Mother’s Day – “Nu aw, Nu aw” ~ Dal Sian Hung

Mother’s Day – “Nu aw, Nu aw” ~ Dal Sian Hung

Aktui piang masa maw, Ak piang masa cih thu kinialna kaneu lai in ka sang kahpih lawmte tawh kaki nei ngei uh a, zong kikum zelzel hi ung. Holy Bible um a zuite adingin Pasian in Adam bawl a, Adam ompih dingin Eve nabawl hi. Nute’ Ni in Pate zong pahtawi huai kasa hi. Pate’ Ni in Nute zong pahtawi huai kasa hi. Banghang hiam cih leh “amaute nih hinawnlo in khat hita hi” ci in Holy Bible in gen hi.

Ganhing ten Nute’ Ni neilo kha dingin ka ngaihsun hi. Ei mihing ten Nute’ Ni, Pate’ Ni cih bang ineih pen mihing ihihna ah iman phatna khat hipah hi. Tua mihingte sung veve ah zong lamlak zawdeuh leh madawk zawdeuh ki om a, hibang thuhoih ana pankhiate’ tungah zong zahtakna leh pahtawina kapia masa nuam hi.

Nute’ Ni kipatna:

Anna Javis in Nute’ Ni naphuan khia hi. Amah pen 1864 kumin Philadephia ah suak hi. 1905 kumin anu in sihsan a, amaban ah khat bek aneih mit khua mulo asang gamnu kem dingin, anasep Life Insurance khawlsan hi. Anna Javis in Nu akisapzia hong phawk semsem a, Nute’ thupina hongtel semsem ahih manin, Nute’ Ni bawl ding USA kumpi tungah thu hong sung zezel hi.

USA gam mah ah 1872 June 2 ni in, Julia Ward Howe in “Kilemna (Peace)” deihna bulpi in, Nute’ Ni hongbawl masa pen a, Kentucky pan Sangsianu Mary Towles Sasseen inzong 1887 kumin nabawl hi. 1904 kumin Indianna, South Bend pan Frank E Hering inzong Nute’ Ni adingin mihon hansuahna Camping nanei hi.

Tua bangin hong pai toto a, 1908 kumin biakna lamah hong kizangto hi. 1914 kum tak ciangin, USA gambup zat dingin US President Mr. Woodrow Wilson makaihna tawh Parliament kikhopna panin May kha nipi nihna pen Nute’ Ni dingin kensat uhhi. Hibang vaihawm siamna pen thuhoih ahih manin leitungbup ah hong kizel ta hi.dalsianhung

Ani ikibat sak khit loh hangin Nute pen thupi lua mahmah ahih manin, Nute’ Ni kibawl ciat ta ahihi. Tuhun ciangin, biakna leh gam tawh kikhen nawnlo in, Nu sung pan piang mihing kici khempeuh in Nute’ Ni thupi sa in kibawl ciat ta hi. Nu cih kammal pen tehpih omlo in khum ngaungau hi. Nu le Pa te’ tungah itna lak theilai ten itna lak in zahtak piasiam ni. Dal Sian Hung