Somalia gama Autonomous Region nihte’n kikaptuahna omin Ceasefire lawhsam

Somalia gama Autonomous Region nihte’n Ceasefire aneih uh kikaptuahna omin Ceasefire lawhsam

Nov. 6, 2016: Somalia gam-a autonomous region nih – Galmudug leh Puntland ten ceasefire thukimna suai a kaih uh hi napi-in zan in gamgi kituhna hangin buaina piang a, Galkayo khua-ah kikaptuahna nasia takin piang hi. Hih kikaptuahna hangin mi 20 kiim in sih lawh uh hi. Galmudug leh Puntland ten ceasefire thukimna a neih uh pen nipi kal khat cing pan a, kikaptuahna mun Galkayo pen Galmadug leh Puntland ten gamgi khenna khua dingin a zat uh ahi hi.

Nung a ceasefire deal pen United Arab Emirates vaihawmna tawh hong piang thei hi a, thukimna a neih un zong Galmadug leh Puntland ten deih mahmah in UAEte’ vaihawmna na muak uh ahih manin Somalia President in zong Galkayo panin thau tawi khempeuh a kihepkhiatna dingun thupia pah a, kikaptuahna hangin khuami a tai khiate zong a ciah kik theihna dingun hun kipia hi. Galkayo pen galdo dinga kipiakhia Galmudug kiim-a “militias” kicite omna leh hatna mun ahi hi.

Galmudug mayor Hirsi Yusuf Barre in bel hih kikaptuahna thu Puntland galkapte mawhsak a, Puntland ten Galkayo leitaw lamah galkap koih in thau a khah uh pen lamdang kisa mahmah hi ci-in gen a, thau a khahna hangun luang 20 kikham a, tu-in Puntland galkapte kileh hawl kik zo ta a, Galmudug ah daihna om ta hi ci hi. Puntland ten zong Galmudugte ngawh in, khat leh khat kingawhtuah uh hi. “Galmudug ten kilemna deih lo uh a, Galmudug galkapte a kisiansuah mateng kido ding hi ci-in Colonel Mohamed Aden in gen a, mi 20 a sih banah galkap 12 leh mi dang 20 in liamna tuak a, mawtaw nih leh galmat li tawh ciah uh hi ci-in gen beh hi.

Codkamudug panin a reporter Galmudug radio station-a sem Mahad Ali Mohamed zong hih kikaptuahna ah si kha hi ci-in radio station manager Hanad Abdi Farah in gen a, tu zingsangin a inn panin radio station zuan dingin a pai lai takin thau tang lengin a lu kha hi ci-in zan in gen hi.

Somalia gam pen 1990s in ama deihna bek tawh gam uk (dictator) Mohamed Siad Barre a kilaih khit nungin al-Shabab Islamic ngongtatna kigolhna hangin buaina hong piang hi. A beisa kha khat a kikapin Galmudug leh Puntland autonomous regionte gamgi kituhna hangin buaina hong kuang khia kik a, tua khit nung Galkoya ah sanginn tampi kikhak cip hi. -Agencies Thang Khan Lian