Singapore gamsung ah a gamtatsia Germany gammi 2 tawsat thuakding

Singapore gamsung ah a gamtatsia Germany gammi 2 tawsat thuakding

Singapore gamsung aom SMRT meileng tungah Spray-painting tawh lim asuai Germany gammi 2 te pen mawhmah ung cih Monday ni in pulak khiata ahih manin, mawhnadan thuaktading uh cih Straits Times pan kiza hi.

Tua Germany gammi nihte pen Andreas Von Knorre leh Elton Hinz cih minneite hi uh a, anih un kum 21 tuakbek phapan uhhi ci’n amau ii Lawyer Christopher Bridges in genkhia hi. Hong tungding March 05 niciang in SMRT meileng hawlna ah aguk lutsimna vai zong thukhenna omlaiding a, tuani mahin amahna dan te uh thuakpahding uhhi.

Kumpi neihsa tuabangin bawlsiatna (Vandalism) te pen Singapore gamsung ah kum 3 sung thong ki khiathei a, liausum zong Singapore Dollar S$2000 ki liau sakthei hi. Tuakhit ciangin tawbo lemsiuseu sa in ciingciangduai mahmah tawh tawsat zong 2 vei pan 8 veidong ki pialaiding hi.

Hih Germany khangno te nih ii a Lawyer pa ahi Christopher Bridges in Reporter te tungah agenkhiatna ah tawsat pen 3 vei tuak hiding in ummawh cihzong genkhia hi. Tuazong aki thuumthuum uhciang in hehpihtak in akikhiamsuk mahmah hihtuak laihi.

Nungkum November khasung in MRT meileng khawlna ah hih khangno tegel lutsim in, lim a utbang un na suaigawpmawk uhhi. Kumpi neihsa vantung ah lim phengsuaihna bektawh hilo in, MRT meileng khawlna huangsung ah phalna omlopi in aguk lutsim uh hisawnsawn ahih manin, amawhna uh liansemsem hi.

Singapore sungah agamtatna uhpen amau ahihlam ki theipaklo a, anih un Malaysia gamsung Kuala Lumpur Airport pan aki mankhiazopan ahihi. Kuala Lumpur International Airport pan Austrlia gam zuanin azinsawm laitak akiman hi a, tuapan in a gamtatsiatna uh ahi Singapore kumpi thuneite kiangah ki puakkikpah hi.

Hih thuthang in ei Zomi te ihphawkding thu tampi honghilh hi. Migam milei ah ihzin ihvak ciangin agammi te gamtat bangin ih omtheih nading, agam thukhun ih zuihpahding thupi mahmah hi. ZD Sawltak