Sialsawm aa ih sawm banghiam – What really is our vision of the big picture?

Sialsawm aa ih sawm banghiam – What really is our vision of the big picture?

Kumthak zandeuhmah ih cihleh, Sialsawmhun hong tungkik zeel ven, mailam aa ding bangsawm pen ka hiam? cih ngaihsutna hong om zeel hi.

Tuhun teh Khuado pen, a minlian ahikei-zong, hong ki-etteh simpianta-in, Sialsawm bel ei aituam phadiak hongsuak lai hi. Tuazong ettehtaak ih hihna tawh kizui-in, hong kiciingleuleu ding a hihi. Hitegel baan-ah kisakpihtaak ding’ ngeina-hoih a dangtampi a neite ih-hi uhhi. Tua mahbang in, Upa-lungsim zong nei-in, angtang kipahkawm leh a kineisak phadiakte kihi lai hi.

Kineihsak-taak mahhi. Banghanghiam? cih leh, ih pulehpate’ nacitak-in ettehtaakte’ ahih-hang’ uh a hihi. Laipai khatzong zanglopi-in, ngeina-zuihna leh kam-thuvaikhakna tawh kitatlo in, a na kizomsuak uhhi. Gengenbek sii-in, ciingtinten-in, na zuiciatciatkei le-uh a maimangthei-thu a hipahzen hi. Singlamteh lampi- Jesu khekhap zuilo-in, Calvary mual nawklo-in, hansung ah kibilh photlo-in, lamdawt tawh a meet na dawklo uh hi.

Citak cihteh hinem-num kheel-thimthumlo leh sepnakhat ah kuhkal cihna a hihi. Hi-zual’zual’lo cihna a hihi. A pau ciatciat leh a hikunkun nuamte ki hi-phadiak hi. Dangnaallo a hih man-in, namdangpau-awkaih zong kingah-hak phadiak tawh kibang hi.

Nidang lai-in pumpi thatang kizang zawdiak in, anzong tampipi mah kine pah hi. Tuadungzui-in ki thahaat pahlel-in zong kithanuamzaw cihpahtheih a hihi. Kawl-khang ah bel, sathau-muinam neukhat kikawkziau aa, thatang seploh-theihtheih ki hanciamta hi. Lutung ah van kipualo-in lusung-khuak tawh naasem-in khutmee dawnbek tawh kikui-kizuut zeuhzeuh bekta hi. Tua dungzui hiam? ciampeello, lungduai-in, a thuakkeeikaai-ding hamsa tawh kibangta-in, smart phone bang-in kizuan’/tuan’ zialzialta hi. Lawphuai hilo hiam?

Koihun-koikhangsung ah omtaleeng, sauvei kimangding-in, a khangtonuam ngiat ih hihnakleh tupna leh ngiimna ki neitek hi. A hizong in, genlehgeel-ciangbek hilo a thulehla gamtatna tawh a nungzuihte’ a hiciangkhat kitung peelmawh hi. Geelbanglian-in a piangkei zong munkhat, (a hoihzaw khat) hong tun veve hi. Geelkhawlhna a nei Pasian umte ih hihman-in, eizong mimal, innkuan, khuasung, gamsung minam aading’, a mun leh tual tawh kizui-in, geelna neikim-in, lungtup sialsawm in, sawm ding a hihi.

Mitampi phattuam-nang’ deihsakna tawh a kibat hang’ saupi (big picture) enlo-mulo in, naupang bang-in, eithu-eidan bek tawh cileeng’ kigeel khial, kisawmkhial thei kha ding hi. Kawlte’n hong deepna tawh kizui in a kampau uh, ‘khoh ya tacha shahya tacha-(ih satna leh i satnop-impact intended and impact felt) a batlohding kidophuai hi. Tua hi aa, geelna kibat nading-in muhna kibatding zong thupi hi. Mangkaang te’n labu kibang pan sakhawmni- sing from the same hym book- a naci uh hi.

En lawngkhat-in ih gingding ih kici aa, tua pen nasepdan in genhileeng quality kicihi. Quality hoih ih deih leh system hoihkhat neihbek hilo, a kawi a maam zuihciatciat ding hi aa, a hoihlo a omleh midang aa laziau lo-in, tua system/manual/procedure laibu teekteekmah leemkik-in, puahphat zeelzeel ding a hi bek hi. Toyota mawtaw a minthanna pen quality procedure hoihhang kicitek hi. Kawlgalkapte zong hizahciang a kipna pen system khat ngattak-in a zuihhang cileeng, kikhiallo ding a hi.

Mihingte’ khantoh-nading, a suahtaak-nading’ ih deihtakpi, ihsawmtakpi leh, mihingte mawhna pan hong tankhia ding-in vantungpan thu piaziauleh a kingah gige, ei mihingte lakmah-ah eibangngiat-in kiniamkhiatna tawh hong suak-in, mulkim huaitak in, singlamteh tung-ah a nuntaakna a piakhia eite Topa Jesu ettehtaak hi.

Gimna a thuak khitciang in, a hongtho kik takpi ih Topa Jesu khuavak mitsuan takpi peuh leeng, geelkkhialhna leh kalsuan khialhna kipaisan zozaw ding’ cih, ih upna ahihi. Tuathu-in, ei Zomi Christian mimal khat ciat manawh ding’ ih tup ih sawmpi a hihnang’ khatlehkhat thupha kipiakciat ding a thupi ahi hi. Nantal’suan (Holy week leh Thawhkik muakna tawh)