Sum khol ding hoih hi

Sum khol ding hoih hi

Zomite pen sum cil siam lo, sum khawl sangin muh bang bang zat na ding
a zong te ihi hi. Neih bang bang cih gen thadah neihloh nangawn
leitawi a a zang ngam te ki hi mawk hi. Neih bang bang zang pah pah a,
a hun zui a a thalawh tawm mi tampi om hi.Tuabang miten cinat
damlohna khat tuak le uh buai huai mah mah ding hi.Mihing pen i ci leh
lu zong na thei ahihmanin tuabang hun cianga zat ding kigin kholh kuul
hi.Mai lam hun ding saupi ngaihsut ding hoih hi.Sum neih khempeuh
zangtawm pah lo in a tawm a tam ci lo a khol ding thupi hi.

Bank a sum khol pen a meet a tam luat khol loh hangin hoih mah mah
hi.Muanhuai in kip mah mah pen hi. Kumpi nasem te bangin Bank leh Post
office khat zaw zaw ah sum khol hamtang ding hoih hi.Hih dana sum khol
pen eima’ mimal, innkuan leh gam adingin zong hoih hi.Kumpi nasem te
bek tham lo in nisima sum thalawh leh vanzuak ten zong a tawm a tam ci
lo a sum khol ding hoih hi.

Savings Account pen Rs.500/Rs.1000 khawng bek tawh kihong thei ziau
hi.Tawm tawm in khawl mawk leeng ang-ip a koih sangin pung zawdeuh sam
hi.A meet a tawm phial zongin tawm tawm in koih beh beh lehang a hun a
sawt ciang tampi pha veve ding hi.

A pong mana sum muhna a neite adingin recurring deposit hih huai
hi.Kum 1/2/3/5 sung ading deih kiteel thei hi. A hun tawh ki zui in a
meet zong kibang lo hi.Khasim in Rs 100 koih lecin kum 5 ciangin Rs
6000 leh a meet tawm bang om ding hi.Khasim in Rs 500 koih lecin kum 5
ciang Rs 30000 leh a meet Rs 6700= Rs 36700 bang pha man ding cihna
hi.Bank ah na khawl man in kum 5 khitciang na tate laisin nang a bul
pat nang lunghimawh hong kuul nawn lo ding hi. Bank ah koih kei le cin
zong tua pen bangmah lo in bei veve lel ding hi.Tua ahihmanin bank ah
sum khol ding hoih hi.

Sum lawm a nei contractor leh sumbawl lian te adingin fixed deposit
zong hoih mah mah hi.Fixed deposit pen a hun ciangtana sum koih hi in
ut hun in ki lakhia thei lo hi.Koih zah leh a hun zui in a meet zong
kibang kim lo hi. Rs 10000 kum 5 sung 10% khang in koih lecin a hun a
cin ciang Rs 16105 hong hi ding hi.Tua pen innkuan vai khat peuh peuh
ah hong noptuam mah mah ding hi.Tuhun ciang Bank tampi om in a zat dan
i siam ding a thupi hi.

Kumpi nasem a kip te adingin General Provident Fund(GPF) pen a
kitangsam khat ahi hi.A tawm thei pen in a khasum uh6% a koih loh uh
phamawh hi.Basic pay Rs 10000 te adingin a GPF niam thei pen RS 600
cihna hi. Siate sawlna hang hi lo in eima’ ngaihsutna tawh GPF a tam
thei thei koih ding thupi hi.GPF pen a meet zong hoih mah mah lai hi.A
lungsim nei te lakh tampi tawh pension uh hi.Tua ahihmanin a hih theih
liai liai leh GPF pen pension masiah lakkhiat loh ding hoih hi.

Sum bat loh pen sum khawldan hoih khat hi bilbel.Khasum san ciang a
piak ding ci in sum na leitawi nilouh leh khasum na san ciang na zat
nang hong tam mah mah ding hi.Deih leh duh peuh peuh zong lei ding hi
khin lo hi.Ki taangsap mah mah te bek lei ding hi zaw hi.Sum ciilna
lamah namdangte siam mah mah uh hi.Amau a muhna uh tawh kizui bek in
sum zang uh hi. Pasian in itna lo-ngal leiba lou ding a cih mah bangin
sum leiba nei lo ding hi hang.

Zomite sum a la lut lo hi peuh mah lo hi hang a zat dan i kholloh man
in a khangto thei lo ihi zaw hi. A lungsim neite’ adingin mi inn teen
pan nangawn in sumzian kingah zo lua hi. Kawlgam pan Mizoramah sum
thalawh a hong pai sing cubit pua te nangawn in tampi ngah ve uh e.
Ahizongin khawl cih meel om lo in gim taka a sepna uh zankhat zan nih
khawngin zu in gai ziau lel mawk thei uh hi.Mai lam hunah zomi ten a
tawm a tam ci lo in eima’ muhna tawh kizui in sumkhawl i hahkat ding
hoih hi.

Pau Tun Thang