Siksakol maw, sakolsik? ~ Dimno’ Pa

“Siksakol ai ve,” hi kei veh aw, “ Sakolsik hi” ci-in lawmte khat tawh ka kinial hi. Museum khat ah lawm pa tawh kapai uh leh ahuang sung ka lut kuan un ka gaal vuah sakol khat ka gaal muh uh hi. Agei ka tun uh ciangin ka velvel vua leh sik ( iron ) tawh aki bawl ahih lam thei pan ung. Tua laitak in ka gaal pan un Museum lam manawh in hongpai mikangte khat in a setbing ( Bicycle ) tawh ka pang’pan in hong nawk kha vat hi. Keizong bangmah thei khol lo ka hih manin thakhat thu in patau vat in, “ Nu voi…bang ai a” ci-in ka awng khavat hi. Ka lawm in “ bang ai aa… na ot…hongdah sak vat nai aw” hong ci-in, kei zong “ hua siksakol in ka kigin loh laitak hong nawk khavat ai ciang a,” ka ci hi.

Ka lawm zong bang ngaihsun hi ding hiam, “abang maw… siksakol in hong nawkkha na cih, hih sakol in na koi lai hong nawk kha-a… mi’ dipkua sak dingin awng lualua,” hong ci hi. “Hi lo… hih i mai aom siksakol agen hi kei veng aw, hua tak a, apai pa agen hi’ng, hua siksakol tuang pa e,” ci-in mikangpa ka khut in ka kawk veva a, hihpan in ki nial ki panpah ung. Ka lawm in, hih i mai aom sakol liim pen siksakol hilo ding hiam, hong ci hi. Tualai tak in ka mai uh ah siksakol i cih setbing ( Bicycle ) leh sik taktak aki bawl sakol ( liim ) pen hong omkhawm lian ahih manin koi zaw siksakol taktak hi zaw ding hiam ci-in ka khen thei kei hi. I pu i pa te’n hih setbing pen bang hangin siksakol ci-in, min pia ahi tam? Sik taktak a kibawl nuntakna anei lo, sakol liim ciang ee leh bang min pia ding a, bang i ci tam ci-in ka lung hong mang peuhmah hi.

Kei ngaihsutna ah setbing pen siksakol aki cih na hangin:- sakol pen ei khamtung ( Zogam ) ah van puakna; ei’tha a i puak zawh loh vangik puak na’ng, sum lei-sum zuak na-ah vanpuakna ding, khualzin gamvak na-ah puan lom, nguai, vaimiim, gatam…etc..cih te puak nadingin ki zangh a, ei khamtung nuntakna ah nuntak khuasak zia hong noptuam sak in, leh sum bawlna, sum thalawhna in zong ki zangh thei lai ahih manin, ei hong nungta sak tuam cih ding hi. Khamtung ah sakol a omlo hi leh i nuntakna pen a haksa mahmah ding na hi a, i nuntak zia zong hih ci ciang tung zo nailo phial ding hi.

Tuamah bangin Zanggam ah setbing in na tampi tak hong dawn in nuntakna ding thu tampi tak ah hong huh hi. Khua khat leh khua khat ki hawh na, vangik puak suk puak toh na a kipan khual gamlapi pai na-ah khe tawh kipai nawn lo-in setbing vive tawh kipai ahih manin, ei mihing’ tha hong dawn mahmah hi. Setbing nei kei le hang zanggam ah khe neilo tawh aki bang phial hi mawk a, zong aki nungta zolo phial ding hi mawk hi. Ahi zongin setbing alei nailo te lah nungta veve sam! Ka cihnopna-ah hih setbing min dingin siksakol min apia, i pu i pa te’n Khamtung ah nuntakna ding i zonna ah sakol aki zat mah bangin, Zanggam ah zong setbing pen Khamtung ah sakol aki zat mah bangin ki zangh ahih lam thei hi. Tua ahih manin setbing min dingin sakol min mah na la-in ( setbing pen sik na hi mawk ahi manin amai ah sik beh lap in) siksakol aphuak hi dingin um mawh ing.

Ka mai ah setbing ( Siksakol ) leh sik taktak a kibawl sakol khat ka tuah ciangin koi zaw siksakol taktak hi zaw ding hiam? ci-in ka teel sawn ding thei lo-in lungmang in tawlkhat sung ka om cip hi.

Koi zaw siksakol hi ding a, koi zaw sakolsik hi ding hiam? Anih in siksakol mah ci ding i hiam? Sakolsik cih bang aom thei mah diam? Sik tawh aki bawl sakol zong amin ding pen Siksakol mah hi sa lo nai vuam ? Setbing zong Siksakol mah ci-in, sik aki pawl sakol zong siksakol mah ci ding i hiam? Siksakol tuak mah min apia hi le’ng, i gal ah anih in na om tuak leh,“ hua…gal a siksakol pen” ci le’ng akoi zaw agen hi ding i hiam o leh guai????????

By,
Paukap