding cihna hilo. Numei khat hihna tawh pilvang tak a nial ngam ding thupi. Awt san, han san lo aa sorry cih kammal khat gen inla pai san lel in. A khut lum hong ngakh khak zenzen uh leh ko na nu le na pa te’n ong leptuah sak ding hi ung.”

“U Thang tua dan thute na gen, naupang te neu thei lai lua ae”

“Ngaih aw, ken ka tan 8 lai tan 8 numeite naupang a mu nawn lo hi veng”

Ka tanu’n hih thu te a zak teh nui hi. Ka tanu’n bang ngaihsun cih ka thei hi. Cidamna lam pan en leng zong hormone ki khel le ih lungsim palang thei a hih lam ka theih sa hi. Tua in mawhna hi kei, a hi ding mah a hi hi. Ka tanu tung ka telsiam ding hanciam ning.

“Boih teengta na ki neih nuam lai na?” “ Ihk cimhhuai lua ae Pa”

“Na neu lai a lah ki mawl nop na sa mahmah a, na teengta ki neihnate kong sel sak le na kap lai ve, na thei lai hia?” “Thei ae maw Pa, tua lai ka kah dan bel…”

“Tua lai a, ngimna tawh na teengta beel te kong sel sak aive Boih. Tua hun lai a teengta bek in ong lungnop sak thei cih na ngaihsut hun lai hi. Neu lai naih ciang a tua ciang ngaihsun zo pan. Ko a ding a thupi hetlo teengta pen nang a ding na thupi mahmah. Tun tuate tawh ki mawl ou ong ci le ung ki mawl nuam nawnlo hi ve cin. Kong sel sak lai heh ngel hi ve cin ma te!” “ Papa bang na cih na ahia? Tel kei sing’.”

“Ong gen ding ae Boih. Tu hun pen na ki nungak sak nop hun, lawm khawng ngaihnop hun laitak hi’n no a ding nop na sak mahmah hun hi ding. Ong kham le ung na neu lai a na teengta kong sel sak lai dan a na heh suak ding, kap ding, ki tom ding hi teh.

Na neu lai a na teengtate bangmah thupilo nang a ding bangmah lauhuai lo aih man na lungnopma ding ci a ong ki mawl sak hi ung.

Tun zong na teengta kong sel sak kik kul ding hi. Tu hun a na teengta te pen nang a ding lauhuai hi.” “Bang ae Pa”

“Ken hidan a deih lo mite gengen thu ka zak te…. Naupang bang a om, lawmngaih nei lo ding, lungsim palang saklo ding cih te pilepu te hun lai pek pan ih zakzak sa hin ken tua dan ong ci lo ding hing.

Lawmngaih nei ken ong ci lo ding hi’ng, tu hun ah lawmngaih nei le cin khial ni teh.

Ong sawl lo ding hi’ng pilna bek ong pia ding hi’ng. Boih nang kong up lai siah sawlzawh thu ong zanglo ding hi’ng itna bek ong pia ding hi’ng.

Nang zong tel ni teh Boih. Lai en in ong ci ngei lo hi’ng, lai et ding a kilawmna thu bek ong gen hi’ng. Na telna Boih?” “Himm telmah Pa”

“Nang pen ko a ding ka mit sung uh ah naupang hi den teh, aih hang kim le paam muhna ah nang pen naupang hi nawn kei teh!

Tua ahihman ki muang in hangsan in! Na numei vang beisak ken. Nang nungak hi ta teh!” “U Thang nanglah ih tanu tua ci liang nai kei aw”

“Ngaih aw ih tanu pen ei a ding naupang khat hi mah hi, aih hang ih tanu pen eigel a ding bek ong piang hilo kim le pam a ding zong a nuntak kul hi. Ei a ding kum theih kul loh naupang khat hi den aih hang kim le pam a ding kum 13 a pha nungak no khat hita”

A tung a thu te tha khat thu in ki gen thei pah kha lo ding hi. Aih hang Pa khat hihna tawh tanu khat tung ag ah hangsak tak le siang tak in gen tel ding ki sam hi. Hih pen mawhna ahih loh lam ih telsiam ding thupi hi. Hih a ma thu a a piang te kep siam kei le hang ama thu a a nung huih te dal siam kei le hang ih gunkuang ki bung ding hi. Huih nun ding ki kham thei lo hi, aih hang ih gunkuang ki but loh ding kem thei hi hang.

“Boih aw nuntakna ih cih in leitung ze-etna tuihual a tuam tuam tung a a laam gunkuang bang hi. A ki but loh na ding ei tung ah vaipuak om hi.”

Kei ngaihsutna hi. Khial kha thei in the ci nawn kei ning. Ta ka neih ciang hi ci bang in ka thuhilh nuam hi. Lai at: Error, Lailet: Sleet