Syria ah Ceasefire kipalsat semsem, huhna vanpua mawtawte Bomb kikhiat

Syria ah Ceasefire kipalsat semsem, huhna vanpua mawtawte Bomb kikhiat

Sept. 20, 2016: Sept. 12 panin ni 7 sung ding Russia leh US vaihawmna tawh Syria ah cease-fire thukimna kumpi leh rebels ten suai na kai uh a, rebels ten hih hun sungin ceasefire 300 vei palsat in, Kiginni in US ten Syria galkap 62 tung lam panin kaplum in, galkap 100 val a kapliam manun ceasefire palsatna nasia semsem a, zan in tung lam panin huhna van (humanitarian aid convoy) puakna mawtawte kikapsak a, mi 12 in sihna tuakin, a site a tamzaw pen mawtaw hawlte leh huhna nasem Red Crescent kicite’ nasemte hi ci-in Syrian activist ten gen uh hi.

Russia in cease-fire pen rebels ten a palsat manun a hun kisot beh to thei lo ding bangin om hi a cih hangin US ten ceasefire hun sungin kikaptuahna mun pawl khatah a om zeuihzeuh hangin a hun sot beh to lai dingin mansa in om hi ung ci-in gen hi. Zan nitak a Aleppo sunga huhna mawtaw kapte kuate hiam hiam cih tu dong kithei nai lo a, ahih hangin Syria, Russia leh USte vanglengte Aleppo ah ISte kapin nak len’ mahmah uh hi. UN ulian ten Aleppo province sunga om Uram al-Kubra khua ah huhna van tuamtuam mi 78,000 adingin UN leh Red Crescent ten mawtaw tawh kipuak hi ci-in pulak hi.

Syrian Observatory for Human Rights (SOHR) in zan-a Aleppo ah huhna mawtawte kikapna sihna tuakte a tamzawte pen mawtaw hawlte leh Red Crescent nasemte hi ci a, Syrian Civil Defense in a site lakah huhna pia dinga kipia khia White Helmets kicite zong kihel hi ci-in gen hi. Humanitarian aid coordinator Jan Egeland in UN zum panin a genna ah huhna van pua mawtawte pen bom kikhiat a, mawtaw 31 lakah 18 kha a, tua kiim-a om Red Crescent-te’ vankoihna (warehouse) zong dengsia hi ci-in text message in Associated Press-te kiangah gen hi. Huhna van puakna mawtawte pen Syrian Red Crescent kicite aa ahi hi.

Zan mah in rebelste ukna Aleppo khuapi tung lam panin kikap a, nautang 20 kiim in sihna tuakin, sihna tuakte lakah kum 1 a upa numei khat zong kihel hi ci-in SOHR in gen hi. Rebels ten ceasefire hun a bei ma-in Syria kumpi’ vanleng ten rebelste ukna sung bomb a khiatna hangin nung kalin mi 22 kiim si hi ci uh hi. Ahih hangin Syria kumpi in ceasefire sungin nautang kikaplum kha hi cih kumpi’ ciamtehna sungah kihel lo hi ci hi. Source -The Hindu/ Thang Khan Lian