Spanish Tourist khat Kawlgam ah ki bawlsia leuleu

Spanish Tourist khat Kawlgam ah ki bawlsia leuleu

Kawlgam ah khualzin in honghawhpak ahi Spain gampan Spanish Tourist khat aneihsa kisut bekthamlo, amizong ki satliamgawp cih Irrawaddy News in genkhia hi. Yangon khuapi pan Tai 50 kiim agamlatna aom Pegu Township, Badagon khuasung ah tukalsung thupiang ahihi.

Hih Spain gampan hongzinpa minpen Carlos kici a, kum 31 khawng aphapan khat ahihi. Monday ni nitaklam Setbing (Bicycle) atuan laitak aneihsa kisut in, amizong akisatliam ahihi. Pegu Township Police Station No. 3 te genkhiatna ah asat kua cih kitheician nailo a, aliampa ahi Carlos pen Rangoon General Hospital ah kipuaksuk cihhi.

Thuthang kizakna ah Carlos pen limliam mahmah a, alu, akhut, akhuk, akhe, agil muntampitak ah liamzihziah in mulkimhuai mahmah cihi.

Aneihsa bangmah ki laksak manlo cisam a, ahi zongin apumpi limliam mahmah a, Thailand ah zatui zaha kibawlding in tuni in kipuaksuak cihzong kiza hi. Hihvai hangin Police Station ah Article 394 tawh thu kibawl a, ami aki kankhiat theihleh atawmpen kum 10 peuhmah thongdan tuaktheiding hi.

Kawlgam pen Tourism Industry aginat luat naihetloh banah hihbang in gamdangmi hongzin sunsun te tuahsiathei citciat hi. Nunglam deuh inzong Japan numei khat Mandalay Division sungah buan thuak bekthamlo, aki buankhit ciangin thahlup thuaklailai mawk hi. Gamdang mite’n Kawlgam hong gimneih semsemding patauhhuai mahmah hi ci’n Union of Myanmar Travel Association pan General Secretary asem laitak ahi Hnaung Hnaung Han inzong genkhia hi. ZD Sawltak