Supna Lianpen!
Itna in nuntakna picing sak a, nuntakna bulpi zong hi in, nuntakna zong ahihi. Itna lotawh nuntakna omlo a, tua ahih manin, itna anei lo, itna athei lo te ii nuntakna in picing ngeilo in, si lah nungta gamkeu na po lingkungte tawh kibang hi. Pasian in nuntakna apia pa, anei pa leh anungta tawntung pa ahih man in, “Pasian in ki-itna hi” (1Jn 4: 8, 16) ci in, Laisiangtho sungah na ki gelh hi.
Hih thuhangin, itna anei lo te, itna athei lo te, itdan asiamlo te leh mite tungah a it theilo te leitungah ahi a, vantungah ahizongin mi hamsia pen te hi in, supna khempeuh lak ah itna i supna in supna lianpenpen ahihi. Nisim i nuntakna ah itna bangci kisup theihhiam cihthu lungngaih huai hi. Hithu tampi lak ah tawmkha i ending hi.
Itna i sup theihna thu te in:
(i) Hong ki-it lam itheih khak loh man,
(ii) Hong it mi te i-itkik theih loh man,
(iii) Hong it mite thupi isak loh man leh hongit na i sansak loh man,
(iv) Hong it mi khat ii hong itna i theih loh man leh, i upzawh loh man,
(v) Itna pen eilungkim na sa kha in, hong kilungkim sak kei leh hong it lo i sak man,
(vi) Itna pen ngahna sakha in, i deih, i ut ngah kei leng, tua itna tungah muanna nei nawnlo in i tai san pahpah man,
(vii) It na in nuntakna ahih lam phawkkha lo in, itna tak tawh ei nuntakna mailam ding hong kihilhna, hongki genna te tungah i sankhialh na thu te hang leh i telkhialh den man, cih thu te in, itna sungah, itna tawh itna hangin leitung ah i nuntakna apicing ding ahih napan hong lehkaih khia den hi. Adang tampi zong omlai kha ding hi.
Hicibang thu te hangin, itna man i suplawhden a, supna khempeuh pan supna lianpen ahih lam i phawkkha thei kei lai hi. Itna in nuntakna hi a, nuntakna pia in, nuntakna picingsak ahih manin, ki-it na man in atawntungin ei deihbang, ei utbang, ei lunggulh bang hong hiden lo zaw in, ei te mailam nuntakna ding, mai lam nuntakna apicin nading leh ahoih, anuam nuntakzia ih neih theihna ding in, thu honghilh in, thu honggen in, hongtaai thei ahih manin, tua itna pen eite utthu bek, deihthu bek masuan in i taisan khakloh ding athupi penpen ahihi. Itna in ciangduai tawh sat bang thei a, asangsiam te in picin na leh nunnopna gamhluah na in nei uhhi.
Hih thu hangin, itna deihsakna leh khualna taktawh hongki gen thu te tungah lungsim siangtho vabang pil in, cimna
leh ngaihsut picinna te paaitem bang kuah in, zingdai tui bang in ih muhna zia te cimsak kilkel in, tuitanglo thuk aki cih bangin, ih ngaihsutna te thuthuk sakin, i lenna peuhah thalbangzang in, sepna peuhah lawhcing a, tuanna peuh etlawm in, hei napeuh nunnuam a simlei nunna azek, azang te ihih theih nading, itna i ngahna ahi, i nu i pa, u le nau te, lawm le gual te, lawmngaih gualngaih te tawh khaubang kizopsiam in, khat le khat pakbang kitawi siam ding thupi hi. Itna man i sup na in, supna khempeuh lak ah alian penpen supna ahihi.
Rev Fr Damian Dal (Nimdildial)
Leuven, Belgium
10 Jan, 2015
Comment piaknop aomleh...