Akikhen theilo, Sisan kibang Zomi te mailam ding lunggulhna

Akikhen theilo, Sisan kibang Zomi te mailam ding lunggulhna

Kong it Zomi Laizom teng, Zeisu kiangpan hongpai nopna mimal kim tungah hongtung tahen cih hong pulaak masa nuam ing. World Cup Zumpi (FIFA) Switzerland gam Zurich kapai lai in kongpi a thupi kasak mahmah lim ettheih dingin hong suangkhia ing . . Zomi te zong isiamna ciat gawmkhawm in kidomto dimdiam leng sangpi tungding cih hi . Khatbek kisang thei lo ding . Leitungbup ahoih hangin Zogam leh Zomi te sung ahoih kei a , anop kei leh mun khempeuh anuamlo tawh kibang veve ding hi .

ZRA(E) , PDF -Zoland , Zomi PDF , PDF -Tonzang leh CDM leh adang aom khempeuh in kipumkhat in itna tawh thu leh la vaihawm khawm diamdiam dingin kong thum masa nuam hi .

Gamdang pan adiakin bitna mun a om ten zong thapiakdan leh lamlah dan isiam kul ding hi . Singnuai gammual a om tano te , Khangno te maban ding ngaihsun siam ni. Galkap te bek ilau hisak ni, ei leh ei kilau sawm kei NI . Hun in thu honggen dinga , denteh kisik in khitui luanga iki ngawngkawi hun nai mahmah ta ding hi . Tua ahih manin:

1- Zomi te akimu dah theiding ihikei hi
2- Zomi te akikhen thei ding ihikei hi
3- Zomi te akilangneih thei ding ihi kei hi
4- Zomi te akithat, akiman, akibawlsia thei ding ihi kei hi .
5- Calvary mual a Zeisu hong luansak sisan kicing sak phot ni.
Ei a te kiluanbehbeh sak kei ni.
6- Nang’ khialteh cih tamlua ta , keima khelhna hi cih lam kipan ta ni.
7- Biakinn khat sunga Topa maipha zongkhawm te hihang.
8- Nopna dahna ah akinusia ngeilo , akinusia ngeilo te hihang .
9- Dawi ibiaklai a izat ngeina hoihlo te la kikkik nawnkei ni.
10- Anungta Pasian in Zomi te tungah hong khasiat lohna dingin hanciam ciat ni.
11- Gamsunga thau tawi Zomi khanglai te aw Thau bek na tawikei unla Laisiangtho bu zong na tawisawm ciat un .
12- Bawlung sui bang hileng team khat danin hong kingaihsun unla khat leh khat hong geelkhawm diam diam un .
13- Na thaute bek uh muangkei un maw Topa lamlahna kisam mahmah ding ihi .
14- Zingciang a leitung beiding danin hong gamta mahmah kei un maw .Hong thukhual un , hong geelsiam un , thu hong khinkhai siam un lah Pasian hong zahtak un .
15- Rom 12:9 ,” Na ki itna te uh Lungsim takpi tawh hisak unla. asiate mudah in ahoihte lenkip un “.
16- Note ngaihsutna tawh akituaklo a thugen te gal danin ngaihsun pahpah kei un .
17- Mipi nautang te tungah kuamah hong takhial leh hong khutkhial mahmah kei un maw .
18- Tu laitak a nagen thu leh na gamtat thu pawlkhat te den ciangin na kisik hun uh om teitei ding cih hong lung ngai un maw .

Note adingin thungen den, Rev. Pau Khan Khai. DD. (ZYA International Consultant, Kentucky- USA Dec 18,2021)