Sunglampan kipan ahihding kisamhpa ~ Lengtong Pauno

SUNGLAMPAN KIPAN AHIHDING KISAMHPA

Nisim a igamtat kampau duangheekna khempeuhin igilpi tha pan ahi hi. La isakciang’zong igilpi thapan sa in, i performance te zong ilungtangpan hi leh zaknoppen etlawmpen hi.

Topa hoih hi, Topa lian hi, icihte zong, ilungtanga iveiina pana aci ihihding akisamhpa pen ahi hi.

Kahau zo hi, ci a a awngawng khatin, apualama akimuthei khamlengun sumlepaai te lunggulha acici hilo in, bangci bangin anungta phialzongin, zawn’na ngauna’ tunga agualzawhna a awngawng ahihding akisamhpa pen ahi hi.

Kadam zo hi, acici te’nzong, natna zawngkhal’na tungah thuumthuum tautau phunphun nawnlo a agualzawhna a awngawngh, acici ahihding akisamhpapen ahi hi.

Apiang khempeuh tungah lungkim theihna hongpia in Topa aw, acici te’n zong, nuntakna sungah, agualzo lungsim tawh anuntakding akisamhpa pen ahi hi.

Keizong, 2018 apat- agualzonuntakna tawh nuntak akisinta kahi hi. Topa’ sungah, agualzo nuntakna tawh nungtazo lehang, i omomna munin, anuampenpen gamthumna zong ahipah ahi hi.

Ka lungdam, Munkhai’pa

ONGKIPHATNA SANG’ ONGKIGENSIATNA PEUH MANHNEI ZAW ZAANZAANH

(kei’ adingin kacihna hi)

Ongki phatphat lepeuh ei le ei ahitakpi peuh kisa in, atawptawpna asawtsawtciang peuh, hi kisaknapan – ki hihsakna, pha kisaknapan – ki phatsakna peuh hong suakkhia thei zaanzaanh.

Ongki gensiasia lemaw, vial mahmah, no’ kei, hong tuaci muhvial maw…sala… No’ sang’ ka hoihzawk ka gitnatzawk mateng, no’ sang’ Pasian maipha kamuhzawk mateng, cih banga kipuahphatnopna neinapi a, a ihmu lungsim hong khanglo in, khan’tohna a neihlawhzaw zaanzaanh.

Ka lungdam, Munkhai’pa

Video: “Zomi ka hihi” cih aphuahna banghang? ~ Lengtong Pauno

https://www.youtube.com/watch?v=QtAhJY2hDcQ

PAWLPI MITE’ NUNTAKPIH DING

Rom 12:6 – 8. Pasianin hehpihna hong piakkhongna tawh kizui in isiamna atuamtuamte zangciat ni. I siamnapen Pasian thugen theih nading siamna ahih leh, i upna neih- zah tawh kizui in genni. Nasep nading siamna anei ihih leh, naseem ni.

Hilh nading siamna anei ihih leh hilhni. Mi dang hatthot theih nading siamna anei ihih leh, midangte hanthawn ni. Midangte hop theihding anei ihih leh, citna taktak awh hawmni.

Makaih theih nading siamna anei ihih leh, hoih takin seemni. Midangte hehpih theih nading anei ihih leh, maitaii takin hihni.

Ei’mun ei’siamna ei’sepding ciatbekmah seem lehang, pawlpi cidamin khangto ding hi.

Ka lungdam, Munkhai’pa