Akhutme hoihtak atangtheilo khat akhuaksung Surgery akibawlkawm Guitar kitumsak

Akhutme hoihtak atangtheilo khat akhuaksung Surgery akibawlkawm in Guitar kitumsak

India gamsung ah pasal khat akhuak “brain surgery” aki bawlsak laitak in midangte tawh kibanglo (unusual procedure) in Guitar tumkawm hi. Tuapa minpen Abhishek Prasad kici a, Neurological Disorder kici natna namkhat hangin akhutme te hoihtak tangsak theilo cihi.

Abhishek Prasad pen kum 37 phakhinta a, abeisa inzong Specialist Doctors tampitawh kilak kawikawi in ahih zongin damsiang cih omtheilo hi.

India, Bangalore khuapisung aom Bhagwan Mahaveer Jain Hospital kici zato panin akhuaksung Surgery bawlding khentat uh a, ageina abattheih nadingin “musician’s dystonia” kici ageina abatkiktheih nadingin Music tumkawm in Operation bawlsak uh cih AFP pan kiza hi.

Operation Theater sungah Surgeons te’n ana aphawkloh nadingin Anaesthetic sunmasa uh a, tuakhit ciangin aluguh “Skull” pen vutvangsuk uhhi. Tuabang in Surgery abawlkawm in Electrode thuahsak in, Guitar tumkawm a, koimun koi khutme te bawlding kisam cih enkawm uh cihi.

Operation akibawl hunsung khempeuh Abhishek Prasad in khuaphawk a, ahi zongin Anaesthetic kisun ahih manin ana phawklo hi. Guitar atum ciangin hoihtak akhutme te’n lentheilo ahih manin, Surgery akibawlkawm in Guitar kitumsak a, koimun in hoihtak nasemlo cih Surgeons te’n enkawm uhhi ci’n Thursday ni in Dr. Sharan Srinivasan in Statement ah genkhia hi.

Video: Patient plays guitar during brain surgery in Bengaluru

https://www.youtube.com/watch?v=XtmOG6E1zdo

Tuabang in Guitar atumkawmsak pen Doctors te adingin koimun koisan in nasemlo cih kitheipah ahih manin Surgery bawlzia lemmahmah cihi.

Operation akibawl hunsung pen nai 7 tak sawtin, tuasung in cinapa Abhishek Prasad in Guitar katumkawm cihi. Operation Table tungah ka omsungmah in kakhutme te hoihtak kizangkik theipah ahih manin lamdang kasa mahmah hi. Surgery amansiang ciangin kakhutte 100% angei mahbangin kizangkik theita hi ci’n Times of India Newspaper te tungahzong Abhishek Prasad in genkhia hi.

Nung Thursday ni in Bhagwan Mahaveer Jain Hospital ah akikhuina khauzang te aphelkhiading in zato ah Abhishek Prasad paikik a, Surgery abawlsak Doctors te tungah lungdam kokawm hi. Tuaban ah akhutme te hoihtak nasemta cih lahna in Guitar zong mipi maiah tumkawm cih kiza hi. Sawltak #zomidaily