Taiwan gamsung huihpi guahpi in nawk ahih manin mi 4 sikhin

Mawtaw Parking ngahnading in anu in a taneu nisa lakah Minute 20 sung tusak

Taiwan gamsung ah Typhoon Megi akici huihpi in nawkgawp ahih manin zanni Tuesday (27 September) ni in mi 4 sikhin cih CNA News pan kiza hi. Asi tuazah banah aliamzong mi 100 valbang phakhin a, huihpi leh guahpi kithuah ahih manin singkung te pukgawp in Electric meikhau tezong kitatgawp hi.

Hih Typhoon Megi pen Hualien City ah huaisia phadiak a, hihtungtawn in cimawh dongtuak mi Million 2 bang atawmpen phatheiding ci’n thunei te’n genkhia uhhi.

Taiwan Central ahzong huihpi guahpi nasia mahmah a, huihpi pen akhauhna 185 Kilometer per Hour tawh nasiatak in nawksiagawp hi.

Asi te lakah kum 40 aphakhin khatpa pen huihkhauhlua ahih manin mawtaw Accident cihi. Adang kum 65 aphakhin khatpa pen atungpan vankiasuk khatin denglup hi. Adang kum 17 aphakhat pen tuitung tawh gunkuang tawh apailaitak, huihpi in mutkha ahih manin, tuikia in si hi. Adang kum 48 aphakhat lueleu pen inntungkhuh apuah laitak huih in mutkhia ahih manin kiasuk in si hi.

National Fire Agency te genna ah Central Taiwan Highway tungah huihpi hangin Tourist Bus khat kibung a, mi 167 liam cihi. Tua aliamlak ah Japanese Tourist mi 7 kihel cihzong kiza hi.

Central Emergency Operation Centre te genna ah mi 11,000 te aomna panin ki hemkhiasak a, mi 3000 val tulaitak in bekbuk Shelters te ah kikem ci uhhi. Khuasung mite omna inn Million nihval in Electric Power sia ahih manin, mei ngahlo uhhi. Tuaban ah inn 35,000 ah tui sia ahih manin, hamsatna tuak uh cih kiza hi. ZD Sawltak #zomidaily