Taingen leh Tedim kikal mawtaw lampi ~ Khup Khan Thang

Taingen leh Tedim kikal mawtaw lampi ~ Khup Khan Thang

Ih Khamtunggam Mawtaw lampite etkik leh ngaisut kik hun mahmahta kasa hi. Ih lampi puah nading hong kipia sumteng, akizo ngeilo ding, ahoihzo ngeilo ding, acim kikkik ding lampi puahpuahna in beisak ding maw? or Lamthak zon’na in zangh zaw ding? En-in WWII (Japan Gal) a kito lamluite cim ngei nawnlo hi. Tukteh acim ih lamthakte pelhna in kizangh thei lai hi. Attachment ah map ki en thei hi.

Tunai thuthang te ih sim ciangin, lungdam huai leh dahhuai thunih ih mu thei hi. Lungdam huai thu gen masa leng; ZIUSA Newsletter a kisuak sak, Tonzang Myone Pyithut Hluttaw M.P. Pu Kham Khan Thang hong pulak, “Taingen leh Tedim kikal mawtaw lampi kyats 801396 Million (Approximately US$ 600 million) tawh kibawl ding hi” cih ahihi.

Dahhuai thu pen: Fb aa Mizzima News te hong suahsak, “The World Bank has declined to fund the rehabilitation of the Kalay – Hakha Road” a cih pen ahihi.

Tedim leh Tonzang gam aom Taangpi Taangta te, telcing ih M.P. te leh Kumpi lam thunei ulian te tung kogen nop thu in; Hih lampi pen WWII lai a kibawl/to lampi kitamtawt nawnlo-in, lam a phei zawdeuh dinga Road Alignment thak kizong in, 1960 kum khit pawl aa kibawl/to lampi ahihi. Lamphei ding bek kithupi ngaihsut in, lampi khanglam a keen, lamphung lam phung asaang, memcim (land slide), alei tak/kho ding leh sawtvei kimangh ding cihte ki ngaisun keileh kilawm kasa hi.

Tua ahih man’in tuuk hong tun’sim in, Sezang khuakhung leh Saimual kikal, Hawp phei, Khuainuai, Sozang- Sapan, Akluai- Thuklai lamka kikal cih teng lam cim tawntung hi. Bang zah in lamphung lam thuapthum thuapli bangin ih to zong in, phung hong ciim veve ding aa, baan-ah lam nuai lam zong hong cim veve lel ding hi. Set lianpipi te ih zat ciangin zong, akhangno lai ei Khamtung leitang (Kawlpau in Tet Nuh Mie) te set kilawhna tha (vibration) in ih leitang sung khaang (crack) sak aa, kumkik guah hong zu leh lamtung lamnuai hong ciim kikkik lel ding hi.

Ih sum ngah teng (Kyat. 801396 million: naktam, pekkhatlai bekbek in khek in, asumdal in phah phei leng! Taingen leh Tedim tung zo phial ding hi) sehnel lak aa tuibuak mah hong bang lel ding hi. Tua ahih ciang in, ihtu ihtate’khang, khangtampi ih manh nading bang cih ding ih hiam? Hih sum tengtawh lamthak zongin tozaw leng cih ngaisut huai kasa mahmah hi. Hih anuai aa ka proposed lampi ngaihsut huai mahmah ta hi.

Lumlet Kumpi (Tawlanye asuyah) hong kah maa 1958 kum pawl-in Lam Mingyi pa U Lal Bik in, Lawibual zaang pan Leilum khuasung nawk in, Sezang khua ah, Hawp mual Tedim lam kaai mual daang zui in, Sonsing lamka ah mawtaw lampi thakding align-ment khat hong zong aa, tu aa ih lampi sa’ang phei zaw bek thamlo in, Thaangmual ihkal dong Tedim pan mawtaw paisuk paito te zong kigalmuh thei dingaa hoih mahmah ding hi. Tua Road Alignment zong tuni ciang dong khelam in kizangh thei lai hi.

Songsiing lamka pan, Kennedy peak ah kahto nawnlo in, Thuamtuilii dek ah, Sapan-Zozaang lampi tawh kimat na ding alignment thak khat zong lai leng lampi phei mahmah ding aa, Tedim pan Kalemyo tai 40 zong pha nawnlo ding hi. Tu aa ih lampi sa’ang tai 20 tomzaw ding hi. Kum sim aa lampi cimna Hawp phei, Sozang kiang, Akluai gei, Taingen khua taw, Aicik paam, teng kinawk nawnlo ding aa, Tuuk tawh Khaal tawh Tedim leh Kalemyo noptak, baihno tak in kipai ziahziah ding hi.

Red line– A kitosa Sapan- Zozang lampi: Black line– A kitosaan’ Tulsuk- Pimpih- Laibung Ayanlan lampi: Blue line– Lampi alignment kizongsa tawhding bek a kisam lampithak. White line- Tulaitak aa kizangh lampi.

Kalay leh Hakha lampi pen, alungkiat huai mahmah lampi khat hi gige hi. Taingen khua khang lampi bang a mual bup aa tokek maang zo ding ihhi kei leh kicim den ding hi. Bek thamloh tuahsiat naang’ mun (Accident prone area) hilai hi. Suahlim-Bekan kikal bang zong lampi nuai ken mahmah aa, luahuai mahmah hi.

More: Tedim khuasung lampi vai: Gen kikkik mah leng

Falam leh Hakha kikal zong tuksim lamcim hi denkeei lai hi. Tua ahi ciangin hih lampi zong Kalay leh Falam kikal lamthak zong leh hoih zaw lai ding hi. Kalay- Webulah- Vaal lampi bang hoihtak kibawl leh Kalay- Falam tai 60 zong pha lo ding aa, tai tampi noptuam ding hi. Gam leh minam ading’ deihsakna lianpi tawh, Khupkhan Thang Taithul (Norman, Oklahoma, U.S.A. November 3, 2017)