Suicide leh Murder Video te a encikding in Facebook in nasemding mi 3000 behlapding

Suicide leh Murder Video te a encikding in Facebook in nasemding mi 3000 behlapding

Abeisa hunsung ah Facebook tungtawn in amauleh amau kithahlupna, ahih keileh gitloh gamtatna leh tualthahna (Suicide & Murder) cihte tamlua ahih manin, tuate a encikding in Facebook Company in mi 3000 bang nasemding in behlapding cihi.

Facebook’s CEO and Co-founder ahi Mark Zuckerberg in Wednesday ni in agenkhiatna ah kalsim in Reports tulthen millions tampi ki ngahden in tuate a encikding, Global Community Operations Team ah ahuhding in mi 3000 ki behlapding cihi.

Tulaitak Global Community Operations Team ah nasem bekbekpen mi 4500 aomkhinsa hi a, tuateng in zolo uh ahih manin mi 3000 aki behlapding ahihi.

Nungdiak in US, Cleveland ah migilo khatin mikhat athahlupna Video pen Facebook tungah khahkhia hi. Tua Video pen Report akibawl hangin nasem kicinglo uh ahih manin, alunlap in ki lakhiapah “delete” theilo ahih manin tawlpikhatsung mah Facebook tungah ki enthei veve hi.

Tuakhit asawtlo in Thailand ah papi khatin ata kha 11 aphapan pen khailum in, tua akhailupna pen Facebook Live in khahkhia mawk hi. Tuakhit ciangin amahzong amahleh amah ki thailum hi.

Hih atunga ki thahlupna Video nihte pen Facebook Company ah Report akibawl hangin nai 24 sung (nikhatsung) bang ki Delete pahlo in ki entheimawk hi.

Tuabang thupiangte hangin Facebook abawlkhiapa Mark Zuckerberg in Global Community Operations Team ah mi 3000 nasemding in ki behlapding cih atangkokhia ahihi.

Mark Zuckerberg ngiatin ama Facebook Profile tungah Wednesday ni in “If we’re going to build a safe community, we need to respond quickly” cih gelhkhia hi.

Mark Zuckergerg in agenbehna ah abeisa asawtnailo hunkhat in Facebook Live User khat amahleh amah ki thahlupsawm, Suicide sawm cih akitheih ciangin amanlangin ki khawlsakthei cihi. Ahi zongin nungdiak thupiangte ahihleh bangmah ki semmanlo cihi.

More: Nungakno khakin Facebook pan aguaktanglim khakkha ahih manin Blackmail thuak

Ahi zongin Facebook azangbekbek pen leitungbup ah mi Billion 2 bang phadek takmawk ahih manin, tua mi 3000 aki behlap zenzen hangin tuipisung ah guahtui malkhattawh kibanglel dinghi ci’n Sarah Roberts kici UCLA pan Assistant Professor khatin genkhia hi. ZD Sawltak #zomidaily