Senlai Ni Album pan Deih Mang & Suihlun (Sower Sisters)

Senlai Ni Album pan Deih Mang & Suihlun (Sower Sisters)

Thaiciang hileh Christmas ongtungding hita a, mikhempeuh Lungdambawl pawiding tawh kibuai ngeingai mahmahtek in, atamzaw nasep ki tawlnga ta hi. ZomiDaily ahihleh Christmas hunsung nangawn tawlngak hun ki neingamlo in, website ah onghawh zelzelte ettheihding thutuamtuam ki kaikhawm denhi.

Tukalsung Zomi Star Column ah suahsakding in Sower Sisters te kiangah a lemtheidiam cih kadot uhciang in “Ah ah ah…OK” ongcipah ahih manin, tutung Christmas dawnkawm in “Senlai Ni” Album ong bawlkhia Sower Sisters tethu kongsuaksak uhhi.

Sower Sisters ci’n ihtheih ahi Zomi lasiam minthang mahmah ahi Deih Mang leh Suihlun te unau tengin “Agam leh Adikna” cih Album Series pen 3 naciang bawlkhinzo uhhi. Tuaban ah 2010 kum inzong Malaysia gampan in “Senlai Ni” cih Album khat bawlkhia uhhi.

Sower Sisters te’n “Agam leh Adikna” Album Series 3 ciangbang ong bawlkhiat uhhang in tuahunlaitak in VCD & DVD cihte aki zaihkha omlo hi. Ahi zongin ZOMUS 2004 lai-in asak uh ahi “Sisan Namnih” cihla pen YouTube panin ki ngaithei dinghi.

https://www.youtube.com/watch?v=8my1mR0PTuk

Album ongbawl nunungpen uh ahi “Senlai Ni” ahihleh VCD nasiatak in kibawlkhia a, lazong dawng 13 tak kihel hi. Hih Album sungah Sower Sisters te banah Zam Dal (Zoheisa), Lianpi (Zolengthe) leh N L Sang te’nzong sakpih uh a, nopci mahmah hi. Harmony pen Canaan Land Family panin CK Nang, Biak Tung leh N L Sang te’n zuihsak uh a, zaknop mahmah hi.

Music tumtezong Kawlgam sungah Guitar siam minthang mahmah ahi U Cinpi (Lazy Club) leh alawm Gatam Group te tumsak ahihi.

Tulaitak Sower Sisters mintawh Album thaklian aomloh hangin Thawnpi’ Album thak leh GS Sangpi Album bawlthak sungah la sakpih uhhi.

2009 kumpan amau Album ahilo, lakhui Album dangpan a sakpih tenguh anuai abang in kimu theihi.

• Na Ma Hong Vang Dinghi – ZCF Malaysia
• Kabelh Suangpi – Cinpi Idol
• ZOMUS 2009
• Laimaithak Album
• Hong Ngaihsak Un Maw – Lianpi
• Tunnu Hong It Na – Thawnpi ST
• Tullo Itna – Min Thang
• Kapno Album
• GS Sangpi Album thak

Sower Sisters tepen tukum December ongtun akipan Show tuamtuamtawh buai mahmah uhhi. Sweet December pen ZCF ah Singsong Service nuamtak in azatkhit banah, December 18, 2011 ni-inzong Sizang Biakinn ah Singsong Service neikhin uhhi. Tuaban ah Christmas leh New Year tezong anuai abang in Program gelsa in omhi.

• January 08, 2012 – ZCCM Show
• January 24, 2012 – Thawn Kham tawh Tonzang Lawm Show
• February 18-19, 2012 – Falam Chin Stage Show

Sower Sisters pan Deih Mang (DM) leh Suihlun (SL) tawh kaki muhkhop sungun holim kamkupna themkhat ZomiDaily’ Visitor te adingin kong hawmsawn uhhi.

ZD: Sower Sisters mintawh Album bangzah nabawlkhin uh a?

DM&SL: “Agam leh Adikna” Album Series 3 ciang bawlkhin ung.

ZD: Nungdeuh in nabawl uh “Senlai Ni” thu tawm nonggen theidia?

DM&SL: “Senlai Ni” Album ong piankhiat theihnading in Cin Thawn, Pui Pui leh Mang Sau te’n ong vaihawmsak uhhi. Video & Editing pen Mung Mung (Bless) leh Kampu (Laizom) te’n ong huh uhhi.

ZD: Na Album sungpan ahi zongin midangsak ahi zongin nadeihdiak la?

DM: Ko Album “Agam leh Adikna – 2” sung a “Na Ziatlam Khuttawh”
SL: Suan Lian sak “Khen Tuam A neilo”

ZD: Banghang tuala deihnahia?

DM: Lungkham thanem in ka omciang tha ongpiaden, Topa’n hong ompihdetlam hihla in onggen.
SL: Keitung nangawn ah Topa’ itna in hongbankha cih hongki langsak.

ZD: Maikumsung Album thak bawlding gelna aomhia?

DM&SL: Ko Album dingpen la ka kaihkhopkhop laitak uhhi.

ZD: Na thangah nadeuh Laisiangtho mun e leh?

DM: Late 91:1-16
SL: Jeremiah 29:11

ZD: Hun awng khawng naneih uhciang bangcibang in nazang vua?

DM: Video en, Facebook tuthei… hehehe 🙂
SL: Hun awng ngahding haksa veh aw… hihihi 🙂

ZD: Mihing ihhihna tawh hamsatna kiphukha hamtang theizel a, tuabang hunciang bang nahih thei a?

DM: Vakkhia, Shopping Center khawngah khatguak vak, Cinema khawng sunthapai engiapgiap hehehe Baihkei ei :(-
SL: Kap :(- hahaha, tua ka phutkhak hamsatna te hong gualzawhpihden nakhempeuh ahihthei Pasian kiang tung ing.

ZD: Na lunglut mahmah, Crazy mahmah detkhat?

DM: Khedap…hehehe
SL: Bag, Khedap, tampian veh aw…hehehe

ZD: Na muhdah mahmahkhat?

DM: Ommuan in mikhawng a gensiasia pongmawk te
SL: Hazatna lungsim neite

ZD: Innpan na vakkhiatciang na nutsiat theihloh vankhat cihbang aomhia?

DM: Ka Door Card, Sumbawm 🙂
SL: Kawllukhu 🙂

ZD: Tukum Christmas koi ah zatsawm?
DM&SL: ZCF ah

ZD: Kumthak e leh?

DM: Harvest Centre leh ka inn vuah.
SL: Inn ah deihtak thungetna neihsawm ing.

ZD: Na gennop velvel thukhat ongki dongleh?

DM&SL: Ka gennop mahmah uhbel Tehci panna lah hikawmpah incin, ka unaumin uh ahi Sower Sisters leh ka Album Series min uh ahi “Agam leh Adikna” cih thute akhiatna mantakpi cihthu ong gennuam ung. Innna zong semman mello, sangzong kahman mello in lasa in Gospel pai cihtak in kipai. Zogam bup leh Kawlgam, Vaigam dongah lasa in ongki samkawikawi leh Siate zuikawikawi cihbang in Gospel pai, lasa in ka zinkawikawina hangun Pasian in a kammal ko unau, ko innkuan tungah ong tangtungsak takpi hi.

Hihciang ka tunna uh, mipil mihaute lakah maipha ka ngahna uhzong Pasian’ gamleh ama dikna kazon masak hangmah uh ahihlam akua mapeuh tungah ongtheisak nungngiat ung. Pasian’ gamleh ama dikna zonnading in lungsit keini. Tuabang in Gospel pai-in ka zinkawikawi uhhang ka Nu un kamkhatbeek ongtai ngeilo hi. Innah a ompihding omlo, amahbek omden hinapi’n kamkhatbeek phunngeilo banah, thu ong ngetsaksak zaw hi.

ZD: Tutung ZomiDaily Christmas Special ah holimna ihneihtheih manin lungdam mahmah hang. ZomiDaily ah onghawhzelzel Visitors te ading kam vaikhaknop nanei uhhia?

DM&SL: ZomiDaily onghawh zelzel te kiangah “ZomiDaily tawh kibang in We love you guys, we need you to walk with us, God bless you always” na cihsak ou.

ZD: Sower Sisters tha ongpiaden mipitung ah eleh?

DM&SL: Lungdamlua ung in, mailam ahzong tha ongpia lailaiding cihzong na lamen mahmah nungei. Topa’n thupha ongpiaciat hen ou. Lungdam!

Presented by ZD Sawltak