Singapore Airlines ah nasem khatin zuakkikding Suai puaksak ahih manin kiman

Singapore Airlines ah nasem khatin zuakkikding Suai puaksak ahih manin kiman

Singapore Airlines (SIA) vanleng sungah nasem “Cabin Crew” khatin India gamsung ah aki zuakkikding in suai “Gold” puaksak ahih manin kiman cih Straits Times pan kiza hi.

Tua Singapore Airine ah nasem Steward pen Monday (Jan 22) ni in New Delhi aom Indira Gandhi International Airport ah indian Customs Officers te’n amatkhiat uh ahihi.

Singapore Airlines (SIA) paninzong hihvaitawh kisai in thupiang taktak hi ci’n Straits Times te tungah genkhia uh a, SIA flight SQ402 tungah nasemin azui Cabin Crew khat Delhi Customs Authorities te’n aman uhhi ci’n genkhia uhhi.

Tua ahih manin Singapore Airlines te’n hih thusitna ah akisam bangbang in India kumpi thunei te ka panpihding uhhi. Ahi zongin Cabin Crew nasempa ii amin apuam pen Confidential Reason tawh ki pulak khiatheilo hi ci’n genkhia hi.

Airport’s Joint Commissioner of Customs Anubha Singh inzong Indian Media te tungah agenna ah Singapore panin honglengkhia vanleng sungah nasem SIA Steward khat kikhawlsak in, thusitna kinei hi. Tuapa ii pumpi tungpanin Kham suangmanpha Gold akigawm in 1048g ki mankhia hi ci’n genkhia hi.

Tua zuakkikding in kham suangmanpha apuasim “smuggling gold” pen ama neihsa hilo in, midang khatin acialsawn ahihi. Apuakman dingin S$500 (RM1,486) tawh acial ahihi ci’n Senior Official te’n genkhia hi.

New Delhi atunkhit ciangin Hotel khatah apuasak tetawh kimu in piakding in akihokhin uh ahihi. Tua amatkhiat uh Gold tepen Chain leh Bangle cihbang hi a, Uniform nuai ah bulhkawm in apuaksak kici hi.

More: Singapore ah mawtaw honkhat kiphu khagawp, mi 26 liam

Tua SIA Cabin Crew pa in abeisa January 08 ni inzong hihbangdan in Gold pawlkhat puading in ki ummawh a, ahi zongin tuahunlai in kimanlo hi ci’n Indian Express te’n genkhia uhhi. Sawltak #zomidaily