Singkung thum (Pasian gelna a tuampi)

Singkung thum (Pasian gelna a tuampi)

Sun ni tang zong etlawm mahmah-a, leitung’ nopna tawh kidimsak hi. Tua bang laitak in singkung thumte zong lungdamna tawh hong khangto uh hi. Tua singkungte in amau mun ciat panin mailam ah amaute tungtawn in a kisem ding lunggulhna sunmang na nei ciat uh hi.

Tuate hong sutkhawm uh hi.

A masa pen in hibangin ama sunmang gen-a, “Kham le ngunte kikoih, kikholna singkuang,” a utna thu a gen hi.

A nihna pen in zong ama sunmang gen-a, “Teembaw lianpi khat hi-in kumpite khualzinna,” a suahnopna thu a gen hi.

A thumna pen in zong a sunmang gen-a, “Limtak in khangto-a, ama tungtawnin na khempeuh a piangsak Pasian vangliatna kilangsak,” a suahnopna thu a gen hi.

Hunte hong bei toto a, amaute sunmang bangin hong piang hetlo ahih manin khasia in lungneu kisa mahmah uh hi.

Singkung masapen ahihleh bawng an nekna kuangin kibawl a, singkung nihna ahih leh nga betna gunkuang neu khat in kibawl hi. A thumna pen ahih leh singlamteh in kibawl hi.

Tua bangin amaute sunmang dan hilo amau lunggulhna danin akibawlloh ciangin lungkia in thanem kisa mahmah uh-a, singkung masapen in, “Ka sunmang ahih leh mihaute’ ngun le kham kholna singkuang hih ding hinapi, tu-in bawng an nekna kuang ka suak-a, nisim ganhingte tawh ka om khawm hi,” a ci hi. A nihna pen in zong ama sunmang bang loin ngasa betna bekin kizang ahih manin lungkia in thanem kisa mahmah hi. A tunga nihte mah bangin a thumna pen zong ama sunmang tangtunglo ahih manin thanem kisa mahmah hi.

Amauteng in a sunmang bangun a tangtun’ loh ciangin Pasian tungah khasia kisa uh-a, “Banghangin ka lunggulhnate uh hong tangtung saklo ding veve, hong khangcing sak na hiam?,” ci-in a phun uh hi.

Ahi zongin a nungsang ciangin tua bawng an nekna kuang sungah Khazih Zeisu hong suakin mawh nei mite suahtakna hong pia dingin hong kipatkhiatna mun a suak hi. Tua khitteh tua gunkuang neu zangin Topa Zeisu in lungdamna thu tangko a, mi tampite in hotkhiatna a ngah nadingin thugenna in a zang hi. Tua khit ciangin tua singlamteh tungah Topa Zeisu kikhai in a sisan hong bua-a, a nuntakna hong piak manin leitung mawhna khempeuh kimaisak hi.

Thalakna

I nuntakna sungah eimau san ciatin sunmang i nei-a, lunggulhna tampi i nei hi.

Ahi zongin eimau sunmang lunggelna bangin na hong pianglo zawsop thei hi.

I gelna bangin hong pianloh ciangin Pasian tungah khasia in i thanem thei hi.

Ahi zongin Pasian in eite adingin ahoihzaw gelna na nei gige hi.

Ei deihna ah a hoihpen leh a nasiapen dingin i lunggulh hi.

Ahi zongin Pasian in ahoih penpen ding le a nasia penpen dingin gelna a nei hi.

Eimau nuntak khuasak nop nadingin i gel a, i sunmang tangtun ding i lunggulh hi.

Ahi zongin Pasian in ei bek hilo in eima nuntakna hangin ama vangliatna kilang a, mite phattuamna ahi dingin hong deih hi.

Eimau nuntakna daupai matun dingin i lunggulh-a, hanciam in i kalsuan hi.

Pasian in leitungbup adingin hong na telin eima nuntakna hong zang nuam na hizaw hi..

Sanggam aw, na sunmang a tangtun kei leh zong lungkia thanem in khasia kha kei in… Nang gel na sunmang sangin ahoihzaw gelna a nei Pasian in nang hong kalsuanpih ding hi…

Sanggam aw, na kalsuanna sim ah lungkia in na tupna bang a tangtun loh ciang khasia kha kei in… Pasian in nangmah zangin ama vangliatna kilangkhia sak dingin gelna nei-a, nang hangin mite in phattuamna a ngah nadingun hong makaih ding hi.

Jeremiah 29:11 Bang hang hiam cih leh Topa in kong cihin-ah, mai lamah lametna note kong piakkik ding, na siatna ding uh hi loin na phattuamna ding uh geelna ka neihte kei bek in ka thei hi.

Topa’n ama gelna a telsiam semsem dingin thupha hong pia tahen! Lungdam, Dong Mung