Sialtang Tui lakna thu ~ Tual Khaw Mang @ Mangtal

Sialtang Tui lakna thu ~ Tual Khaw Mang @ Mangtal

Tedim khua pen, tang khualui khat hi ci-in ki ciamteh hi. Tedim khau ah a kiten cil lai-in, gammang tulak tampi lak ahih ban ah guahtui tam a, ciktui phul tuamtuam om ahih man-in tuinek haksa lo kici hi.

Mangkang te in Zogam hong sim zawhteh, Tedim khua ah gam ukna zum hong phut a 1900 kum in, Tedim khua pan tai 4 a gamla Kentangtui ( Balzangtui) kici nala uh hi. Tua hun lai-in, Kumpi zum lampan gum-uk vuandok zum, lam lam, zato lam le palik tawm khatbek om a, khuapi ( station ) sung ah a ut peuh kitengsak lo-in, a teng mi inn 30 bek na pha uh hi. Mi tamlo ban ah tui ki phengzat lo-in, a hunhun in kihong, kikhak ahih man-in tui kikham den hi.

Leitung galpi nihna sung ah, Mangkang kumpi galkap, 17th Indian Division-te ne ding-in Zalui-tui letmat 4 tuizawl tawh, set mun li ah kiphut in kihuptosak hi. ( Tua tuizawl luite tu-in meikhuam a kizang om in, khua kiim pawlkhat ah tui zawl mah in kizang lai hi.)

Leitung galpi nihna abei zawh, Kawlgam suahtak ngah hun tawh kizom to-in, Tedim khuapi ah Kumpi zum leh nase tampi kibehlap a, khuapi a teng nuamte innmun kipia in kitengsak a, mi azah tampi hong khan ban ah, singkung teng kiphuk mang a, khuahun leh guahtui te maan nawn lo ahih man-in tui haksa mahmah ta hi. Nidang lai in, Tedim khau ah guah zuk loh kha om ngei lo tham lo-in, phalbi lai zingsang daitui kia pen guahzu mah bang zo hi. Ankam, anteh, sawlbawk te tui buak kul lo-in hoih mahmah hi.

Kawlgam suahtakna I ngah zawh ciang, Tedim khua ah inn le mi tampi kibehlap ahih man-in tui hong haksa mahmah ta in, tui hang-in numei naupang kitot na, buaina tampi hong om hi. 1962 kum Revolutionary Government in kumpi asep zawh 1963 kiim pawl in Japan-te gal liau sum ( compensation) tawh, PVC tuizawl tawh Sezang khua nawl luitui kila a, tampi tak nuam tuam hi.

Nidang a Tedim Myoma veng bek hi lo, Sakollam veng, Lawibual veng, Leilum vengte ah inn le mi kibehlap thak in 1972 hun ciang in Tedim khuapi ah inn tul nih pha in, mi tulsawm bang hong pha ta ahih man-in tui hong haksa mahmah hi.

A khat veina Pyithu Council hun sungin Tedim gam Phithu Hlutdaw Kusale Col. Khen Za Moong makaihna tawh Sialtang tui lak ding kivaihawm a, inn tui lakding ki vaihawm a, inn tui atungsak nuamte in inn khat dangka Ks 700/- kong zing tui a ne nuamte inn khat Kyats 200/- kidong a, sum tul zanih bang a kingah tawh 3’’ PVC pipe 20’ sau, tawn 700 kilei hi. Tuate bulphuh in, anih veina Council hun-in ki zomto suak hi. Tua lai-a vaihawm a sempi pen lam vuandok Suan Za Kam ahi hi.

A nihveina Council kipat cil lam in tua hun lai a, Magwa a asem. GE Vuandokpa Pau Za Mung in Magwe khua Mechanized Agriculture Department, Rural Water Supply Department a thunei U Soe Myint in, amau nasep ahi tui haksatna munte ah tui ngah na’ng sepsaknate na gen a, Pa Pau Za Mung in zong deihsakna tawh thu hong zasak hi.

Tua hun lai a, Council Chairman Pa Neng Khen Thang le E.C. member Pa Zam Cin Thang-te sawlna tawh zum vuandok a sem Pa Tual Khaw Mang Magwe ah vapai in, U Soe Myint tawh va kimu hi. U Soe Myint lam lahna tawh kizui-in Rangon R.W.S.D. aa Director U Ngwe San in, gam sung khuate ah tui ngah na’ng kivai hawmsak ding leh sep ding amau nasep hawmsak ding leh sep ding amau nasep hi. Ahi zong a tunglam pan hong kisawl kul hi, a na cihna thu tawh Pa Tual Khaw Mang hong ciah hi.

Tedim gam Party-te lam lahna leh Council-te makaihna tawh, Tedim khua tuinek ding Sialtaang tui lak na’ng tunglam ah lai hong gelhsak na’ng in Pyine Council ah lai kigelh hi. R.W.S.D. pen in khuapi (town)-te tui nek ding hong vaihawm sak theilo ahih man-in, khua kiim, khuate ahi, Phunom, Suangpi, Dimpi, Dimlo, Saizang, Phaileeng, Sezaang, Lamzang, Gawngmual, Tuilang, Lailo, Teeklui le Tualzang khuate paulam-in hilai kigelh hi. Pyine Council panin zong Vuanzichoh zum ah lai hong gelhsak pah hi.

Tawlkhat khit ciang, Party-te lamlahna tawh council EC member Pa Zam Cin Thang leh zum viandok Pa Tual Khaw Mang Rangoon ah pai-in, vuanzichoh zum ah a va kan uh leh, tua thu bangmah seploh in na kikoih a, vuanzichoh zumte in bangci sepding ka thei kei uh hi, na ci hi. Tuan ciang in tua hun lai aa Vuanzichoh zum Director a sem Ministry of Arriculture and Forest zum ah a lai pia in, Mechanized Agriculture Department ah lai hong gelhsak un ci-in a lai lapah in, DG U Hlaing Myint kiang ah a lai piak khawmin, a kisapna thu teng va gen a, a piang thei ding leh piang theilo ding hong tehsak ning in, ahih theih ding leh, UN ah tuitawh kisai kikupna ah hong gensak ning ci-in a bupi a teh ding le a en ding in AE U Saw Oo le Inspector U Hla Thein Oo hong sawl a, Pa Zam Cin Thang te tawh tonto pah hi. U Saw Oo te in ahoih theithei ding in hong gelhsak a, RWSD pan UN ah hong gensak pah hi. UN ah hong huhna tampen ahih man-in Australia gam tawh hong kizomsak hi. Party-te lam lahna tawh Township Council Chairman Pa Neng Khen Thang le Zum Vuandok Pa Tual Khaw Mang, Yangon pai leuleu a, RWSD Director U Ngwe San zum ah Australia Ambassy a Second Secretary pa leh, Australia-te’ Kawlgam tui nasepna ah taangmi ahi John Gildea-te tawh kimu uh hi. Tua khit a sawt lo in, RWSD a Director U Ngwe San le John Gildea te Tedim ah hong pai leuleu a, Sialtang tuinak teng zong en-in tuizawl pai nang lampi zong a hampi en pah uh hi.

Tua hun laitak in leitung bup kipawlna, UNO ah Water Supply Decade a kipat hun ahih man-in UNICEF lam pan in zong sep nopna hong om a, Yangon UNICEF ah Water Project lam a, Programme Officer pa Mr Mendis makai in, a dang expert thum hong pai-in sepdan bawldan ding teng, UNICEF lampan piakding kumpite sik ding le tangpi-te sikding cihbang a them a neng in hong kikup pih hi. Tuate lak ah Kawlgam pan AE Ohn Maung hong kihel hi. Tedim tuinek ding hong huh nuam gam tampi ( Australia, Canada, Netherland ) a om na sung ah, UNICEF te’n hong ngah hi. A cil-in tuizawl hong pia peuhpeuh le u cin apuak, abawl abei khempeuh taangpi in siding hi ong kici phot napi, ei sik zawh ding bang hi deklo ahih man-in RWSD a Director U Ngwe San leh Mechanized Agriculture DG U Hlaing Myint-te kiang ah kineel tawntung in damdam in kumpi huh na’ng ngetna kikhan toto hi.

Party-te lam lahna le Council makaihna tawh, Council EC Pa Zam Cin Thang le Zum Vuandok Pa Tual Khaw Mang te, DG U Hlaing Myint inn ah a hawh nikhat in, tua hun lai asawt nailo a engineering (BE) a zosa Pa Khup Khan Thang zong tonpih a, Tedim tui bawlna ah hong zatsak ding kigen in, nasep hong piaksak pah ahih man-in Pa Khup Khan Thang in foreign expert- te tawh nasep khop theih na’ng hun hoih hong ngah a, a nung ciang in leitung gam tuamtuam ah panmun lianpi a ngah theih na’ng a kipatna suak ahih man-in ei mite hamphatna lianpi khat zong hong suak hi.

Tedim khua, Sialtang tui lak na’ng preliminary survey bawlding in RWSD pan AE U Ohn Maung, Inspector U Hla Thein Oo-te makai-in, Pa Khup Khan Thang BE le GTI zosa Pa Khup Khan Mang (GE) tawm vei a khawl laitak, Pa Laang Khan Thang (tun EPC) le Pa Tual Cin Lian ( tun construction) le Pa Kham Suan Zam te in nak-pi in hong huh uh hi.

Tui tawh kisai huh theih na’ng tuamtuam te van ding in Australian Ambassador pa le a ma nuai a mi 3 zong Tedim khua ah hong pai uh hi.

Tedim tuinek ding Sialtang tui lak na’ng UNICEF te in tuh ngah ahih man-in detail survey bawl ding leh design suai ding in engineer Rick Marinshaw hong pai a, kha nih sung sinsen the in, a lim ding suai hi.

Ateh laitak in Dimlo khua gal tai suang 66 na, ciangka ah lengkhia phei ding in ngim hi. Mawtaw lampi zui-in Dimlo khua khung ah tuizawl pai leh, tui tha asawn zo ding in tuizawl a lianpi kisam ding acih ciang in, tuizawl a lian theithei kideih ahih man-in, Bo Kam Cin Hang le Pa Go Za Kap in alampi haksa, a ken theithei na lak a, amah(Marinshaw) bang Bo Kam Cin Hang in na len man kei leh ken kia ding ahih man-in, mawtaw lam zui-in tui lam hong khaksak hi. Engineer Marinshaw-in sun in vaikuan in, nitak sim in a design ding bawl in tuattuat hi. Koi lai mun ah pressure bangzah om ding cih dong in tuatin, design bawl hi.

A nihveina Council hun hong bei in, a thum veina Council hun hong tung hi. Mechanized Agriculture Department ah zong DG U Hlaing Myint vuanzi suak in U Myint Maung DG hong suak hi. Tua hun ciang dong tuizawl le van kisam dangte RWSD in acil in Monywa ciang tua zawh the Gunkhawm ciang tua pan Kalaymyo hong puaksak ding, tua ban ah abei teng taangpi in si ding, bilatmi(cement) zong, leisek zong sehnel, suangsite taangpi in si ding cih dong a kitun laitak hi. Tua hun laitak Paty-te lam lahna leh Council-te makaihna tawh, DG U Myint Maung le Kawlgam a UNICEF Reginal Representative Mr Buloy-te nupa Tedim ah ki sam in hong pai uh hi. DG U Myint Maung in haksatna teng hong theihpih ahih man-in (a) tuizawl le van khempeuh Tedim tun dong kumpi in si ding, (b) Bilatmi ip tulkhat a khong in hong pia ding (c) UNICEF le Mechanized Agriculture Department kikop in tuizawl phum na’ng lei tawh le tangtha a kisam teng siding ci-in hong khensat hi.

Sialtang tuilak nasep akipat pan in, UNICEF le Pa Khup Khan Thang le nasep a sin a lut thak engineer pawlkhat, kumpi lampan AE U Ohn Maung le U Hla Thein Oo-te in sem uh hi.

Tuizawl pen, HDP pipe vive kizang masa hi. Tuizawl peh teng a kizawh phitphet khit ciang in, tui kikhah leh, tuitha (pressure) thuak zo lo-in kitam pahpah hi. Tua ciang in RWSD ah Director Bohmu Khin Maung, pressure tehna tawh hong kuanto hi. A tuat designer pa’n khial hiam, tuizawl (material) in pressure thuak zolo, hoih zolo hiam cih khensat ding hita hi.

Tuinak pan a kipan, munli ah pressure the a, a the ma-in designer pa R.Marinshaw kiang ah pressure bangzah om ding ci-in dong masa a, tua zah om ding acih zah lianlian, them zong kipelh lo-in a kituah ciang in “ a siam a thei taktak mah hi ciai ( you are a genius)” ci-in nohset hi.

Tuizawl kitam bangcih puah ding cih kikupna a om ciang in Party Okkatha pa Pa Thawng Khan Mang in “sik tuizawl tawh nong laihsak kei ding uhleh pua khiakik zaw un, taangpi taangta-te gim hong pia lel uh the” a cih giap leh sik tuizawl tawh laihding hong khensat hi.

Sialtang tuitawh kisai theihhuai tawm:
1. (a) Tuizawl paipi ( main line) a sauna pi 78,853 (feet) – 15 miles. Tai 15 sau hi.
(b) A ka, a mengsawn, khausung kongzing a tui khensawnna tuizawlte a sauna kigawm pi 76,744-tai 14 le a lang.
(c) Sum beina
(i) UNICEF te’ sik US Dollor 4,98,690.
(ii) Kawlgam kumpi sik Kyats 7,98,990.
(iii) Taangpi tuine-te’ sumtang a bei Kyats 8,13,490.
(iv) Taangpi thatang tawh asep tangthate a man kituat lo,

2. Tuizawl pen, mawtaw lampi zui-in Dimlo khuakhung lam dung ah kha lo-in Dimlo khua gal ciangka, taisung 66 na ah leng khia pheisak leng tu laitak a I ngahzah nih tui ki ngah in tuizawl sia, kitam nawnlo ding ci hi. Mailam ah gam vaihawm thunei-te in ciamteh in bawl huai hi.

3. Tuizawl dung ah a kithuah pressure valve-te, big pressure tank-te, ama design om bang kisusia lo in a hunhun in wash-out pipe-te ah niin kikhah khia zel leh Leilum, Lawibual, Myoma, Sakollam veng le khuakim a om, tuilu(tape stand) a vekpi 200 val-te hun kibang in hon khat in kihong le asang aniam cih om loin, a kibang in tui pai hi. Tun bel big pressure valve tuamtuam te lah concrete box tawh hoihtak a kibawlsa-te kisusia mangin, tuinak lah a hunhun in kipuah lo, main pipe pan in inn tui peuh kipia gawp ahih man-in tui kingah kimlo kici hi. Mailam ah gam vaihawm thuneite’n ngaihsut huai hi.

Kawlgam kumpi in UNICEF tawh kipawlin Tedim khua tuinek ding Sialtang tui hong laksakna tuizawl tawh a sangpan a niam ah tuilakna (Gravity Pipe Water Supply System) nasep lian a masa pen hi a, tua a kipan in Tonzang, Falam, Hakha, Thantalang, Matupi, Mindat khuapite le gamsung khuate le Tedim gamsung ah Thuklai, Laitui, Tuithang, Tungzang, Saizang khuate a kipan mun tuamtuam te ah cidamna tawh kituak tuinek a kicing tak in hong vaihawm sak hi.

Tua hun a tui ngah nang a phukhia, Party-te lam lahna le Council-te makaihna tawh a sem abawlte khempeuh tung ah I lungdam hi.

Tual Khaw Mang @ Mangtal

Tedim BEHS No. 1
Golden Jubilee Magazine