Singapore ah Kawlzatui “Ananda Thukha” neklohding in thuneite’n pulak

Singapore ah Kawlzatui “Ananda Thukha” neklohding in thuneite’n pulak

Singapore Health Sciences Authority (HSA) te’n Health Products zatui namthum te leilohding, neklohding in pulakkhia uh a, tualak ah Kawlgam pan akibawl Kawlzatui namkhat zong kihel cih Straits Times pan kizasawn hi. Tua zatui te nekkhakna hangin lauhuai mahmah, Side Effects nasia mahmah ci’n pulakkhia uhhi.

Tua ahoihlo zatui namthumte lakpan namkhat pen Kawlgampan akibawl “Ananda Thukha Remedy for Diabetes” kici zunkhum neite nekding akibawl Kawlzatui ahihi. Adang namnih tepen Senbawl hileh kilawm a, 1 Day Diet leh Bee Brand Qi Li Xiang cihte ahihi.

Kawlzatui “Ananda Thukha Remedy for Diabetes” kici pen Singapore aom nupi kum 60 gual khatin khathum sungkhawng anekkhit ciangin agawl nasa leh thabei kisa ahih manin in siavuan tekiang akilah ciangin ahoihlohlam kitheikhia hi.

Tua zatui pen Singapore Peninsula Plaza aom Kawlsai panin zunkhum kiamtheih nading in alei ahihi. HSA kici Singapore Health Sciences Authority te genkhiatna ah nupinu pen tua Kawlzatui anek ciangin asisan paizia mannawnlo “Agranulocytosis” cimawk hi.

White Blood Cell tezong kiamgawp ci a, zato zong kalnih sungbang luplawh hi. HSA te’n tua zatui kizuakna ah paipah uh a, aomlaiteng etcianna bawlding in matsak uhhi.

Singapore gamsung ah tuabang in kumpi phalna, theihpihna aomlo zatui “illegal health products” azuakte pen “Health Products Act” thukhuntawh kizui in kumthumbang thong kikiasak thei a, sumzong $100,000 ki liausak theihi. Thongkiat leh sumliau zong anihin ki thuahkhawm sakthei hi.

More: Berlin khuapi a Christma Market Lorry zanga migawilum sakpa kithatta

Kawlzatui te kidop huai cih phawkzelzel ni. Singapore ah hoihlo ci’n kumpi thuneite’n genkhia ahih manin, Kawlgam ahzong ihtheihcian lohhang hoihtuan hetlo khading hi. Azangte alauhuai banah gamdang ah phalna omlopi in azuakte zong lauhuaisem hi. ZD Sawltak #zomidaily