Siampi maw Pastor? ~ Lian Muan Kim

Siampi maw Pastor? ~ Lian Muan Kim

Siampi le pastor tawh kisai ngaihsut khialhna om theizel ahih manin tua i ngaihsut khialhnate lakah thunih bulphuh-in thu kikum ding hi hang.

1) Ordination kipiakna pen siampizaa kipiakna, ahih kei leh siampi suahna kisa kha hi. Ordination cih kammal pen Latin kam ‘ordo’ pan hi-a, ‘seh,’ ‘koih’ cihna ahi hi. LST sungah Zeisu in a nungzuite paikhia-a gah hoih a gah na ding uh a sehna (John 15:16),pawlpi sungah upa sem dingin mi 7-te a sehna uh (Acts 6:3), Egypt gam makai dingin Joseph a kisehna (7:10), pawlpi makai ding seh in, ci-a Paul in Titus a sawlna (Tit 1:5), Thuciam lui hun lai-in biakna nasem dingin siampite a kisehna (Heb 5:1), cihte kimu thei hi.

‘Seh’ cih kammal ahih lian loh hangin mission kuan dingin teelkhia (Acts 13:2), pawlpi sunga nasem dingin lu tungah khut nga (1 Tim 4:14), cihte zong kimu thei-a, pawlpi nasem dingin lu tungah khut nga ziauziau lo ding (1 Tim 5:22), cih zong kimu thei hi. Tua hi-a, ‘seh’ cih kammal lian sangin a thu thupi zaw a, Pasian nasemte kisehna, kiteel khiatna, Pasian sap mite mipi mai ah kipsakna, cih a thupi ahi hi. Tua ahih manin ‘ordination’ pen Pasian teelsate kipsakna hi lel a, ‘zaa khanna’ hilo-in panmun kilaihna zong hilo hi.

Ahi zongin tu hun ciangin ‘ordination’ ngahna pen siampizaa ngahna-in I ngaihsun kha hi. Tua ahih manin ordination i ngah ciangin Siampizaa ngah ci-in zakhanna, zaliatna, thuneih zawkna, thupi zawkna, leh khami zawkna khat-in i ngaihsun a, gualzawhna nam khat-in zong ngaihsun ihih manin ganpi ganta tawh ki lawm/ai hi. Pawlkhatte bang in Reverend ngahte pen a khami mahmah pah ding, a mawh thei nawnlo liang dingin ngaihsun uh a, amau thungetna bek a kidawngding sa uh hi. Pasian ngiat in zong thupi a sa zaw pah keei dingin ngaihsun uh a, Reverend sia omlohna pawlpi bang pawlpi picing lo-in ngaihsun uh hi.

A dahhuai simsim thu khat ah Reverend sia a omloh manin (siampizaa ngah I omloh man) pawlpi pawlkhat in nekkhawm i ne kei a, i nek phial le zong Reverend sia khatpeuh hong zin zawh ni bek-in ne ihih manin kha 6 khatvei maw, kum khat khatvei maw, khawng bek nekkhawm kine kha thei hi (‘Reverend’ zong Latin kam ‘revereri’ pan hi-a, ‘zahtak,’ ‘zahtak huai’ cihna). LST in nekkhawm pen i nek zelzel, i nek mun sim pian dingin hong gen hi (1 Cor 11:25, 26).

A tawmpen kha khat khatvei peuhmah hi leh maw! Lengla siate in nekkhawm hong piak ding uh sangin khuatual pawlpi siapa, tua pawlpi sunga kha tawh a kidim, a picing khatpeuh ih nekkhawm piakna zong LST tawh kituak zaw lai hi. Banghang hiam cihleh khuatual pawlpi pen tua pawlpi ah thunei pen hipah a, mipite in sia-a a zat pen uh zong tua pawlpi aa dingin a kilawm pen, nekkhawm pia dinga a kilawm pen ahi hi. I pawlpi siapa sangin a pua lam pana hong pai sia khatpeuh thupisak zaw kha mawkmawk kei ni.

2) Pawlpi siate siampi kisa takpi uh ahih manin sehsuah khempeuh amau ngah ding bekin ngaihsun kha om hi. Tua ahih manin pawlpisia pawlkhatte in sehsuah khempeuh ko aa ding hi, ci uh hi. Evangelist sia pawlkhatte leuleu in sehsuah pen na utna peuh uah pia lel un; Pasian nasem khatpeuh pia lel un, ci kawikawi uh hi. Pawlpi bekah kipia leh amau ngah kha lo ding! Tua hi-a, pawlpisia/pastor-te leh siampite a kibang mah uh hiam, cih kikum masa ding hi hang.

Siampite:

Aaron khang pan siampi gui hong kipat ma-in siampi tam simsim om khin hi: Melchizedek (Gen 14:18), Moses sungh pa (Exo 4:1), Israelte Egypt gam pan hong paikhiat-un siampi honkhat in zui (Exo 19:22, 24), Midian-te siampi (Exo 18:1), Josephsungh pa (Gen 41:45), leh pasian tuamtuamte’ siampite zong kimu thei kawikawi hi (1Sam 5:5; 1 Kings 12:32; 2 Chro 139).

Siampite pen mihingte le Pasian kikal-a palai hong sepsakte hi uh a, Pasian tunga hong thumsakte ahi uh hi. Zeisu in eite aa dingin Siampi Lian hong sepsak ahih manin siampi i kisam nawn kei hi (1 Tim 2:5; Heb 8:6; 6:19-20; 7:23-28; 9:11ff).

Zeisu hun lai-in siampi 18,000 bang om hi, ci-in Jeremias in gen hi. Tua 18,000- te pen pawl 24-in kikhen uh a, kaal simin biakpiakna pia kilaih den uh ahih manin pawl khatin kum khatin nih vei bek biakpiakna pia kha uh hi (Luke 1:5). Tua banah kum simin Jerusalem ah pawipi thum a siim dingin pai den uh hi. Tua pawi sunga siampi sem dingte aisan (lot) uh a, a ngah peuhpeuh in sem pah uh hi (1:8-23). Tua hun teng longal a inntek uah om lel uh a (1:23, 57), sep ding khatpeuh a om le zong sem lel uh hi.

Gtn: phaknatna a neite a dam uh leh, dam takpi maw cih pen siampite in sit phot uh hi (Mark 1:44; Luke 5:14; 17:14). Pasian hehpihna tawh siampi tampite zong Zeisu umin piangthak uh a, pawlpi sungah hong lut uh hi (Acts 6:7). Ahi zongin pawlpi sungah zong siampi/sia/pastor sem pah uh hi, cih om tuanlo hi. Siampi/Levi piangthak tampi lak ah missionary/pastor a sem khat bek i mu thei a, tua pen Barnabas ahi hi (Acts 4:36).

Siampi khempeuh Levi mi hi uh a, ahi zongin Levi khempeuh siampi hilo hi, icih mah bangin Levi tampite pen siampi suak ngeilo uh hi. Ahi zongin biakna nasep sem veve uh a, amau zong siampite mah bangin pawl 24-in kikhen uh hi (Zeisu hun lai-in Levi 10,000 val om, Jeremias in ci). Biakinnpi sungah bang sem deuh uh hiam cihleh music lam tavuan la diak uh hi. Mimal-in a min uh kilo ngei khollo a (Luke 10:32; John 1:19), biakinn huang sungah palik zong sem uh hi, ci hi (Middoth I, 1-2). Tua ahih manin Zeisu a mante lakah ‘officers’ a cihte pen levi-te hi kha ding uh hi (John 7:32, 45-52; 18:3, 12).

Zeisu sih zawh kum 40 khawng ciangin Josephus in Rome kumpi Nero tungah Jerusalem khuapi a thupina a genna ah, Jerusalem ah Paisanpawi in (AD 66?) tuu 256,500 kigo hi. Mi 10 ai dinga tuu khatta a kigo ahih manin mi 2,565,000 bang pha hamtang ding hi, ci hi (Jewish Wars 6, 9, 3). Siampi a tam mahmah zek kei leh tuu 256,500 tawh biakpiakna piak ding pen baih hetlo ding hi. Tuu gawh na ding mun-a akisehna mun bek ah a kigo hi leh gawh khatin tuu 600-ta bek kigo thei ding a, tuu 256,500 a kigawh na dingin nai 417 bei-in ni 17 val bei ding hi, ci uh hi.

AD 70 kum-a kipan Jerusalem biakinnpi a om nawnloh zah khatin siampi zong om nawnlo a, biakna nasem Levi-te, cih zong om nawn lo hi. Biakinnpi a om nawnloh khit nungsang Biakinnpi sunga nasep teng leh nasem teng zong a kisam nawnlo ahi hi. A om lai phial uh hi mah le zong Judahte ngeina tawh a kalsuan suaksuak uh ahih manin pawlpi tawh kisai kha vetlo hi. Pawlpi pen AD 30 khawnga kipan hi-in, a diakdiakin sawltakpite le Zeisu sanggamte in makaih uh hi – pastor sem uh, cih ding hi mai hi.

AD 70 ma-in mun tampi, gam tampi ah pawlpi tampi kiphut khin a, tua pawlpite ah pastor zong om khin hi. Gtn: Crete tuikulh-a pawlpi tuamtuamte ah Titus makaihna tawh pastor a kikoih pen AD 65 ma hi limlim hi. Paul pen AD 70 ma-a si hi a, a sihma-in ama tungtawn-a piang pawlpite in pastor nei kim khin uh hi. Piangthakte in a citpiaknate uh pawlpi ah pia uh a (Zeisu hong paikik dong), Judahte in bel a sehsuah/sawm-a khat uh biakinnpi ah piapia lai uh hi (AD 70 dong). Tua hi-a, pastor le siampi pen kisai vetlo ahihna kimu thei hi.

Siampite Hihna:

• Aaron leh a suan a khak (Exo 28:1, 44; 30:30)
• Siampi khempeuh Levi mi, levi khempeuh siampi hi khin tuanlo
• pasal hi hamtang ding (Exo 28:1)
• kum 30 pan 50 kikal hi ding (Num 4:3)
• poina hemna neilo ding (Lev 21:16-23)
• Hoih tak-a zi nei hi ding (Lev 21:9, 14)
• Numei kizuak tenpih lo ding
• Nuthawi tenpih lo ding
• Siampi khatpeuh ih meigong ahih kei leh meigong tenpih theilo
• Siampi lianpa in ama minam, nungak bit bek tenpih thei ding
• Damlohna neilo ding (gtn: phaknatna, Lev 22:3-9
• Khamul heuhlo ding, sam heuh ding (aih hang meet lo ding, Eze 4:20; Lev 21:5)
• puan hoihtak-a silh sitset ding (Exo 28:1-4; Eze 44:17-19)

Ngaihsut pak ding:

Aaron khang bangin pastor khang kizom ding hi leh bang i suak zen tam? Pastor pen Levi minam hi hamtang ding hi leh kuan sem mawk ding? Kum 30 pan 50 kikal bek hi leh a sem nawnlo ding tam si ni e! Poina hemna a neilo bek hi mawk leh…zi le ta vai ah paubanna a nei vetlote bek hi leh e … a cidam sitsette bek hi leh, khamul heuhlo sam meetlo ding ci lailai … siampi le pastor bel a kibatna taktak om kei mai!

Siampite Nasep:

• Pasian thu/thukham hilh ding (Lev 10:8-11)
• Mi kitawngte thu khen ding (Deu 21:5)
• Gangawh biakpiakna pia ding (Exo 29:38-42)
• Mi siang mi nin sit ding (Lev 13-15)
• Paknamtui hal ding (Exo 30:7-8)
• Mipite thupha pia ding (Num 6:22-27)
• Pasian thupha pia/phat ding (Deu 10:8)
• Biakbuuk keem ding (Num 3:38; 4; 16)
• Biaknatau keem ding (Lev 6:8-13)
• Biakbuuk sunga khuaimeivak le anlumte keem ding (Lev 24:1-9)
• Biaknataute ah meei mitsak ngeilo (Lev 6; 12-13)
• Pengkul mut (Num 10:1-10)

Ngaihsut pak ding:

Siampi le pastor a kibatna a gen ding hi leng i gen theih ding taktak khat bek om mai hi – Pasian thu hilh ding! Tua lo dangte bel kibatna om lo mai hi. Siampi le Pastor kibanglo ahih leh … Siampi le pastor kibanglo ahih leh ka sehsuah piak a kul nawn diam, kua tungah bangzah bangci piak ding ka hiam, Pastor-te koicih ding, cih dotna tuamtuam hong om pah hi.

Sehsuah piak a kul nawn diam?

Thuciam Lui sungah sawm-a khat nam thum om hi: 1) Israelte in siampite le levi-te’ nek dingin sawm-a khat pia uh hi (Lev 27:30-33; Num 18:21-32); 2) A lo sung pan a piang khempeuh I sawm-a khat pia uh a, biakinnpi ah hong paipih uh hi (Deu 14:22-26); 3) Kum 3 a cin simin sawm-a khat piakbeh uh a, amau khua ciatciat ah khol uh hi. Levi-te, meigong tagahte, leh pemtate aa dinga a piak uh ahi hi. Tua hi-a, Israelte piakkhiatna pen 10% bek hilo-in 23% bang ahi hi.

Levi-te tunga a piakte uh pen biakbuk kepna (biakbuk lamna, puahna, tuahna,ctp.), biakbuk sunga a nasepna uh leh biakbuk sunga van siangthote hoih tak-a a kepna dingun kizang hi (Deu 18:21-24). Tua banah Levi-te nangawn in amau sawm-a khat ngah sung panin sawm-a khat mah khenkhia uh a, siampite pia lai uh hi (Deu 18:25-32; Mal 1:6-14). Tua hi-a, siampite longal in sehsuah pia tangtang uh hi.

Mipite in siampite le Levi-te nek ding, biakbuk tawh kisai-a zat ding, leh meigong tagah pemta-te aa dingin a neih khempeuh uh pan 23% bang pia uh a, Levi mite in amau tunga kipia sawm-a khat lak pan siampite aa dingin sawm-a khat mah piasawn lai uh hi. Zeisu hong sihma-in mite in 23% bang pia uh ahih leh hehpihna hun-a nungta, ei thu-umte in tua sangin tawmzawsak sam ding i hia!

Kua tungah bangci piak ding ka hiam?

Siampite longal in sehsuah pia uh a, siampite, levi-te, mizawng dampam pemtate ading leh biakinn vai tawh kisai-a zat dingin pia uh hi. Pawlpi kiphuh khit- akipan pawlpi sungah pia uh a (Acts 4:34-37; 2 Cor 8:10), pawlpi nasemte aa ding (Phil 4:15), mizawng daipamte aa ding (Eph 4:28), leh cimawh huh na dingin pia uh hi (1 Cor 16:1-3). Bangzah pia ding cih lian omlo a, piak zawh zahzah piak ding ahi hi. Neih nailoh sung pan hilo-in neihsa sung pan a, khenkhiat ding ahi hi (1 Cor 16:2; 2 Cor 8:3, 11, 12).

Tapa khat bek a neihsun hong pia pa, i neih khempeuh hong piapa aa dingin sawm-a khat bel tawmlua hi (2 Cor 9:5-8). I piak ciangin lawp tak leh cingh tak-in piak ding hi a, sawl zawh thu, pia lo-a om theilo ding, cih ngaihsutna tawh hilo-in lungkim tak leh phal tak-a piak ding ahi hi (2 Cor 8:4, 7, 8; 9:2, 5-8). Ahi zongin pia un, ci-a hong kisawl ahih manin zong piak ding ahi hi (1 Cor 16:1). Tawm a vawh te’n tawm at dinga tam a vawh te’n tam at ding hi (2 Cor 9:6ff).

Pastor-te koicih ding? Bangzah pia ding?

Siampi hilo uh ahih manin sawm-a khat (sumpi khempeuh) amau ngah ding hilo hi. Ahi zongin hoihtak a pawlpi a makaih makaite, a diakdiak in thugen le thuhilh nasep hanciamtak in a semte in pahtawina a zah nih a ngah ding uh a kilawm hi. Banghang hiam cihleh Lai Siangtho in, “Bawngtal in buh a cil laitak in a muuk hencipsak kei in. Na asem mi in thaman a ngah ding kilawm hi,” a ci hi (1 Tim 5:17-18). Kua in ama sum zangin galdo in kuan ahi hiam? Lenggah kung suan a, a gah a nelo kua om ahi hiam?

Ahih kei leh gankhawi in a nawi a nelo kua om ahi hiam … Moses thukham sungah, Bawngtal in buh a cil laitak in a muuk hencipsak kei in, ci in a kigelh hi. Pasian in hih thu ah bawngte a cih nopna ahi hiam? Ahih keileh eite hong gennopna ahi hiam? A taktak in eite aa dingin a kigelh ahi hi. Lokhopa in lametna tawh lokho a, lametna tawh buh a cilpa in zong a lamet pen a ngah theih nadingin buh a cil ahi hi. Note aa dingin khalam thu khaicite hong vawh khin ka hih manun note tung panin leitung nate ka ngah uh hangin lianlua ding ahi hiam…

Tuamah bangin lungdamna thu a tangkote in lungdamna thu mah kivakna in nei uh hen ci in Topa in thu hong pia zo hi. (1 Cor 9:7-11,14). Pasian thu a kihilh mipa in a hilh mipa tawh na hoih a neih khempeuh zangkhawm tahen (Gal 6:6). Tu in, sanggamte aw, note lakah nasep a hahkatte le Topa sungah note hong makaih a, thu hong hilh mite na zahtak nadingun kong thum uh hi. Amaute nasepna hangin itna tawh na thupi ngaihsut mahmah un (1 Thess 5:12-13a).

Thukhupna:

Upate le pawlpi mite aw, i pastor-te hoih tak i et mateng Pasian thu a mang nailo ihi hi. Pastor-te in zong i sep ding teng hoihtak i zawh kei leh a zumhuai ahi hi. Thuman ding haksa sa kei ni. Sumpi khawng it tentan se dah ni. Sumpi it tentan-a, pastor-te khasum khan ding khawng haksa a sate pen piakkhiatna a hat pawl hi khollo zaw uh hi. Nang sum na it leh phamawh kei.

Nangma neihsa ci ni. Ahi zongin banghangin pawlpi siate in nang hangin gilkial lawh liang ding uh ahi hiam? Pasian sum Pasian nasepna-a zat ding hi-a, bank khawnga koih euau ding hi masa lo hi. Biakinn sangin siate thupi zaw a, inn le lo sangin nuntakna thupi zaw hi. Judahte in siampite a vaak mah bangun pawlpite in i pastor-te vaak ni. Vaak nuam limlim peuh le hang Pasian in hong vaakzo sak ding hi. Dr. Lian Muan Kim, Ph.D