Hiroshima le Nagasaki ah Enola Gay ii gelh tangthu ~ Peter Suumpi

Hiroshima le Nagasaki ah Enola Gay ii gelh tangthu ~ Peter Suumpi

‘Enola Gay’ cih min pen tua ni zingsang aa hong leng B-29 Superfortress vanleng hawlpa ii nu min ahi hi. Vanleng hawl galkap bu pa ahi Paul Tibbets in ama hawl vanleng pen anu min apiak ahi hi.

1945 kum August 6 ni zingsang lam in American gal vanleng khat ahi Enola Gay pen Japan gam, Hiroshima khuapi kantan aa aluang, gundung zui in hong leng hi. Zingsang nai 8 le minute 15 hun tua vanleng ii awmpi hong kihong hi. Tua khan sung pan bomb tangkhat Hiroshima khuapi tung ah hong kiasuk hi.

Enola Gay in bomb akhiat khit ciangin vanleng hawlpa Paul Tibbets in avanleng asanna lam ah lengto sak hi.

Sau veilo hi. Second 60 acin ma in Hiroshima ii zingsang phalvak hun pen tung sunni apuakkham bang in khuavak pi khat hong tang hi.

Tua khuavak pen vakpha lua mahmah ahihman in Enola Gay tung aa tuang galkap khempeuh in nidalna mitlimlang te abulh uh hang in amit uh mang sak zo lai veve hi.

Second tawm no khit ciang in puakkhapna ii hu in hong zapin tai tampi agamlatna mun aa aleng Enola Gay vanleng pen atung ah bawngtal kitom khat aom bang in hong kisiing gawp hi. Vanleng hawl ahuh Robert Lewis in anuai ensuk in “Nu aw Topa, ko bang hih kha liang kei vua” ci in kiko khia hi.

Ataktak in amau bang mah na lamdang asem hi peuhmah lo hi. Angeina mah bang in bomb tang khat akhia uh ahilel hi.

Ahizongin tua amau khiat bomb pen leitung ah akikhia masa pen nuclear bomb ahi hi.

Thuthang gelh sia John Richard Hersey in “kimlepam khempeuh ah akang pha mahmah khuavakpi hong tangzal khit teh Hiroshima khuapi pen laidal kangtum bangin vuklevai suakkhin hi” ci in aminthang ama laibu gelh ahi ‘Hiroshima’ laibu sung ah nagelh hi.

Tua akangpha lela khuavak pi hong tang khit aakipan leitung pen hong kikhel pah vilvel hi. Hiroshima khua mi te tuahding thu, leitung galpi nihna ii lampi, athu nung ah hong piang ding galpi nihna ii kilemna thuvai, scientist te mailam vai, galvan lam pilna tawh kisai thu te le nuntak khuasak zia muhna te hong kikhel vilvel hi.

Khang tangthu sung aa mipil misaim te, thuhilhsia te, salpha te pen hun ciaptehna in hong kinei to hi. Buddha hun, Jesu hun, Plato hun, Alexander hun, Napoleon hun, Victoria hun, Industrial revolution hun, socialist hun, democracy hun cih bang in …

Ahizong in nuclear hun pen galvan khat, ki lauthawnna khat, alauhuai hun khat cih ciaptehna in kinei hi. 1945 kum August 6 ni aa kikhia nuclear ii meiivom pi in tuni dong leitung hong tuam lai hi. Tua hun aakipan khangtangthu gelh siate, gamvai pulitik siate le laigelh siate in tu laitak khuahun pen nuclear khuahun ci in min pia uh hi. American lakam gelh sia khat ahi Ogden in nuclear bomb kikhiatna hangin adah akap mi te amuh teh tuhun pen ‘sinkham hun’ ci in min pia hi.

Hiroshima ah bomb akikhiat ni zingsangin kum 11 apha Yoshitaka Kawamoto (1932 -2002) pen amau veng sanginn khat ah sang akah laitak ahihi.

Sanginn atun ciangin alawmte tawh asak ngei uh la sa khawm uh hi.

• Hiroshima ii nitak khuamui
• Vukkang te hongkia in
• Paakpalh te tung ah hong tu uh
• Khuakal veng ding hita
• Ahihhang in ei te ih hihleh kiptak in ihding ding hi
• Diamdiam nopsakna sung mang te
• Taksuah sak ni

Kawamoto in alawm te tawh sanginn ah sakloh aphamawh thapiakna la khat ahi hi. Ala abeima in vanleng ging aza uh hi.

‘Lasak ka man khit uh ciang sangkhan sung ka lut uhleh ka lawm khat in ‘endih ve vua B26 bomb apua vanleng hilo maw’ ci in hong gen hi. Kei zong munuam in tawlet gei nek ding in ka ding laitak khuavak pi khat hong tang in angeih mahmah aw khat hong ging hi. Tua khuavak pen khuaphelep tawh kibang hi. TV asiat ding ciang in atangzal khuavak tawh kibang hi. Tua khit teh keizong khuaphawk nawnlo’ ci in Kawamoto in gen hi.

Tua hun pen 1945 August 6 ni zingsang nai 8:15 hun.

Tua hun aa kum 11 apha Kawamoto in Hiroshima Peace Memorial Museum ah (1983 -1994) sung director sem hi.

Khuavak lianpi kamuh teh khua ka phawk nawn kei hi. Tuakhit teh Hiroshima ii nitak khuamui vukkang te hongkia in cihla ka lungsim sung ah hong om in tua khitteh ka lawmpa Ota ka phawk hi.

‘Tua hun lai in kei tua sanginn atungcil kahihman in lawmlegual tampi ka nei kei hi. Ota tawh ka kikhawl uh hi. Bang hang ciam cihleh amah zong kei mah bang in tha tom ahihman ahi hi. Sanginn khan sung ah zong ka tukhawm uh hi. Ota pen ka pimuh mahmah hi. Kei ka hihleh khuata pan ka hihman in khuapi mel apua Ota ka pi-et phadeuh hi. Amel hoih in thusiam hi. Kei bang in anak pek lo hi. Nitumna lam mite bangin anak tawn zilzial in pau leh aw un hi. Pasal vai ka sa mahmah hi.

Ka omna uh sawm-inn mei kang ahihman in apua lam ah ka pusuak hi. Ota pen asung ah om lai hi. Apua lam kimawlna tualpi meikhu vom in tuamcip hi. Tualpi sung ka tun ciangin ka tai nading mel ka thei kei hi. Ka kim ka pam ah meikuang in hong um cih hi. Akitam ging te, acimh ging te tawh ka kim teng gamlum henhan hi. Tua laitak in taklam ah tai in, taklam ah tai in cih aw khat ka za hi. Kei zong sehnel khutpham khat pham in van ah ka lawnto hi. Bang hang tua bangin hih ka hiam cih tu dong ka ngaihsun zo kei hi. Ama thu in pham in alawnto hi mai ing. Tualpi sung ah misi tawh, liam in awng awng tawh kidim hi.

‘Tua laitak in ka sangsia pipa uh ka galmuh hi. Amah pen apumpi in mei in kang khin gai hi. Amel kitel nawnlo hi. A-aw bek in athei lai ka hihi. Asilh aten cileng asungten pek om lai hi. Aman leng khat hong sawn in tua tung ah aliam ka lawm te hong pua hi. Ahizong in leng sawn theih nading lampi omlo hi. Misi te tung tawnsak in ka sawn uh hi. Mi liam pawl khat in leng tung ah ut in akhut uh hong khakkhak uh hi. Ka khe hong len in hong hon vevua ci in ki ko uh hi. Ahizong in ka honkhia zo kei uh hi. Leng tung ah midim khinta hi. Asawtlo in meikuang kawm pan ka suakta uh hi. Ka pam ah sathau bung na om in tua sungah puasia diah in meikang ka lawm te liamma te tung ah ka belhsak hi. Leitang zong salua hi. Vutsa lak sik tawh kibang hi. Tua apuakkham bomb in alumna 3000 centigrade ahih kei leh 5400 Fahrenheit bang piangsak ahihman ahi hi. Hih alumna pen siktuisak nading akisam lumna sang in azah nih in sa zaw hi.’

Kawamoto in tua ni Hiroshima aa hell khuk thu hoihtak gen kik hi. Sa lua mahmah ahihman in gun gei ah hong tai uh hi. Asai pa koi lai nusia kha cih athei nawn kei hi. Lampi ah misi luang te, meikat mi te, mi liam te awng ngeingai uh hi. Akhe ngawng pan alen miliam zong pawl khat om hi. A-am(Lung-am) tai zong om hi. Apumpi tung aa apuan te uh ki-kek mangkhin hi. Vut tawh kidim hi. Anu nawi atep naupang sikhin khat amu hi. Kum li gual apha ding naupang khat anu in akhut tawh neng in phawngphawng hi.

‘Mayuki gunlei gei ka tun ciangin ka lawmpa Kimuya ka mu hi. Bomb kikhiat laitak in amah sanginn hong tung nailo in lampi ah om laitak hi. Amaitang khempeuh vom hi. Amah pen Hiroshima khua ii nitumna lam ah om hi. Inn ciah ning ci hi. Bomb kiatna mun apai sawm ahi hi. Pai kei in, tua lam kipai theilo hi. Meikang khin hi. Sa lua ding hi ka ci hi. Ahihang in amah pen am(lung-am) gawp khin ta hi. Inn ka ciah ding ci in pai teitei hi. Ahizong in ah innkuan pih te kangvam themcik na ngawn amu kha kei hi.’

Gal hun sung kangmei patau ah om leh kiginna in tuikholna tuibempi kibawl hi. Kum khat sung bang tui akikhawl ahihman in tui siangtho lo hi. Kawamoto adangtak hi. Tua ahihman in tuibempi gei hong neh hi. Ahizong in tuisung ah apum lang kidiah misi te amu hi. Tua tui dawn ngam nawnlo ahihman in gunleipi lam zuan in hong pai hi. Gunlei gei atun ciangin gun gei ah suang kahlei te tung tawn in hong tuaksuk hi. Tua suang kahlei tung ah zong misi luang tampi na kisial hi. Tua misi luang te palsuk in tuigei aneh hi. Tui adawn hi. Ahizong kidawn theilo hi. Gun tui sa lua hi. Tua ahihman in leitang botung lam ah abawhsa in hong kahto kik hi.

‘Leitang tung ka tun teh ka thal lam in ka kipai pah hi. Leitang zong vutsa bang in sa hi. Vantung lam ah meii vom meimai kimu hi. Tua meii te kawm ah khuaphelep bang in mei-am tang laklak hi. Aw … ka nu le ka pa te cikmah in mu kha nawnlo ding hita ing maw ka kici hi. Tua pan khua ka phawk nawn kei hi.’

Tua ni sun bup aman khuaphawk nawnlo hi. Nitak nai 7 kim, khua aphawk kik ciangin amah pen donghu cina kepna buksia sung khat ah tung hi. Anulepa koi ah cihlah thei lo. Si maw hing cih zong zakha lo hi.

August 11 ni in donghu cina kepna bukno sung ah anu tawh lam-et lohpi kimu kha uh hi. Anuta un kipom in kap uh hi.

‘Ama sa penpen ka kahni ahi hi’ ci in Kawamoto in gen hi.

American laigelh sia David Bergamini in hihbang in ciamteh hi.

‘1945 kum, August 6 ni in nambat 509 gal vanleng pawl sung pan Enola gay vanleng in ‘Little boy’ akici atawn ziuziau sikbung khat hong pua hi. Tua sikbung sung ah uranium 235 them neng atamkhop kiguang hi. Tua pen uranium atomic bomb ahi hi. Tanian galkap phual pan nai 6 le 30 hong len khit teh Hiroshima ah zingsang nai 8 le minute 17 hun in hoihtak akigelsa tua bomb pen huihlukhu tawh hong kiasuk hi. Vanleng hawlpa Paul W. Tibbets in avanleng ahat thei pen in Hiroshima khua pua lam ah hawl khia hi. Minute 2 sung in tai 15 atungman Enola Gay pen hong kilawk hi. Vanleng hawl huhpa ahi Robert Lewis in vanleng lenna ciaptehna laibu sung ah ‘Topa Topa’ cih laimal bek gelh zo hi.

‘Bomb pen Hiroshima mitumna leilu lam vansang dawn pi 1500 na, van dum dide laizang ah phuakkham hi. Azaina pi 250 apha meikuang pi khat vantung ah hong kikhai hi. Tua khit phet in Japan mipi 64,000 mei in kangtum hi. Ahihkei leh vuklevai suak uh hi. Tua pan Japan mipi 26,000 mei in kang hi. Liam uh hi. Neutron le gamma rays te hangin anai anai, ani ani, akha akha, akum akum in mi si hi. (Tu ni dong ciang hih te hangin mi si lai hi.)

‘Bomb khiatna hangin tai 100 kim kot teng ah khuavak pi khat hong tangvat hi. Tai 10 pan akiza puakkhapna ging(ahu) hangin Hiroshima khuapi sung pan taih inn 6840 kicim hi. Khua laizang tai khat kimkhot ah meikuangpi piang hi. Lei maitang tung ah meikat misi te, inn le lo te ii vam te vantung lam ah hong lengto in mei-ek vam in leitung ah hong kaisuk kik hi. Meikhu vom meii lompi te huih vok tawh hong kimuh ciangin damdam in huih hong khauh semsem hi. Bomb puakkhap khit nai khat le nai nih kikal sung in tua huih vot te hangin huihpi hong kipei hi. Tua huihpi hangin meikuangpi pen meihualpi hong suak hi. Tua meihualpi hangin akim apam aa om na khenpeuh vutlevai suaksak mangkhin hi. Hun tomno sung in tua meihualpi pen tai 4 huam sung cia bangin hong lian hi.

‘Inn sia them neng khempeuh huih in mut in vandawn ah kilawn to in meihualpi in akat khitteh avui in leilak ah hong kiasuk kik hi. Hiroshima khua kim aa om guntui te salua ahihman in akhu in vantung ah lengto hi. Vantung pan gial in hong kisuk kik hi. Huih lak ah ionic dat tamlua ahihman in kekte kia in mun khenpeuh meikhau (wire) kang gimnam hi. Tua bangin meihualpi le huihpi kithuah ahihman in singkung te azung pan in kibul lotkhia in van ah leng ziaizuai uh hi.

Anungta lai mite pen sikha bang in kangbaang lakpan hong pusuak uh hi. Ngimna sawmna mel neilo in kileh in tai biangbuang uh hi. Alim liam lualo te in ahihleh unau sanggam innkuan pih tek zong in kileh khengkhang uh hi. Hiroshima khuapi laizang ah aluang gun thum om in tua gun te gei ah sik nading leitang awnglo zahdong in misi luang dim hi. Salua mahmah ahihman in gun sungah tuak in asi uh ahi hi.

Meihualpi pen damdam in hong kizel semsem hi. Inn kicim te sung ah a-awk mite ahihleh huhna ngen in kiko ko uh hi. Mun khempeuh meikuang tawh kidim ahihman in kua mah ki hunkhia zo lo hi. Dong tuak mi tampi te ahihleh paak-huan sung khat ah kikhol uh hi. Ahih phial zong in mei vang sa lua ahihman in atamzaw si veve uh hi. Anung ta lai phawl khat te ahihleh amau ngap khopkhop in mei phelh uh hi. Kap uh hi. Ki ko uh hi. Hang hang uh hi. Thum in tau uh hi. Vantung pan guah mal hong kia te nangawn sathau kibuak in mei tawh hong kihal hi aci ci zong om liang hi.’

Anung ta lai mite pen meikang khuapi sung ah sikha lam pai bangin ki leh kawikawi uh hi. Akisai inn le lo te khasia tak in en uh hi. Vut te nil in na khat peuhpeuh zong uh hi. Inn kisai singthem sik them te lem in zong uh hi. Amuh uh van te leh nektheih khempeuh la uh hi. Khuaphelep(electric) mei omlo hi. Tuidawl te kisia khin hi. Zato 45 aom lak ah akisai lo thum bek omlai hi. Tua zato te ah siavuan 290 aom lak ah 28 bek nungta lai hi. Nurse 17,000 a omna lak ah 16 bek nungta lai hi.

Bomb khiat khit kha 6 khit ciang akikaikhawm thuthang te genna ah mipi nautang 90,000 le galkap 10,000 si in kum tampi sung sisan cancer le gamma rays te hang aa piang natna te hangin mi tul tampi sih beh lai hi ci uh hi.

August 9 ni in Nagasaki khuapi tung ah nuclear bomb tang khat kikhia leuleu hi. Hiroshima le Nagasaki khuapi te aa kikhia nuclear bomb tang nih te hangin mipi 140,000 si hi.

Kum 60 aval khin pitek Suzuko Numata pen aneu lillel nungak no khat ahi hi. Bomb kikhiat laitak in amah pen Kawamoto mah bang in bomb tukna laizang lam ah aom mi khat mah ahi hi. Amah pen Hiroshima khuapi sung pan piang khia ahi hi. Tua hun laitak in Numata pen kum 21 pha in galkap lam kizopna zum ah kumpi nasem in aom laitak ahi hi. Bomb puakkhap ciangin ama nasepna inn pi kicim in akhe delh kha ahihman in akhe langkhat kitan hi.

Tua ni nitak zato akipuak pah sam hangin nithum sung bang zato ah siavuan omlo, nurse omlo in zatui zong bang mah omlo hi. Akhe zong hong na semsem hi. Asawt lo in si ding mikhat bangin Numata amah le amah ki ngaihsun hi. Alawm ngaih pa in hong veh ding in alam-en hi. (Alawm ngaih pa pen galsung asih lam asawtlo in kithei hi.) Ni thum khit ciang siavuam khat in Numata hong en in na nuntak nop leh na khe ih tan kul ding hi ci hong gen hi.

‘Tua ahihleh siavuan pa aw ka khe tan leng ken pasal nei thei nawn mawk ding maw, ken na sem thei nawn mawk ding maw ka cihleh siavuan pa in hih lai ah nang bek cina hilo na ngaihsun in ci in cina dang te hong etsan hi. Ka heh hong suak mahmah in tua siavuan pa ka thalum nuam phial hi.’

Khuazing sung ah amah bang in cina mipau aza hi. Tua cina te in amah thapia uh hi. A aw uh kitello hi.

‘Numei aw maw pasal aw cih zong ka khen thei kei hi’ ci in gen hi. Adang khat ii aw kitel zaw hi. Ahizong in neu lua mahmah hi. Hong gennop thu ka tel thei kei hi.

‘Adang aw khat leuleu lah gimlua in husam liang aa pau tawh kibang hi. Ahihang in akammal te ka tel thei hi. Ko teng thum pen den mah teh asi ding ka hi uh hi. Nang pen suk hetlo hiteh. Na khe tan lel lecin nungta ding hiteh. Bang hangin si ding na hi hiam. Si kei in. Nungta in. Na khe tan lel in hong cih uhteh kei zong thukim in siavuan hong sapsak un ka ci pah hi.’

Hih te pen August 6 ni aa Hiroshima ii limlemel te ahihi. Kawamoto le Numata te pen kamphatna tawh anungta te ahi hi. August ni 9 ni in Nagasaki ah bomb tang khat kikhia leuleu hi. Khuapi nih kigawm in mimal 140,000 sipah in radiation hangin tampi nungsih beh lai hi.

Tu hun in ahihleh Hiroshima ah bomb kikhiat pen sawt mahmah ta hi. Tua hun aa akikhia bomb sang in azah tampi akhauh zaw hydrogen bomb te nangawn kibawl thei khinta hi.

Scientist te, thuhilh sia te, laigelh sia te le biakna makai te in hih Hiroshima tawh kisai in kua mawhpuak hipi pen hiam cih kinial ngei ngai uh hi.

Nuclear bomb khiat ding thu apia President Harry S. Truman in hih bang aa akhentatna pen pelh theih thu ahihlohman hi. Tua in leitung galpi nihna aven theih nading thu hang ahi hi cih gen phapha hi. Nuclear bomb abawl scientist Oppenheimer (father of the Atomic bomb) in ‘siangtak in gen ni cileng ko scientist te in khialhna lianpi khat ka bawl kha khin uh hi. Tua ka khialhna uh pen cikmah in ki mangngilh ngei nawnlo ding hi’ ci in scientist te ii khawmpi khat gen hi. Lailet – Peter Suumpi/ Reference: Wikipedia