Spain ah meileng tuahsia, mi 4 si, 50 val liam

Spain ah meileng tuahsia, mi 4 si, 50 val liam

Spain gamsung ah zanni Friday ni in meileng khat ataina sikzawl panin pialkhia in kibung ahih manin mi 4 si a, adangzong mi 50 valbang liam cih AFP News pan kiza hi. Hih meileng pen Spain gam panin Portugal gamlam zuanin atai laitak hi a, Station khat atun madiak in lampial in akibung ahihi.

Meileng ii amailam in leikhat ii apangteng phupheikha a, tuapanin khuamkhat maiphut ahih manin meileng hawlpa zong si cih kiza hi. Meileng i amaiteng zong zangawp, tongawp hi. Hih meileng amaibuk sungah mi 65 bang atuangding in kigen hi.

Passengers pawlkhat liamgawp in gimmahmah uh ahih manin Helicopters, Ambulances leh Fire Engines te tuahsiatna munah taipah zangzang uh a, cimawh dongtuak te khoipah uhhi.

Hih meileng pen Vigo, Galician khua panin Portugal, Porto khua zuanin apai laitak hi a, atuahsiatna mun pen O Porrino khuagei ahihi.

Meileng naei Company pen Adif Company hi a, tuate ii genkhiatna ah tuahsiat hunpen zingsanglam 9:30am hunpawl cihi.

Hih tuahsiat laitak in khuahun pen hoihlel a, agamla kimuzolo zahdong in meikai cihbang omlo hi. Ahi zongin meileng pen themkhat luita a, a tuahsiatna pen thunei te’n akancian laitak uh cihthu kiza hi. ZD Sawltak #zomidaily