Singkung leh leitung ~ Kap Za Khai

Singkung leh leitung ~ ​Kap Za Khai (Photoh)

Thupatna :: I kimlepaam a om singkungte pen mihingte leh leitunga om na khempeuhte adingin Pasian ii piansak ahi hi. Leitungah singkung loin kuamah nungta zolo ding hi. Singkung pen mihingte adingin Pasian ii leitang gamh cile’ng zong kikhiallo mai ding hi. Sing tawh inn i lam a, singteh mehgahte mah i ne a, mihing gamtat luhekna khempeuh ah singkung tawh kipelhna omlo hi.​​

Singkung leh Mihing

Mihing a kici khempeuh kuamah singkung tawh kipel-in a nungta thei omlo hi. Singkung hangin a nungta vive ihi hi. Sing tawh kilamna inn sungah i om hi. Sing tawh kibawl tutphah, sabuai, lupna, bezuu, khedap, bawngleeng, lokhawhna, cih bangin sing tawh kibawl van vive tawh i kidim hi.

Makeng kung, Ongkung, haikung, dolsingkung, taaksingkung, phatsingkung, nahtangkung, cih bangin zong singkung tuamtuam tawh i kizem a, nuntak nadingin a kisam omna leh nekna dingin singno tuamtuam zong i suan lai hi. Singkungte mah i ne a, singkung hangin a kinungta ihi hi. Si lehang zong hankuang pen sing mah tawh kibawlsak leuleu hi. Mihingte i suah a kipanin singkung tawh kipan a, si in leisung i tun dong nangawn ah sing tawh kipello hi.

Singkung pen An

Sun sungin singkungte in nitang, tui leh Carbondioxide zangin amau an ding huan in nungta uh hi. Tua bangin a huan uh ciangin Carbon hydride ngah uh a, tua pen thahatna in zang uh hi. Protein, athau leh adangdang nuntakna adingin a kisam datte bawlna dingin tha a piak bangin, leitang sungah a lut ding Tehduh dat leh ci-datte zong pia lai hi. Tua bangin singkung pen amah leh amah a kicing nam ahi hi. Amah leh amah an kivak tawmna tawh leitung mun khat peuhpeuh ah om thei hi.

Ahi zongin ganhingte ahih leh tua bang hi thei lo hi. Singkungte om kei leh ganhingte nungta thei lo hi. Bang hang hiam cih leh ganhingte’ an a pia pen singkungte ahih man hi. Singkungte’ bawl datte leh ante ne in a nungta pen ganhingte ahi hi. Tuipi tukpi sunga om singkung neng a kipanin leitunga om singkung golpen dongin singkung khempeuh pen ganhingte’ an vive ahi hi. Singkung singteh ne ganhingte zong sasialne ganhingte’ an suak leuleu uh hi.​​

Singkung pen Leitang Kempa

Huih kempa: ​​ ​​​​

Hih leitunga Oxygen huih khempeuh ii 70% pen tuipi Algi kici singnote tungpan kingah ahi hi. Mihingte pianma peka om singkungte in tuni dongin i diik ding huih hong pia ahi hi. Singkungte in nisim-a piang huihniinte hup in, huih siangtho tawh hong laihsak den hi. Huih lakah Oxygen leh Carbon dioxide a kikimhelh dingin hong ​​ sepsak kawm mahin huihlom, tuilom, suangtumlomte leh leitangte nuntaksakna pen singkungte’ thupha ahi hi.

Khuasatna kempa:​​

Leitung ii khuasatna hong kepsak pen huih sunga Carbon dioxide ahi hi. Hih Carbon dioxide pen khuasatna kem puan dumpi tawh kibang hi. Leitung sungpan hong piangkhia a satnate leitung pualam ah a lengkhia lo dingin hih huih in na kem gige ahi hi. Leitung khuahun a sat luat loh nading leh a vot luat loh nadingin hong kemcingsak ahi hi.

Guah Sampa: ​​

Leitang tungah guah pongman hong zuk nadingin singkungte in tuikhu-te kemin, guah zuk nading na nakpi in sem uh hi. Singkung om lohna ah daitui om lo hi. Singkung tamna ah daitui tamin khuahun nuamsak hi. Hih bang munte ah guah hoih hi. Guahzuk ciangin zong leitang kisiat loh nadingin singkungte’n dal hi. Singkung atawm semsem ciangin khuahun zong hong sia semsem ta hi. Thakhat thu in guahzu vat in.. thakhat thu mah in ni hong sa vat hi. Singkung om loh mun pen keugaw gam hong suak pelmawh ding ahi hi.

Carbon a nungtasakpa:​​

Singkung a bei ciangin carbon nasepzia hong thanem mahmah hi. Huih lakah carbon kihelna kikim keileh leitung khuahun kikhel gawp ding hi. Leitung hong salua gawp ding hi. Tuikhalte hong tui gawp dingin tui hong khanggawp kha ding hi.

Eklei a kempa:​​

Singkungte in a manpha mahmah leitang ekleite hoihtak kem hi. Eklei cih pen singkung leh ganhingte ii samuatte leh datsa kigawmna pan-a kingah leinel ahi hi. Suangtumte a lum, a vot leh tui tawh kinawkna panin datsa kingah hi. Organic muatte in leinelte hubit thei hi. Hih organic in leitang cidamna dingin a kisam huih leh tuite lutsak, paikhiasak hi.

A manpha mahmah nitrogen dat zong kem lai hi. A dang leitang adingin a kisam dat tampi zong kem hi. Tua organic ekleite a kem pipenpen in singkung leh singzungte ahi hi. Leitang sunga om tui leh huih, leh eklei tuamtuamte a kipheipheisak leh a kemcingte pen singkung ahi hi.

Singnamte a kempa: ​​

Singkungte pen a popona ah singkung nam tampi pona tawh singkung nam tampi a kemte ahi uh hi. Khuavotna gam-a leitang zaina acre 2.5 sung bekah singnam 200 bang po khawm thei kici hi. Gentehna in Malay Yan singhuam sungah sing nam bekbek 227 po ci uh hi. Cih bangin singkungte in amau singnamte bek a kem bek tham loin ganhing namte zong kem lai hi.​​

Tui bul kemte: ​​

“Singkungte kawi in,” ci-in India gamah kimlepaam kep nading hanthotna lai kisuang hi. Singkung pen phuk ding hi loin kawi ding hizaw hi. Bang hang hiam​​ cih leh singkungte in tui bul hong kepsak man ahi hi. Leitungah singkung teng beileh tui teng zong koici bang piang ding cih kigen theilo hi.

Singkungte Khualzin

Singkungte zong mun khempeuh ah a po nadingin mihingte mah bangin khualzin kawikawi uh hi. Singkung pakte, a ngahte mun khempeuh ah a tun theih nadingin huih, ganhingte leh mihingte in huh uh hi. Huih nunna hangin singgahte mun tuamtuam ah kithehthang hi. Vasate, singgahnete hangin singmu-te mun tuamtuam ah kizel in singkung in po uh hi. Mihingte in singgahte mun khat pan mun khat ah kinawn kawikawi a, ei tawh singnote khual i zinpih hi. Hih bangin singkungte zong khual na zin kawikawi in mun khempeuh ah a po zihziah ahi uh hi.

Singkung pen Mihingte’ An

Ni dang lai peka kipanin mihingte in singkungte leh singkungte’ pak leh a gahte ne in nungta uh ahi hi. Leitunga singkung nam tampi lak panin nam 3000 bang pen nek theih in kingaihsun hi. Tua teng lak panin nam 150 pen huan sungah kicingin kine hi. Leitungbup a om mihing 90% an dingin singkung nam 20 bang tungah kinga den hi.

Mihingte ading Calorie dat hong pia kiak nam thum om a, mangbuh, vaimin leh buh cih teng hi. Tua bek tham loin meebe, apple, orange, nahtang, sii, nicia, mehthuk, ankam, thawhbat cih teng a kipan nam tampi pen mihingte’ an in kine ahi hi. Leitung lei maitang hectare mak 13074 laka seh thum suah seh khat pen lo leitang in kizang ahi hi.

​​ Singkung pen Mehzaa

Meh bawl ciangin a lim semsem nadingin lothangsan, lothangkang, siing, nanan, cih bangin a limsakna tuamtuam i khah hi. Hihte in meh limsak mahmah hi. Hih kung namte in mehzaa in kizang bek tham loin zatui in zong kizang thei lai hi. Coffee, niangphen te nam pen zindona leh tawldamzaa in kinak zat mahmah hi. Tanglai hunin Chocolate pen pasiante’ kiangpan hong pai an bangin kingaihsun hi. Kumzalom 16 hun a kipanin Chocolate pen Europe gamah na zang masa, mi kimzatna hong suak hi.​​

Singkung pen Khamtheihtui​​

Carbon Hydrate peuhpeuh in khamtheihna piangsakna ahi kazaw dat piangsak thei hi. Leenggah sunga cikhum dat in Wine a piansak bangin vaimin, baali, mangbuh, buh, nahtang, apple, cherry, aalu cihte in zong cikhumdat leh Carbon Hydrate pia thei ahih manin amaute tawh zuu kihuan thei hi. Tulaitak a leitunga om zuu leh khamtheihtui khempeuh pen singkung nam tuamtuam panin a kihuan ahi hi.

​​ Singkung pen Kizepnatui

Singkung paak pawlkhatte pen a gim namtui mahmah hi. Tua namtuina in ganhingte leh mihingte lungnopna hong pia thei hi. Mihingte in paak a namtuite tungpan in paknamtui, kizepnatui, cih bangin a namtui tui tuamtuam hong bawlkhia uh hi. Tulaitak leitungah a tam man penpen paknamtuite kibawlna dingin singkungte mah kizangzang hi.

Tanglai Egypt mihaute in misite a uih a siat loh nadingin a gilzangte lakhia in a gil​​ sungah Myrrh paknamtui kungte leh Cassia kici pakte koih uh hi. Singkung paknamtui in misi uih kem thei ahihna kimu thei hi. Tua bek tham loin kumpi inn sung, huang sung teng a namtui nadingin paknamtui mah na zang uh hi.

Paknamtui bawl nadingin tulaitak a i kimlepaam a po lingpak, sekkhum, jasmine cihte bawl kizang hi. Polianthes Tuberosa kici pakte zong namtui mahmah ahih manin pasian’ tau ah kizepna in kizang hi. Nisuahna lama Asia gam sunga mite thupi a sak pak in Santalum album leh Pterocarpus santalinus pakte ahi hi. Tu-in hih paknamte bang haksa mahmahta hi.

Singkung pen Zatui Zaha

Singkung pan kingah zatui zaha pen kum tampi pha ta kici hi. A beisa kum 5000 a kipanin tanglai mite in Fedora leh Pobi Bengkungte’ thahatna leh hoihna mu khin uh hi. Zatang a nei pen-a kipan zatui dongah singkung vive tungpan a kingah ahi hi. Tuni dongin Afedrin, Morphine, Kodine cih zatuite pen a kung pan a kibawlbawl hi. Singkung pan-a kingah zatui zaha-te pen summet bawlna dingin hoih mahmah hi.

1980 kumin United Nation in a thukanna ah zatui zaha pan-a kingah sum pen $ 550 mak pha hi, ci uh hi. Zatui zaha dingin singkung nam 400 kizang hi. Beng pen damna in zong a kizat bangin siatna in zong kizang thei hi. Foxglove kung in lungtang natna nop tuamsak hi. Pak bel tawh kisuan Rosy Periwinkle (Catharanthus roseus) kung panin Cancer natna dal zatui kibawl hi.

Kawlgam sunga om Cissus kung a zung in zong nuntakna hon thei ci bek tham loin a zung huan in dawn lehang, Cancer damsak kici hi. Rauwolfia Serpenitna kung gui panin sikhang kiamsakna zatui kingah hi. Sente adingin Panax Ginseng pen natna nam khempeuh dam zatui bangin a ngaihsut uh ahi hi. Tudong mahin singkungte in a khangtosan gamte’ zatui kisapna 75% bang pia hi.​​

Singkung pen Leitung Hoihsakna

Tanglai pek panin kumpite leh mihaute in singkung lopate pen huan (garden) in bawl uh a, a omna mun uh zeemin, etlawmsak mahmah uh hi. Keshminia gam a Nishat Bagh huan, leh Kawlgam sunga om Kandawgyi huan, Yangon a om pakhuante bangin singkung lopa-te tawh kizem huan tampi leitungah om hi. Hih pakhuan-te in leitung hoihsak mahmah bek tham loin a mu khempeuh lungnopna pia hi. Zogam a singkungte in zong Zogam Zolei hong zepsak mahmah hi.

Singkung pen Kicinna

Sum in leitung kipeisak ahih leh, tua kipeina tha a pia pen singkungte ahi hi. Leitungah singkung pan-a piang van leh nate zuakin a hauh lawh mi tampi om hi. Sing-atna, khai tuhna, singluang zuakna cihte in mihing nuntakna kicingsak hi. Singkung lopate pen sum piangthei vive ahi hi. Singkungte panin setzat sathau kibawl thei hi. Mihing vanzat tampi kibawlkhia hi. Sing tawh kibawl inn sungah ki-om hi. Sing tawh kibawl vante mah i zang hi. Hih bangin singkung pen mihingte’ kicinna hong suak hi.

Thukhupna: Singkung leh Mihing Kipawlna

Gam khangto a mite in mihing nuntakna pen singkung tungah bangzah kinga hiam cih a theih uh ciangin lamdang sa mahmah uh hi. Leitungah a tual niam pen mite a kipanin​​ U Lian pente dongah singkung tawh a pel thei kuamah ki-om lo hi. Ahi zongin tu-in leitungah singkung lopate kinawh phuk mahmah a, singkung lopate hong tawm semsemta hi. Ganhingte zong hong tawm semsemta hi.

Hih bangta hi den leh mailam ah mihingte’ nuntakzia ding hong haksa semsem ding hi. Tua manin ei mihingte in hih leitunga om singkung lopate it in i zeek siam ding kisam hi. Singkungte tawh kilawmta takin nuntak khuasak huaita hi. Mihing kipawlna pen singkung loin nungta thei lo ding ahih man hi. Kap Za Khai Ref:​​ Green Inheritance​​ by Anthony Huxley