Singlamteh lampi ~ Tg. Samuel Nas

Singlamteh lampi ~ Tg. Samuel Nas

Hici’n na ngaihsun ngeihiam? :: Jesu in ei adinga sihna hong thuak loh buang bangmah adang hong sepsak nawn kei leh zong i dam sunga lungdam a koko dingte ihi hi. Leitung thupha adangdangte hong piak thuahthuah nawn kei zongin “Aman ka mawhna teng lakhia zo” ci-a Pasian min phata a lamlam dingte ihi hi. Tua zahin Jesu ei ading hong sihna bek zong manpha khin hi.

Ama khialhna kimaisak a, ama mawhna a kiselcipsak mi, thupha ngah ahi hi. Topa in mawhna a khuksak loh mi, a lungsim sungah khemna a om lo mi, thupha ngah ahi hi. (Late 32:1‭-‬2)

I hamphatna

Mi mawh i hihna tawh i ngah dinga kilawm mahmah tawntung hell gimna tawh hong kipelhsak a, i ngah dinga kilawm hethet lo vantung nopna leh amah tawh kizopkik theihna (sweet communion) lampi hong bawlsak hi mawk hi.

I ngah dinga kilawm a sia penpen thu tawh hong kipelhsak bek hilo a, i ngah dinga kilawm hethet lo tawntung nuntakna leh a thupha dangdang teng hong piak thuahthuah lai zawsop hi. Topa ei di’n hoihna e.

Ngaihsun taktak leng, Pasian tapa ngeingei ei tang dinga hong si cih mawk pen “manpha” cih bekin a thupitna gen zolo hi.

I hi milmel khahiam?

A dahhuai thu khat ah, tuhun ciang Jesu in ei adinga hong thuak nat dante kingaihsun nawn mello a, kingeina seh gawp ta hi. I lungsim leitang a hoihloh man hi ding hiam, akl. Pasian thu i zak tam ta ahihmanin a thupi lua in bangmah kingaihsun nawnlo mawk hi. I lungtang hong vut zo Pasian thu om nawnlo a, thangahna kammal zong kinei nawn taklo in ki-om milmel thei hi. ‘Spiritual Amnesia’ a cihte uh kivei tek pian ta mawk hi.

Khatvei ngaihsunkik dihni e…

Pasian Tapa Jesu (The Darling Of Heaven) pen singlamteh tungah a thuakna pen baih hetlo ding hi. Ahizongin a kikhai toh ma pekin zong a thuaknate neu nawnlo hi.

A puantualpi kibalkek sak a, zahlak takin guaktang in kipholak hi. Hehpihna a nei hetlo Rom galkapte khut thuakin bawlsiatna namkim thuak a, a pumpi tungah mun khat zong a awng nawnlo zah dongin na sat liam uh hi.

Simmawhna, bawlsiatna, cilphihna, zahkona namkim na thuak hi. Linglukhu khawng kikhu sak lai sawnsawn hi.

Hih teng a thuak khit ciang, a sisan luangkhia pen tam lua ahihmanin khua phawk nawnlo zah dongin om hi. Tua pipi mahin amah teekteek a kikhai nading a gik mahmah singlamteh kipuasak lai hi.

A lampi pen nai cik hih tuak lo lai a, mualtung ah kahto kul hi lai hi. A haksat ding dan. I Topa zong tam veipi na kipuk hi.

Hih teng khit ciangin singlamteh tungah na kilhcip uh a, a sih hunhun a si lel dingin kinusia hi. A pangah teipi tawh kidawt beh lai a, sisan naisan tampi luang hi. A sisan tua banga a kibuak ziahziah laitakin zong ciamnuih bawlna a ana nei, Nang maw Pasian Tapa? ci-a ana toto pawl zong om sawnsawn lai hi.

Tuabek hilo…

Leitung mite mawhna khempeuh Jesu tungah kisuan ta ahihmanin Pa Pasian in zong en thei nawnlo a, nunghei san hi. Tangtawn a kizomsa Pa leh Tapa hong kikhenin Jesu amah guakin kinusia hi.

Cimawh lua in “Ka Pasian, Ka Pasian, bang hangin kei hong taisan na hiam?” ci-in hong kikokhia hi. A thuakna lian lua ahihmanin a bawlsa ni leh kha te in zong en ngamlo hi. Khua mial cip a, leitung kilinglawng hi. Hih hun sung teng khua a mial ding dan kamin gen zolo hi.

Ut hileh maw…

A taktakin, Jesu ut hi leh amah leh amah kihonkhia thei lua hi. A honkhia nuam vantung mi zong kigingsa in zihziah lel uh hi. Hi le zong amah kihonkhia leh eite ading hotkhiatna omlo ding ahihmanin mawhna hanga i thuak ding khempeuh ei tangin hong thuaksak hi.

Singlamteh tungah Jesu a kilhcip pen i mawhna hi a, a tawp donga a lenkip pen siktukilh hilo in eite hong itna hi. Ei sep tang teng semin ei thuak tang teng hong thuak hi.

Aw himah lamdang pensang

Nuntakna i ngah nadingin amah hong si a, gupna bukim i ngah theih nadingin bawlsiatna namkim hong thuak hi. Van mi i suah theih nadingin lei mi hong suak a, Van Jerusalem thak ah I lut theih nadingin amah Jerusalem khua pua lamah na kipuaseh hi. Halleluiah!

Jesu’n hong it man ka nuam pha hi
Kei hong it hi, kei hong it hi
Jesu’n hong it man ka nuam pha hi
Kei nangawn hong it hi