Sum le vang ~ Lian Tuang

Sum le vang ~ Lian Tuang

Kumpina kasep kawmin hunlem ka ngah bangbngin mipi phattuamna ding sep theih peuhpeuh ka sem zel hi. Tangpi ading nasepna ka zuminn pen Tahan veng, EBC lamkabom mai, Kalaymyo ahi hi.

Cycle sawpna

Tua zuminn mai ah mawtaw le cycle sawpna sia khat om hi. Tua sai a nasem adiangdiang tangvalno khat pen kum 18 kim pawl hi a nasep citak ka sa mahmah hi. Zulhtat het loin nasep hanciam mahmah hi. Nuihmai lualo hi. Akha kidawh deidiai a amai zawl pian khat hi. Sun thapai tui tawh kidiah in kawt pikpek sa in nasemsem ahih hangin maigum ngeilo hi. A ci dam mahmah ka sa hi.

Amah tawh ka kiho ngeiloh uh hangin ama om dan pen thupi ka sa gige hi. Ken zong khat veivei cycle kasawpsak thei zel hi.

Mipi ading mapanna

Khatvei zingsang lamin cycle ap in ka sawpsak hi. Manlah pianin zum ah ka om laitak tua tangvalno in ka cycle ong puak phei hi. Kei zong lamdang le lungdam sakawmin a sawpman sum ka piakleh “ Khat vei sunsun ong pia dah aw, na nasep dan ka telloh hang thupi sa ing. Kei zong mipi ading ka mapanna ci ni” ong ci laizang hi. Ka sum ong sang nuam lo hi.

Lamdangsa lua in amah ka en lemlam kha hi. Ka dawnkikna ding kammal nangawn ka ngaihsun thei pak kei liang hi. Amah kilehkik pah hi. Kal nih kal thum khawng a suankhit ciangin lungdam taktak ing ei lawm ka ci thei pan hi. Ong nunghei kik a “ cihtak keilua ei” ong cih san hi.

Sum pia theilo

Tua zawh nipi khat khit ciangin ka cycle ka sawp sak leuleu hi. Cycle ka lakciang sum pia ding ka cihleh amah na omlo ahih manin ka pia thei kei hi. Zingciang pia lel ning ci in cycle ka la hi. A zingciang sum pia ding ka cih leh a annek laitak hi zel, a manlah mahmah laitak hi zel ahih manin ka pia thei kei leuleu hi.

Tua bangin ka sum piak ding kipelh toto hi. Ken zong mangngilh zel ka phawk sunsun ciang a piadingin pai leng amah mawtaw sawpin a nuaikhawngah a om laitak tawh kituak sese lailai hi. Tua bang tawh ni 4 / 5 bang kisot toto hi.

Kimaisak

Asawtsawt teh ka lungsimah tangvalno pa’n kei le ka nasep zong thupisa mahmah lel aih teh ka sum zong ong sang khol kei lel in teh. Tua banah tun nipi khat bang cingta aihteh aman zong phawknawn khol ken teh ci in kei le kei in ka kimaisak pong hi.

Leiba kiciamteh

Nipi thumna pawl zum ka pia kawm in ka et leh tangvalno pa nasep tawlnga in a phone na khoihkhoih hi. Kei zong ama kiang pai pah in “ Kong sum bat na phawk lai hia lawm” ka cih leh “ Nung nipi sawn ni nih ni a pen maw, 500 ks ding hi” ong ci seisai mawk hi.

Pia kei leng zong ong sik hetlo ding ahih hangin leiba in a ciamteh gige na hi mawk hi. Sum ka piakding a ngak gige na hi hi. Kei le ka nasep thupi a sa mahmah pa in sum 500 ks hangin ong en khial theilua ding ahih lam ka phawk leklak hi.

Phawkhuaithu

Tua mah bangin sepna bawlna leh kim le pam tawh kizopnate ah thuman citak takin I om tiltel keileh thuneuno khat akl I thupi ngaihsut kholloh thu khat peuh hangin I theihloh kal in ong ki en khial theilua ding ahihlam ka phawk thak hi.

Lian Tuang