Singapore meikanglak ah nasem 2 awkcip in, ahunlap in ki honkhiathei

Singapore meikanglak ah nasem 2 awkcip in, ahunlap in ki honkhiathei

Singapore gamsung Punggol Field ah akilamsan Construction Site khatpan meikang in innsangdawn ah nasem in aom mi 2 awkcipman cih CNA pan kiza hi. Mei akang innpi pen Global Indian International School dingin akilamsan laitak in akang ahihi.

MOM (Ministry of Manpower) te’n agenkhiatna ah Punggol Field aom Hon Industries’ Worksite ah meikang hi a, akatna ahangpen ki kancianding cihi.

SCDF (Singapore Civil Defence Force) te genkhiatna ah meikatna pen Punggol Field Walk ii alanglam aom Construction Site pan akang hi a, akatna kuamsung pen Meter 30 pan 50 kikalbang phading ci uhhi.

Meikat laitak in innsangdawn ah nasem 2 te Gondola bawmsung ah awkcip citciat sese uhhi. Anuai ah meikuang lauhuai mahmah in kuangziahziah a, amau atuanna Gondola bawmpen kumsuk theinawnlo in alaizang ah kikhaicip uhhi.

Hih meikat laitak in Video leh Photo tampi kizaih in, meikhu tawh kituam neeinaai in dipkuat huai mahmah hi. Firefighters te’nzong hanciam mahmah uh a, anuailamteng tui buakbuak in phelhphelh uhhi. Anunung ah tua a awkcip te SCDF te’n bangmah liamna omlo in honkhiathei uh cihi.

Liamna omlo cihhang in tua a awkcip nasem mi 2 tepen aki hotkhiattheih khitciangin meikhu limdikkhaklua uh ahih manin Changi General Hospital ah kipuaksuakpah uhhi. Hingtang in meikuang ah aki hailum dektak uh himawk a, mulkimhuai leh cikziat huai mahmah hi.

Tua Construction Site ah nasem adangte bangmah aliam abai omlo cih MOM te’n genkhia uhhi. Meikang pen huaisia simtham ahih manin Punggol kuamsungteng meikhu tawh kituamcip in, Police te’nzong kuamah anawkkhakding deihlo uh ahih manin lampite kikhakcipsak cih kiza hi.

More: Singapore Changi Airport, Terminal 2 sungah meikang

Hih Punggol meikang pen sunlam in meikang hi a, nitaklam ciangin Singapore Changi Airport ah meikang leuleu hi. Singapore gamsung ah nikhat in munnihtak ah mei akang ahihi. ZD Sawltak #zomidaily