ZAM Thupuak :: 19 April 2015

Malaysia UNHCR Representative Richard Towle tawh kimuhna

April 13, 2015 ni zingsang nai 10:30pan 12:30pm UNHCR Conference hall ah Malaysia UNHCR pan alianpenpa Richard Towle, Rachel (RST), Usher (OPI) leh Mohammad (IAD) teng leh kipawlna makaite leh pawlpi makai teng kimuhkhopna kinei thei hi. Hih bang kimuh khopna hong pian theihna dingin ACR, CRC, DAI, FRO leh ZAM panin makai teng kimu khawmin Richard Towle tawh kimuh ding kigen in, pawlpi sia teng zong hong kihel leh hoih dinghi hong cih kik ciangin pawlpi sia teng zong Thupuak ah ki zasak in hong kihel thei pah uh hi. Hih kimuhkhopna sungah atheihhuai thu tampi hong genkhia thei uh hi.

Malaysia UNHCR Representative Richard Towle

Kipawlna pan nasep khiatna te uh thupi sathei mahmah ingh. Tuni a kong thugen dingte pen mipi zaknop dingin cikhum hello in hong gen ding hing. UNHCR nasep gambel galtai mi cimawhte panpihna tawh kisai in Malaysia sangin ahuh huaizaw Syria, Iraq, Afghanistan cihbang gam tampi ah cimawh gambel galtai huhhuaizaw om ahih manin Malaysia ading fund tam kingahzo nawnlo hi.

Hong tungding 2016 ah tukum sangin hamsa zawkan lai ding hi. Malaysia UNHCR ih nasepzia pen siangsak, tawmsak tektek nuamta in tua sungah Chin State pan ateng zong hong kihel ding hi.

Nungdiak in Kawlgam, Chin State ka vazin a mualtung khua hi-in kahto, tuaksuk tam mahmah hi. Hakha khuapi ah ulian pawl khat leh pawlpi sia pawl khat tawh holimna ka neithei hi.

Chin State pen khantohna lamah a zekai hangin amite nuntak khuasak zia ah bangmah luahuaina om nawnlo in gambel, galtai (refugees) dingin ka lamen nawn kei hi. Gam 3 na khat peuhpeuh painop manin Malaysia hong pai vive uh hi.

Gam 3 na tuntheihna ding a la gamten zong athu uh khelta in tu hun ciangin innkuan kigawmkik ding te bek lazaw ta uh hi. Ahonhon in gam 3 na paisak cih omnawnlo hi. Tua ahih manin na mipih te uh Malaysia hong pai nawtloh nading un na gen sawm ciat un.

Mailam ah UN ciaptehna ngah ding hong hamsa mahmah ta ding hi. Bang hang hiam cih leh :
(a) Kawlgam ah na khuasak dan uh pen gambel, galtai (refugees) ding dinmun hi nawnlo hi. Kawlgam pen lauhuai nawnlo hi.
(b) UNHCR in mithak lakna ding fund a kicing in neilo hi.

Malaysia UNHCR adingin tukum 2015 pen ki hotuahna, ki laihna hun hi ding hi. Hih bang ahih hangin UNHCR in bangmah hun nawnlo, panpih nawnlo cihna hipahlo hi. Naupang te sangkahna, cidamna ah kisem toto lai ding hi. Tua hih manin no le no Tune Insurance na lei hamtang ding uh thupi mahmah ding hi.

No adingin a thupi pen in nasep hoih ngah ding leh na hoihtak a nasep theih ding uh hi pen hi. Hih vai tawh kisai in Kumpi te tawh zong kikupna ka nei uh a, UN ciaptehna ngahsa te leh kipawlna card tawite nasep theihna ding ka kikup laitak uh ahih manin bang mah kong genkhia nuam nai kei hi.

Kumpi in nasep theihna ding phalna hongpia in hi leh UNHCR card sangin muanhuai zawtham ding hi. Hi bang a kong gen tak ciangin Chin State pan a hong pai teng hong deidan deuh cihna hilo hi. Hi teng khempeuh pen 17 August 2010 ma a UN ciaptehna ngahsa gam 3 na paiding vai tawh bang mah kisailo hi. Gam 3 na paiding vai pen a beisa mah bangin ki zom toto lai in na ngak uh kul bek hi. Tua bekthamlo in tua khitzawh a ngah te zong pawl khat a mau thu le la zui-in pawl khat ki paisak lai ding lametna om hi. Hih pen hilai Malaysia UNHCR te cih hilo in hongla ding gam thumna cih hizaw hi.

50% bang pen UN panin a kisap ciangin kisam theilo hi. Amau koi ah om cih kitheilo hi. Gam 3 na pai ding a kisam ahi hi. Phone nambat nalaih uh leh UN zumah na phone nambat thak hong piakik hamtang un. Banghang hiam cih leh UN pan a kisam theilo teng kipawlna te tungah kipia theilo hi. Tuni ciangciang UNHCR in khangham/kumtam te, damlo te, naupang kumcing nailo te leh mi banglo te ki panpih lai hi. Mailam ah tua teng zong amau thu le la zui bek in ki panpih zo ding hi.

2013 a UN ciaptehna ngah ding a kisamsa, a ki cancel te leh adangte adingin mailam ah ahonhon a UN minsanna om ding hamsa mahmah ta ding hi. UN card mangsak te pen angeina mah bangin na card uh nalaih uh teh Card ngahkik pan ding hi.

Usher (OPI)

Thongkia te sung panin kua teng UNCHR in honkhia thei ding? UNHCR ciaptehna ngahsa mite bek honkhia thei ding hi. Tua khit ciangin innkuan lutpih ding angak lai amin uh UN ah om khinsa te bek in ngah theih ding hi. Tua ahih manin innkuan laibawl hamtang ding thupi hi. Ahi zongin UN card ngahnopman, gam 3 na painop manin zi le pasal neite ki ngahlo ding hi.

Nung diak a thong pan hong suakta UN mi hilo ahih manin bangmah kihuh theilo hi.

UNHCR hotline pen mitampi zat ahih mah bangin kingah pakpaklo mah ding hi, adang behlap ding zong hithei tuanlo hi. Gentehna in alen ni ding kithei khinsa kiman bang omin, a kimatna hangpen ama gamtat hoihlohna tawh kiman ahih kei nak a leh ahun lapin hong ki panpih ding hi.

Rachel (RST)

August 17, 2010 khit zawh a UN ciaptehna ngah te ahonhon in gam 3 na pai cih om nawnlo hi. Malaysia ah UNHCR in Chin State pan 2006 a kipan USA lengthei ding February khabei 2015 ciangciang tul 56 val pha hi.

Innkuan lutpih vaitawh ki sai-in kisem toto a, deihloh penin innkuan lutpih te a kimat a leh UN ciaptehna kipia hi. Naungek suaktung te a Pa/Nu in UN aneih leh nau hong ap ciangin angah nailo pen tawh UN kipia khawm pah hi.

CDU makaihna tawh SGBV thusinna

14 April ni zingsang nai 10am-12:30pm ciang CDU makaihna tawh International Catholic Migration Commission (ICMC) Sexual and Gender Based Violence (SGBV) thu sinna kinei hi.

ICMC te nasep bulpi pen ahih leh gam 3 na tung ding gambel mite gam 3 na ngeina le dan tawh kituak in numei le pasal deidan neilo a khuasak nuntak theihna ding hilhkholna ahi hi. Innkuan sung buaina tuamtuam neite huh/panpih in, mimal kikep zia ding hilhcianna leh counseling te nei uh hi.

ICMC pen UNHCR tawh sem khawm hi-in buaina tuamtuam neite adingin tawmvei om theih pakna ding inn piakna leh UNHCR ah avai te puaksakna nei uhhi.

1. Innkuan sung buaina tuamtuam tawh kipelh theihna ding genkhiatna leh
2. Buaina tuamtuam neite bangci huh ding cih hipi pen hi.
3.
Innkuan sung buaina tuamtuam hangin ICMC huhna kisam te’n anuai te tawh kizopna kibawl thei hi.
ICMC Hotline : 010 421 1274 (9am-9pm kikal)
ICMC Email : <[email protected]>

Malaysia kumpi in Refugee te tate kumpi sangah kahsaklo ding

Dewan Negara ahi kumpi uliante thukikupna thugenna ah “Malaysia kumpi in gamsunga om Refugee naupangte Kumpi sangpi ah kahsaklo ding hi” ci hi.Seri Shahidan Kassim in a genna ah zong Refugee te tate pen kumpi sangpite ah sang kah theilo ding uh a, ahi zongin kumpi tawh a kizomlo sangte ah bel kikahsak ding hi” ci hi. Kumpi tawh akizomlo ih cih ciangin mimal leh kipawlna in deihsakna tawh a phuat sangte cihna hi. “Tulehtu in Malaysia kumpi pen hih thu tawh khauh takin gamtaang ding hi. Banghang hiam cihleh hih naupangte pen UNHCR Card tawite hi uh a, Malaysia kumpi pen UN sungah member hilo hi. Tua ahih manin UN Card tawi naupangte pen kumpi tawh a kizomlo mimal leh kipawlna in a phuat sangte bek ah kah thei ding uh hi” cih thuDr. Asyraf Wajdi Dusuki in Dewan Negara thu kikupna munpi ah pulaak khia hi. Source : www. bernama.com

Malaysia kumpi in UNHCR ah Refugee te vai nawh hen ci leuleu

Malaysia kumpi in UNHCR zumpi ah Refugee vai nawh mengmeng dingin kun leuleu uh a, adiakin Kawlgam Refugee te vai nawhpha deuh dingin ngetna bawl kik hi. Datuk Seri Shahidan Kassimin a genna ah “Hih Kawlgam Refugee te hangin gambup ah tualsung vai hita leh sumbawlna daihna om nawnlo in buaina leh haksatna bek hizaw ta hi. Tua banah, UNHCR tawite zong UNHCR in hoih takin sit phakik hi leh Refugee taktak tam nawnlo ding hi. Tampi tak pen gamsung nuntaak hamsat manbek a hongpai hi uh hi” ci hi. Roslin in Malaysia gam sungah Refugee lian bangzah pha a, amaute in bang hamphatna teng ngah uh hiam cih a dotna pen Shahidan in hi bangin dawng hi. “Malasyia gambup ah Refugee leh Asylum Seekers kigawm 151,770 phata hi. Tua lakah Kawlgam mi bekbek pen 140,652 pha uh hi. Hi te pen Malaysia kumpi in UN member ahih lohna uh hangin Refugge ahihna uh theihpihlo hi. Mihing hihna tawh Kumpi in amau tungah itna lak khia veve a, gamsung thukhun a palsat kei naak uh leh mat leh hen tuaksaklo banah cina lunate zong zato leh sikhante ah limtakin a khoi banah sang zong kahsak uh hi” ci hi. Source : www.nst.com.my

RSC te ZAM zumpi ah hawhna

Geelnasa om mah bangin 17 April 2015 nai 9:30-12:30 ciang RSC zumpi panin ulian te 4 hong paithei uh hi. Thu dong mimal 80 val uh a RSC in nasep zia teng hong gen khit ciangin mimal in thudotna kipan to pah hi.

RSC te sep le bawl bulpi pen ahih leh gambel te USA ah manngetloh a puak ahi hi. Adang gamte tawh kisailo hi.

RSC thudotna aDHS thudotna
IOM pan sisitna aCO pan thusinna
IOM pan vanleng ticket cih bangin a dawldawl in USA tun theihna na kisem to khawm ahi hi.

Kha khat in mi 1200-1500 RSC thudotna ki neiden hi. RSC pan hong kisap ciangin na phone tawh hong kisam ahih mah bangin na phone na laih leh RSC leh UN ah hong zasak pah un. Akawmkal ah zi/pasal/ta nei, zato lum cih bang thu tuamtuam a om leh hong zasak hamtang un.

Min kitaih na hang a UN tungsuk kikte pen UN panin na daan uh a bei khit ciangin RSC hong puakto kik ding a tua panin USA ten khat vei hong sitpha kikin aman siang ciangin hong kisam kik thei pan ding hi. Hong kisap pak kei leh lung himawh kei un thuhoih hizaw hi.

RSC na phi ciangin https://casi.rescue.org tung-tawnin na dinmun ettheihna ding password hong kipia ding a tua pan ki en thei den hi.

USA a na sanggam, tanau leh lawmte omna kipia thei a lenna ding thusinna hong kisap mateng kipia thei hi. Ahoih pen ah bel RSC na phi ni piapah le teh hoih pen hi. USA a om na meltheih te’n sum le pai bangmah piak kullo hi.

Email or lai nong khak uh ciangin na Min, na Card No. leh na Phone No. hong kitel sak mahmah un. Na khak zawh kal 3 sungin thu hong ki zasak kik ding hi.

Laikhakna ding Email : <[email protected]>
Phone hona ding : 03 2141 5846
Zuau gente ki pulakna : [email protected]

Tukal ZAM Palaai te buaipih diak teng

⦁ Pa Thang Lam Sum leh Nu Niang Lam Nem (Lailui) te tapa, Tg. Cin Suan Mung adingin JPN kumpi zum panin certificate kilak sak thei.
⦁ Pa Lam Khan Tuang leh Nu Cing Theih Ciang (Thalmual) te tapa adingin JPN kumpi zum panin certificate kilak sak thei.
⦁ Pa Mung (Vangteh) Siama Amny te nauno adingin birth certificate kilak sak thei.
⦁ Man Suan Nuam (Cikha) HKL leh HEI ah 6 April ni-in ki buaipih.
⦁ Ciin Suan Cing (Phaiza) Ampang zato ah 8 April ni-in ki buaipih.
⦁ Cing Za Huai (Mualpi) Sungai Buloh zato ah 9 April ni-in ki buaipih.
⦁ Zam Za Sing (Laaitui) Langkap Camp a om a vai ding April 10 ni-in Embassy ah ki buaipih.
⦁ Pakok Senas thong a om Thang Taa (Kawlpi), Ao Thawn Pau (Kawlpi), Thang Kim leh Cin Suan Pau te April 10 ni-in UN ah ki report sak.
⦁ Dim Suan Pau (Laaitui) Bukit Jalil Camp a om a vai ding April 10 ni-in Embassy ah ki buaipih.
⦁ Cing Sian Nuam (Mualnuam) ZRC card tawi palik te’n manin palaai te pahpihna tawh suakta kik.
⦁ Bukit Jalil Camp a om Langh Sawm Dal (Lailo) leh Thang Cin Khai (Lailo) te April 10 ni-in UN ah ki report sak.
⦁ Sing Pau (Singunau), Mung Lian Kap (Pyidawtha), Suan Khua Mang leh Zam Khua Tuang (Teeklui) te a omna uh a kikansan laitak.
⦁ Nang Kap Sing (Anlangh) leh Suan Kam Lian 13 April ni-in Setapak pan CID te mat Pudu ah puakin palaaite buaipihna tawh suakta kik thei.
⦁ Thang Sawm Piang (Vangva) 13 April ni-in SetapCID te mat palaaite buaipihna tawh suakta kik thei.
⦁ Khen Mung (Anlun), Pau Muan Lian (Anlun) leh Kam Suan Mung (Anlun) te kimatna pan 14 April ni-in palaaite buaipihna tawh suakta kik thei.
⦁ Lang Khan Suan, Kam Khan Lal leh Bawi Thang (Vanglai) te kimatna pan 14 April ni-in palaaite buaipihna tawh suakta kik thei.

UNHCR-EDU pan OpenEMIS sinna

16 April 2015 ni sun nai 1-5pm ciang Methodist College KL ah gambel sangnaupang te data ciaptehna OpenEMIS sinna kinei thei hi.

Mun tuamtuam, Gam tuamtuam a om Zomi te tungah Tangkona

Atung athu tawh ki zui-in Kap Za Dongh (Kum 26) ii luanghawm kivuina thu leh man (photo) Facebook panin kimu khia hi. Thu piang aki theih ciangin ZAM panin a thu ala kikan pah aa, tuni ciang dong kua tapa, kua khua, koi kipawlna ah lut cih kimu khiazo nailo in ameltheih, khuapih tuipih te zong kua mahin ZAM zumah huhna ngetna omlo hi.

Kap Za Dongh (Kum 26) pen 26/12/2013 ni-in Lenggeng camp lutni ci in palik ten ciamteh hi. Thong sung pan si hi cih kigen aa asihni kigen lo hi. Siluang pen Selemban zatopi ah puakin, Kawl te Tuibuah pawi sung thupha dawhna in Kepong a phualsat Kawlte Genvai kipawlna te makai in 16/4/2015ni in Cheras hanmual ah mei tawh halna nei ci uhhi.

Tua ahih manin Kap Za Dongh (Kum 26) pen Lenggeng Camp ciaptehna ah Card (Document) neilo ci in ki ciamteh ahih manin Zomi takpi maw/hilo cih a thei omlo ahih manin koi mun, koi gam a om Zomi te in hi thu ki zasak sawnin ih kan khawm ciat nangin zumpi panin kong zasak uhhi. Zomi hi cih telna omlian lo ahih manin social media tuamtuam pan zakna a nei ih om leh nong zaksak nangun zahtakna lianpi tawh kong tangko uhhi. Zomi te luanghawm meitawh kihal te hilo hi hang.

Zosuan Tuailai Khawmpi (ZTK) ading mapankhopna apiasa teng

⦁ Pa Cin Suan Lian te innkuan RM150
⦁ Ever Smile Ministry RM 50
⦁ Rawang Zomi Innkuan RM200
⦁ Anlangh khua kipawlna RM200
⦁ Zomi Christian Assembly RM300
⦁ Evangelical Baptist Church (KL) RM200
⦁ Manaa Zomi Christian Church RM200
⦁ Khup Lian Pau (Tahan) RM 50
⦁ Myanmar Believers Fellowship RM200
⦁ Suanghoih khua kipawlna RM100
⦁ Vangteh khua kipawlna RM150
⦁ Cikha khua kipawlna RM100

Mapankhopna sumngah khempeuh kikhak nuam ahih manin Pawlpi, khua kipawlna leh mimal mapankhopna kihelzo lai ding peuhmah in ZAM ah 21 April ni ciang kipia thei lai hi.

ZAM pan dahpihna

Pyidawtha a teng, Pa Pau Pak Sing (Lamzang) leh Nu Lian Sian Nuam/Bawboih(Tungzang) te tanuLia Vung Sian Hoih2/4/2015 ni in Ampang zatopi panin suakkhin phetin hong nusia kikpah ahih manin amau nupa tawh kibangin Zomi te zumpi panin kidah pih hi. Nauno ii luanghawm ahih leh ZSM makaihna tawh ani mahin vaiteng kizo thei pah hi.

Tuitum khua,Rev. Tual Khan Pau leh sianu Niang Khan Vung te tapa Upen Pa David Vungh Lian Mung, Samte beh (Kum 42)sunglam damlohna hangin 10.4.2015, 11:30PM hun in Ampang zatopi pan hong nusiat na hangin ih dah mahmah hi. Pa David Mungseen khakna hun 14/4/2015 ni-in ZAM Hall ah, ZCF Canaan makaihna tawh hunbawlna kinei a, ZSM makaihna tawh SungaiBuloh hanmual ah lungkim huai takin ki kha thei hi. Topa hehnepna athakin hong tungta hen.

ZYA Magazine kingahta

ZYA kawlpi Tin Jubilee Magazine kingahta ahih manin a lei nuam peuhin ZAM zumah kingah hi. Bu 15 bek om hi. Laimai 232, bu khat teh RM50 bek hi.

Theihsakna

ZAM Thupuak ala pawlpi peuhmah in hong kikoihsakna mun ansai te panin na la hamtang un. Sum tampi bei a ki print ahih manin nihvei kizom a lalo te hong ki print sakzo nawnlo ding hi. Zomi Daily pan na et uh hong kul maita ding hi.

Kidawm in pilvaang ciat ni!

Tusung teng Malaysia gam mun khempeuh phialah lamkhak (roadblock) leh operasi omden pian ahih manin vaksuk, vaktoh na ah kidawm in pilvaang ni.

Limkokwing University ah sangkah nuamte ading

Gambel khangno te adingin UNHCR vaihawm sakna tawh Limkokwing University ah sangkah nuamte adingin Diploma Certificate anuai ateng kisin thei hi.

Hair Design aIT
Event Management aHospitality and Tourism.
Course khat le khat a sinhun zah kibanglo in kha 6 pan kum 2 ciang sawt thei hi.

⦁ Kum 17-24 kikal hi ding.
⦁ UNHCR Card nei ding.
⦁ Mangpau hoihtak pauthei ding.
⦁ Khakhat sung inn leh University omna Cyberjaya kikal lamsap, an man ding leh course sinna RM800 kim bei ding.

Alunglut khempeuh in ZAM zumpi panin ki siauhpih thei hi.

Hehpihna tawh hongkan pih un

1. Tg. Khup Sian Khai UNHCR No. 791-10C00668 (Tungzang) pen, 1 March 2015 ni a nasem pai contact kingah nawnlo ahih manin amu na om uh leh ZAM zumpi or 010 256 5664 ah hong zasak un.
2. Lamzang khua, Pa Kham Khan Mung leh Nu Cing Za Hau te’ tapa Tg. Zam Sian Tul Uk (ZAM-28999) a omna kitheilo ahih manin amukha, atheikha na om uh leh ZAM or 018 297 3371 tawh hong zasak un.

Palikte mat na hizaw

Nungkal mimang sazian sung a hong suak Sian Tawng (Suangzang khua) pen a mang hilo in Palik te mat na hizaw a tun Dangwangi Lockup ah om hi.

Zomi Card tawite ading nasep

⦁ Veng tuamtuam a om KK vanzuakna sai te a sem ding Zomi citak pasal/numei honkhat kideih hi. Nasep hun 8am-8pm. Sun nai 2 sung khawl. OT nai khat te RM6.50. Kha khat RM1237.50 ngah thei ding. Na omna veng tawh kinai penpen ah septheih nading hong ki vaihawmpih ding.
Alunglut te adingin Monday & Wednesday ni sun nai 2pm simin interview na om ding hi.
⦁ Cheras Yulit ah zingsang lam tuibawl ding pasal 1 leh nitak lam kuangsawp ding pasal 1 ki deih.
Alunglutte kizopna ding ‘ 012 367 4665

Lungdamkohna

⦁ Tg. Dal Suan Piang (Anlangh) in tukal Thupuak a ding RM50 hong piakhia ahih manin lungdam mahmah hi.

Address:

155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email:  [email protected]

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna pdficonBiakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website tungpan kongsuaksak zelzel uhhi.

Note :: PDF tawh na simnop leh

Anuai a PDF lim tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.

Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…