Jerusalem pan Zomi Party Gualzawh Pawi lungdam pihna

Jerusalem pan Zomi Party Gualzawh Pawi lungdam pihna

Zomi Party gualzawh na hong pia, I biak Pasian tungah Lungdam Kohna Pawipi Zomite Khuapi lian pen khat ahi, Tedim khuapi, Faith Baptist Bible Collge (FBBC) Sang huangpi sungah ni 11/12/2015 ni-in ki bawlding cih thu sapnalai ka ngahteh, ka lungdam mahmah a, agel, a vaihawm, asem, abawlte zong, gelsiam, vaihawmsiam kasa mahmah hi. Lungdam kohna neih pen Christiante dan leh Christianta ding in a thupi mahmah khat ahi hi.

Kawlgam ki ukzia hong tamtel pihlote leh Zogam leitang ngahkik nading leh Kawlgambup in suahtakna a ngah kik nading in asun, azan cilo a, huihpi, guahpi leh mi ngongtatte mat le hen thuak in, a innsung, a bangkuasung nangawn uh limtak a, a vaihawm manlote thuakna, a telpihlo te’n thupisa khollo khading uh hi. Mi pawlkhat bangin amau gam hiven a gualzo mah keiding uh maw, hong cihsan khalai maiding uh hi. Ahi zongin Kawlgam ki ukzia a telte leh Zogam leh Kawlgambup in suahtakna a ngahna dingin, na asemte’ gimdan, thuakdan, a telpihte khempeuh in lungdam kohtak mah ei, ci-in lungdampihciat ding uh hi. Banghang hiam cih leh Zomi Party ki telna ah a lut loh kum 24 kim bang hita a, Zogam bangah galkap Party leh Party pawlkhat Zomite sungah zungthukna khaman mahmahta uh hi. Party pawlkhat bangin kitel kik-ah gualzo nuamlai uh ahih manun khua Hausate leh a mizatte uh khasum na mawk piakden uh hi. Zomi Party te’n mi Sum pia cih thadah khualzinna ding, lapsap nangawn baih a salo ahi uh hi. Tuaci bang kawmkal ah I biak Pasian mah in a mite hamsat zia hong tel-in hong nusialo a, gualzawhna hong pia hi. Party dangte bangin Sum le pai tawh Mee(vote) a zongding hileng, bang mah ki neilo ahih manin hici bang Lungdam Kohna Pawipi I bawlzo kei ding hi.

Zomi leh Zogam leitang, a mangthang nading leh a beimang nadingin na asem te’n “Zomi cih bang om ngeilo, Kum 2014 Kawlgam Census ah 914 ah min a gelhte gamdang mi suakding hi, Party min dingin Zomi min zatsang in Chin min zangzaw le-uh gualzo zawding uh, Zomi cih peuhmah theingei keng,” ci-in mitampi tak khemin alau theihtheihna dingun thu agen uh I theihciat ahi hi. Ahi zongin gamdang mi asuah gen malak un 2015 Kawlgambup kitelpi ah 914 Zomi a gelhte Mee(vote) tang deih in sukdian, todian leuleu uh hi. Gamdang mi kici peuhmah in gambup ki telteh Mee(vote) khia thei cih bang leitungah om nailo hi. Chin min zatna in gualzawhna hongpiading hi leh tutung in Chin Party ten tutna neukhat beek ngahding uh hi. Tutna neukhat zong ngahlo uh ahih manun ZOMI khempeuh in Chin min in gualzawhna hong pialo ahih lamtel ciat in lunggulh in zong neinawn kei ni. Chin mi cih bang leitungah khat zong omlo a, Chin cih pen State min ahi hi. US te kiangah Tulsa people, Florida people vaci leucin zaknop hongsa hetlo ding uh hi. Tulai tak a, Chin min a zanghte’n la aphuah uhteh Laimi cih na zangh uh ahih manun, Chin min pen Business leh Zomite valhtum dinga a zat uh ahih lam telsiamta ni. Makai pawlkhat zong na suktai, no totai nawn kei un, cih nophuai liang hi.

Zomite hong ki suamzia hici bang kawmkal ah Zomi Party in gualzawhna hong ngahteh Kawlgambup leh leitungbup thu ki zakna Media khempeuh ah eisawl kullo, ei gen kullo in Zomi min kigen ziahziahta hi. Nainganyi(Politics) sep a thupitzia khangthak Zomi te’n telhuai mahmah ahih lam zong, hong phawk sak hi. Mailam ah Zomi Party te maban a zomding I om kei leh I om masiah I vengte khutnuai leh mi namdangte khutnuai ah ki omden ding ahih lam Zomibup in phawkhuaita hi. I biak Pasian in khangthak Zomite mipil, misiam, mihangsan, mi citak tampi hong pialai hen. Israel mite makaipi Moses(Mosi) in Egypt kumpi huangsungah annlim, tuilim nono ne-in nuamtak in a omding sangin, a mipihte tawh gentheihna thuakding a telzawk mah bangin Pu. Chin Sian Thang leh Zomi Party makai te’n zong galkap kumpi te’n innhoih, lo hoih, mawtaw hoih nono hong pia nung, na nasep khawl un ci-in nadap zolzolta le-uh Zogam leitang leh Kawlgam bup in suahtakna a ngah masiah ci-in haksatna, gentheih na, vuakna, satna, mat le hen thuakna natel zaw uh hi. I biak Topa Pasian in Moses mah bangin Pu. Chin Sian Thang leh a seppihte cidam in kumsawtpi a mipihte hong nuntakpihlai dingin thupha hong piaksak henla ZOMI PARTY zong, cidamin Zogam leitang khantohna, suahtakna hong hisak hen.

Hih hun ah kong ki helnop mahmah hangin ka Sang ua te’n “Old Testament Field Study” dingin Israel ah mi 22 hong sawl uha, zingsangtho, kithawi annne kuankhia, a munteng va-en, nitak tunteh kikhek, annne, laibawl kipan hiden ka hih manin kong ki helthei kei a, aki helkhate hampha kongsa mahmah, kong eng’ mahmah hi. Ken leitung Jerusalem panin kong lungdampih sangin I biak Topa Pasian in van Jerusalem panin Zomite gualzawhna leh I lungdam koh biakpiakna hong lungdampih zawlai dingin ahih manin kalung damdiak hi. Topa Pasian in a bawlsa Zomite mailam ah zong, lungdam kohna hun a bawlbawlzo ding leh ama thuphate a zeksiam dingin leitung bei dongin hong makaih denta hen.

Zomite hong phawk den,

Khaibawi

Jerusalem Tower Hotel
23 Hillel Street, Jerusalem-9458123
Room No. 603
Tel+97226209209
Date: 4/12/15 Friday