Singapore ah nasemkhat inndawl 22 pan kia in si, aluangin midangkhat dengkha sawnsawn

Singapore ah nasemkhat inndawl 22 pan kia in si, aluangin midangkhat dengkha sawnsawn

Singapore gamsung ah Construction Worker khat anasepna inn kilamsan laitak inndawl 22 na panin kiasuk in si cih Straits Times pan kiza hi. Tuni Wednesday (Mar 01) ni in Marina One ah thupiang hi a, inndawl 22 panin akiasuk ciangin inndawl 3 na ah nasemin aom khatzong dengsukkha cisawnsawn hi.

Singapore Civil Defence Force te genkhiatna ah zingsang 11:10am hunpawl in hongki zasak a, Ambulance nihtawh kidelhpah cihi.

Atuahsia Accident pan mikhatpen aphual ah sipah a, adang khatpen liamna tawh Singapore General Hospital ah kipuak hi.

Asipa pen inndawl 22 panin akiasukpen hi a, kum 21 gualpawl ahihi. Bangladesh gampan in Singapore ah nasem in apai cihi. Inndawl 22 panin akiasuk pen inndawl 3 na ah aluanghawm kimu a, apumpi tungah “Safety Harness” kici nasepna panin akiat khakleh a awhding in akizang khau kithuahlo cihi. Tua ahih manin amahpen nasep laitak akia hiloding kici hi.

Inndawl 3 na atuksuk ciangin adengkhakpa zong Bangladesh gammi mah hi a, amahpen kum 38 pawl ahihi. Amahpen nasem in aomlaitak hi a, upmawhlohpi in atungpan kidengsukmawk in, a ngawng liamlawh hi. Singapore General Hospital akipuak hi a, noptuam in patauh omlo “Stable Condition” bel citasam uhhi.

Hih tuahsiatna aomkhit ciangin hih Worksite sungah nasep khempeuhphial kikhawlbawl hi.

Hih Worksite sungah nasemkhat ahi kum 28 apha Muhammad Nazrul kicipa ii genna ah hih asipa pen amin Tanim ci’n kasam uh cihi. Ama theihna ah South-western Bangladesh, Meherpur District panin hongpai cihi. Hih Marina One Project ah asepzawh kha 9 bang hikhin cihzong genkhia hi.

Amahtawh kaki theihzawh uh kha 3 bang hikhin a, mihoih khat hi. Thungen inzong ka paikhawm zelzel uh ci’n genkhia hi.

Adang anaseppih India gammi khat ii genna ah hih asipa pen nasepna panin akia hilo in, amahleh amah kisihbawl in atuahsuk hiding cih ki ummawh ci’n genkhia hi. Innkuan vaitawh lungsim puakzawhloh khat om hiding kici hi.

Marina One Project ah Joint Venture in “Malaysia’s Khazanah Nasional” leh “Singapore’s Temasek Holdings” te’n avai hawmkhop uh nasepna khat ahihi.

Hih sihna vaipen nasepna panin asi hilo cihtawh “Industrial Accident” in ki ciamtehlo a, “Unnatural Death” tawh kiciamteh in Singapore Police te’n athu kanciansan uh cih kiza hi.

Singapore aom Kawlgammi anaseppih te’n a genna ah asipa pen Bangladesh ah alawmngaihnu in pasal neisan ahih manin, amahleh amah aki sihbawl ci uhhi. Asihma inzong athuteng amah ii a Facebook tungah gelhkhia cihzong kiza hi. ZD Sawltak #zomidaily