Sim in… na khantawn sim in ~ Peter Suumpi

Sim in… na khantawn sim in ~ Peter Suumpi

“Mihing nunna ih cih pen … alianzaw, asah zaw laibu khat ahi hi.” Mihing nuntakna ih cih pen laisim nuntakna ahi hi. Neutung pan in sim toto in teek in ih sih dong lai ih sim hi.

Thutheihna pen laibu pi khat ahi hi. Kum le khuahun te pen laibupi khat ahi hi. Kimlepam na khempeuh pen laibu pi khat ahi hi. Mihing nunna cih pen alianzaw, asah zaw laibu khat ahi hi.

Tua laibu pen nisim in ih sim hi. Ih khantawn ih sim zong in bei zolo hi. Ih tunna peuh ah ihsim hi. Ih sih dong in ihsim hi. Ih simloh manbek hi. Sim ding omlo cih bang omlo hi. Sim khit zawh loh bek thamlo in sim in thutheihna ngahlo cih zong omlo hi. Sim semsem metlawh semsem.

Lampi tung ah ih pai in lampi ih sim in. Lam tang, lam kawi, lam kawcik, lam tanzau cih te leitung ah lampi tampi om in lampi khat le khat kibang lo hi. Tua ahihman in lam cih ‘laibu’ pen ‘asah’ pen ahi hi. Kua mah in atawpna laimai dongsim zo ngeilo hi. Khualzinna ah kisim hi.
Simna in thutheihna hong pia in thutheihna pan ki lungngai hi. Lungngaih kawm in khualzin kizom hi. Khema cih pen na totsa lampi tung aa gual khat khit gual khat, thulu khat khit thulu khat na sim tohtoh te ahi hi.

Zingsang tung in zingkhuavak sim in. Ni khat khit ni khat kisim hi. Nadam sung in nibang zah na sim zo ding hiam? Huihpi guahpi na tuak ni in nibang zah sim man ding na hiam? Zingni in nang sim ding hong ngak lo ding hi. Amah na sim kei leh amahun tawh kizui in hong nusai ding hi. Zingni in nang hong pel hilo in nang amah apel na hizaw ding hi. Amah pen bangzah dong in sim zo ding na hiam cih pen nang ii kuhkalna, nang ii cihtakna le nang ii thadahna te tung ah kinga ding hi. Zingsang khuavak na sim kei leh na awm sungah koi pan khuavak hong pai mawk ding hiam?

Tui na muh leh tui sim in. Tui cihpen leitung ah anem pen, aneel pen ahih sam hangin tuimal te in akhauh mahmah suangtumpi te phulet zo uh hi. Tui thu hoihtak na sim theih leh na phutlet zawh loh ding bang om lai ding ahiam?

Guah lak ah guah sim in. Guah pen vantung pan hong kisawl suk vantung mi khat ahi hi. Guah malneu hitaleh, guah malgol hitaleh, guah tam taleh, guah phin seuhseuh hitaleh amau pen tuma kum tul tampi azukhinsa ahimah bang in tuni dong kikhello in azu uh ahi hi. Tua ban ah asiangtho lo leitung zong hong sawpsiang uh hi. Guah pen khat vei na sim hun sim in na lungtang khat vei siangtho hi. Tui nel kik hi.

Vuk lak ah vuk sim in. Vuk pen bang mah akigelh lo laidal kang ahi hi. Laidal kang tung aa kigelh laimal te na muh theih leh vukte ii lungsim tawng na sim thei ding hi. Tua laimal te vuk bek in thei hi. Asim mi te bek in thei uh hi. Pawl khat te in vuk ii thuman lohna sim uh hi. Pawl khat te in vuk aniimna sim uh hi. Pawl khat te in khuakal hun ding sim hi. Nang e bang sim na hiam?

Huih lak ah huih sim in. Huih cih pen gammangtulak ii hu ahi hi. Tuipi te ii hu ahi ih. Zanglei te ii hu ahi hi. Khuapi te ii hu ahi ih. Na khempeuh te ii hu ahi hi. Leitung pi ii hu ahi hi. Huih na sim theih leh leitungpi ii sihui pi na mu thei ding hi. Tua bang hileh nang ii hu zong leitung ii hu tawh lawngkhat in luangkhawm thei pan ding hi.

Sun nitan ciangin meii te sim in. Meii cih pen mong neilo vangdumpi tung ah kang zel vom zel, san zel, hua lam pawl khat, hih lam pawl khat cih bang in akisuang laidal no te ahi hi. Tua laidal no te tung ah vandum pi ii thusim te adim in kigelh hi. Nisa, guahzu, vukkia cih te, zing ni suak, nitak khuazing cih te thute tua meei te tung ah kigelh hi. Tua meii ten a sim theih kei leh vandum pi ii thusim bang citheih zawh ding na hiam?

Nitak ciang in nitak sim in. Nitak pen thuk in zai hi. Kipatna le tawpna neilo hi. Nitak om kei leh aksi tang te kimu theilo ding hi. Nitak om kei leh khatang omlo ding hi. Nitak om kei leh meitang te omlo ding hi. Nitak na sim theih ciang in nitak khuazing hong khen ciang a etlawm mahmah khuavak na muh ding lam bang ci teltheih ding na hiam?

Lalcin mei nuai ah mei sim in. Lalcin sung ah adang leitung khat om hi. Lalcin pen asiangtho akilangh laibu khat ahi hi. Nitak khuazing pen khuavak apia laibu khat ahi hi. Tua laibu sung ah lai gual khat bek kigelh hi. Tua laigual pen kei le kei ka kuan ciangin khuavak piang cih laigual ahi hi. Mei na sim theih leh na nuntakna sung ah lalcin khat bangin cikmah hun in khuazing in hong tuam nawnlo ding hi.

Mualtung na kahleh mual sim in. Mual cih pen leilu leitaw pan akimu thei laibupi khat ahi hi. Khe tawh mualtung kah cih sangin khe tawh mual ‘sim’ cileng dik zaw ding hi. Mual te eikiang hong pai kei leh ei ih pai ding hi. Mual in ei hong sim kei leh en mual ihsim ding hi. Mual tung kah cih pen mual sim cihna hi hi. Mual thu ih tel ciang in bang zah takin sang in bangzah tak in alauhuai mual ahiphial zong in ih khenuai ah hong om hilel hi.

Mualtung na tun ciang in suangtang sim in. Suangtang cih pen alian mahmah mual te ii laimal te ahi hi. Amel tuamtuam, agolna atuamtuam om hi. Suangtang khat tung ah kum tampi akisel thusim te om hi. Sangtang neu tampi tak akigawm ciangin mualpi hong piang ahi hi. Tua ahihman in mual na sim theih nading in suangtang te na sim theih masak kul hi.

Gammangtulak ah singkung sim in. Singkung cih pen leitung ah akizel penpen a eng laibupi ahi hi. Singkung na sim theih teh “khanna” thu na thei ding hi. Singkung ii khanzia, ateh avul zia cih na sim theih teh phulhzel selzel cih na thei ding hi. Tehngek, tehnai cih te na telteh singgah te ii limna na thei ding hi.

Paak gei na tung ciang in paak thu sim in. Paak cih pen leitung ah apiang masa pen mel namkim laibu pi ahi hi. Paak te tampi na simteh paak te awging na za ding hi. Paak te ii thusim na thei ding hi. Paak ci te na mu ding hi. Asim ding mi om kei leh paak te bang hang palh zenzen ding ahia?

Tuipi gei ah tuipi sim in. Tuipi ii zaina in lungsim puakzia hong lak hi. Golna pen aneu tampi kigawmna hong lak hi. Tamna in atawm tampi kigawmna hong lak hi. Thukna in adai tampi kigawmna hong lak hi. Mong neih lohna in among nei teng akikaihkhopna hong lak hi. Tuipi na simtheih ciangin tuipi bang thuk in na zai thei ding hi.

Gun na tun ciang in gun sim in. Gun pen hoihtak na sim theih ciangin gun sung aa aluangluang te pen tui hilo in ‘setkan’(hun) ahihna na mu thei ding hi. Tui hai khat pen minute khat, tui phelkhai khat nai 1, tui lom khat pen ni khat hileh nisim aa aluang luang guntui te in ‘pusuakna vang’ nei kei tapeuh hen. Pusuakna vang na nei leh nang ii na nuntakna pen avalthong in luangkhia gai ding hi.

Mihing te pumtung ah amaitang sim in. Mi ih muh ciangin amaitang kimu masa hi. Ama gamtatzia na theih nop leh amaitang en masa in. Maitang pen lungsim tawlet khat ahihi. Maitang tung ah lungsim te kigelh hi. Mihing lungsim akikhel teh amaitang kikhel masa hi. Alungsim tawng pen amaitang tung ah kilang hi. Maitang cih pen mong aneilo tangthu khat ahi hi. Cikmah hun in akigen khin zolo tangthu ahihmah bangin cikmah hun in kisim khin zolo hi. Ahizong in amaitai khempeuh lungsim hoih hilo in lungsim hoih khempeuh zong maitai khin lo thei hi.

Vandum nuai ah vandum sim in. Nang gol na kisakna pen leitung ah sehnel cia bek hi. Leitung gol ih cih pen ni te lak ah sehnel cia bek hi. Ni gol ih cih pen vuklampi ih cih (milky way) sung ah sehnel cia bek hi. Vuklampi ih pen universe sung ah sehnel cia bek hi. Nang bang zah in gol kisa lai na hiam?

Meiisan asuah ciangin meiisan sim in. Meiisan pen lamkhat pan en leng nitum hun cih lahna ahi hi. Adang khat in en leng nisuah hun cihna zong ahi hi. Meiisan ii hoihna pen meiisan hun laitak bek in kimu thei hi.

Akah ih sim teh akiam ki thei hi. Agamla ih sim teh anai ki thei hi. Amai lam ih sim teh anunglam ki thei hi. Amanlang ih sim teh aziakai ki thei hi. Agik ih sim teh azang ki thei hi. Azai ih sim teh atoi kithei hi. Athukna ih sim teh adaina ki thei hi. Asahna ih sim teh apan ki thei hi. Agamtang te ih sim teh adaikhinkhian te ki thei hi. Ataktak te ih sim teh ataktak lo te ki thei hi.

Melsiatna ih sim teh melhoihna ki thei hi. Guallelhna ih sim teh gualzawhna kithei hi. Zuau thu ih sim teh thudik ki thei hi. Gimna ih sim teh tawldamna ih thei hi. Golhgukna ih sim teh siangthona ki thei hi. Khuazing ih sim teh khuavak ki thei hi. Nitak ih sim teh zingsang ki thei hi. Phalbi ihsim teh khaal ki thei hi.

Tuipi ih sim teh liatna ih thei hi. Kigawmna ih sim teh thahatna ki thei hi. Muvanlai ih sim teh van ah sanglenna ki thei hi. Mei ih sim teh alumna kithei hi. Natna ih sim teh damna ki thei hi. Khanghamna ih sim teh khangno na ki thei hi. Sihna ih sim teh nuntakna ki thei hi. Lopa te sim teh thuakzawhna ki thei hi. Hun ih sim teh amanlang na ki thei hi. Supna ih sim teh amanphatna ki thei hi. Gam khat ih sim teh khantohna le kiamsukna ki thei hi. Leitung pianzia(nature) ih sim teh tha kingah hi.

Itna ih sim teh itna ki thei hi. Huatna ih sim teh huatna ki thei hi. Mihing te ih sim teh mihing te ki thei hi. Mihing te khat ih sim pen laibu khat sim tawh kibang hi. Thupitna, cihtakna te sim cih pen piano khat tung aa lampai tawh kibang in akalsuan sim in zaknop tak in ging hi. Zuau thu le cihtaklohna ih sim teh buanlak aa lampai tawh kibang in ih sikna khempeuh nin in buang bang hi.

Pasal te sim in. Numei te sim in. Numei cih pen pasal te aading leitung ah za vei asim zong in acimthak theih loh laibu hoih khat ahi hi. Pasal cih zong numei te aading in leitung ah za vei val asim zong in acimthak theih loh ding laibu hoih khat ahi hi. Hih laibu na tel dong in na sim zawh leh na nuntak sung in lungnopna tawh na kidim ding hi.

Lawm le gual neilo in khattang hihna pen na tel dong na sim leh cikmah in khattang na kisa nawn kei ding hi. Lungzinna pen atel dong in asim mi pen cikmah in lungzing nawnlo hi. Thuakna te hoihtak asim mi in thuak zo ding hi. Itna thu atel dong asim mi in itna khangsak semsem hi. Lungnopna asim mi in alungnuam zawkan lai ding hi.

Guah meiikai nuai ah nitan ni ih sim ding hi. Nitak khua zing sungah vandum pi ih sim ding hi. Singteh nai te sung pan singteh ngek te ih sim ding hi. Sehnel gam sung pan oasis ih sim ding hi. Hih bang na hihleh mi maimai khat ii ngah zawh loh ngaihsutna na ngah ding hi.

Leitung ah asim hak penpen in mihing te lungsim ahi hi. Tua ban ah nang mahmah zong na hi hi. Midang te na tel dong in na sim theih hang in nang le nang na tel dong in na kisim theih ding haksa hi. Mihing te nuntakna pen laisimna bek hilo in ei le ei zong ki simna ahi hi. Athupi pen in ei le ei kisim in ei le ei ih ki it ding ahi hi. Amau le amau a ki-it mi te bek in midang it thei in midang te manphatna zong mu thei uh hi. Peter Suumpi Source: www.duwenzhang.com