Singapore ah akitawnggawp Myanmar 7 te kumkhattek thongkiading

Singapore ah akitawnggawp Myanmar 7 te kumkhattek thongkiading

Singapore gamsung Myanmar mite tualbialna phualpi ahi Peninsula Plaza ah buaina piangsak in akitawnggawp te lakah akihel Kawlgammi 7 te thukhenna kinei in, kum 1 tek thongkiading in thukipia cih Yahoo pan kiza hi.

Hih kitotna ah akihel Myanmar gammi akici tengpen Cung San Eng (kum 26), Tluang Uk (kum 39), Ronal (kum 30), Lal Tha Siama (kum 25), Thaung Sun (kum 29), Van Liaw Aung (kum 30), Aung Maw (kum 23) cihteng ahihi. Aminte ih etciang in kuami cih genbehbeh kullo in, ki theipianpah lel hi.

Hih Kawlgammi tengin abeisa June khasung in Peninsula Plaza geinai ah nitaklam 3pm hunpawl akipan zu dawndawn uh cihi. Hih Myanmar gammi tepen Singapore gamsung ah Work Permit vive tawh aom uh hi a, anasep uhpen Construction, Shipyard leh Marine Dredging cihte ahihi.

Tuabang in zudawn in atut uhpen dawnsuaksuak uh a, nitaklam 10:35pm hunpawl ciangin buaina hongkipan hi. Adang zudawn zukham Myanmar gammi mah ahi mi 3 tetawh hih zudawn te Cigarette vai hangin kinial in, kitotna, buaina hongpiang hi.

Tuaciang in ahonhon in kitawng, kitum in ki bawhhuan ngeingai uhhi. Hihbangin tawlpikhat alomlom in akibuangawp khit uhciangin Singapore Police te hongtung in, tuasung ah akihel Cung San Eng, Tluang Uk leh Ronal cihteng mankhia masa uhhi. Tuateng thusitna kinei in, tuakhit ciangin adangte zong abanban in akimatbeh ahihi.

Hih buaina sungah kum 32 aphakhin ahi Wunna akicipa penin thuakgawp hi. Hihpa pen ki tumhuangawp ahih manin, akhepek ataklambang kilawikhia ciliang hi.

Singapore gamsung ah mihon ki kaihkhopbek zong aki deihlo hi a, hih Myanmar gammi tepen mihon ki kaikhawm in ahonhon ki kitawnggawp mawk uh ahih manin, Singapore kumpi thunei te’n zadah mahmah uhhi.

“Little Myanmar” ci’n min akivawhliang ahi Peninsula Plaza sungah mailam ah hihbangdan Kawlgam mite’n buaina abawlkikngam nawnloh nadingin hih kitotna sungah akihel mi 7 tepen kumkhattek thong kiading in zanhal Friday (October 13) ni in thukhenzum Court ah thu kikhenta hi.

Related: Singapore, Yishun vengsung Public Area ah numei khatleh pasal khat omkhawm

Deputy Public Prosecutor Claire Poh in avaikhakna ah Kawlgam naciahkik uhciangin Singapore hongpaisawm nalawm nagual te uh na genkhol un. Singapore napainop uhleh agamsung ah thukhun tawh kipelh in gamta kei un ci’n nagenkhol uh ci’n vaikhak hi. Hih Myanmar gammi tepen ataktak in mikhat kum 7 sungbang thong akikoihthei ahihi. Sawltak #zomidaily