Sengam ah atuh akibawltawm Cosmetic Brand minthang $171 million manneiding kiman

Sengam ah atuh akibawltawm Cosmetic Brand minthang $171 million manneiding kiman

Sengam pen ih theihsa mahbangin vanminthang, Brand minthang khat omleh atuh “Fake” bawltawm asiam mahmah gamkhat ahihi. Tulaitak tuabangin atuh aki bawltawmte Chinese Police te’n azonsan, asiansuahsan laitak uh ahihi.

Adiakdiak in numei te kipuahna, kizepna “Branded Cosmetics” tuamtuam atuh akibawlte azonkhiat uhleh atuh akibawltawm bekbek $171 Million manneiding mukhia uh a, manpah phangphang uh cih Reuters pan kiza hi. Tua amatkhiat Cosmetics minthang Brand te lakah Chanel, Christian Dior, L’Oreal SA’s Lancome, Estée Lauder cihte kitamhel phadiak hi.

China gamsung Taizhou City aom leisung nasepna mun 7 te ah tukha kipatlam akipan Chinese Police te’n abetkhiat uh hi a, amatkhiat bekbek uh Cartoon Box 1200 bang phakhin hi ci’n Sina Weibo Microblog ahzong ki suakkhiasak hi.

Nungkum sungin Amway Products pawlkhat Online ah kizuaksak akimuh ciangin Police Report kibawl a, tuakhitzawh Chinese Police te’n Cosmetic Products atuh akibawltawm te akankan uh ahihi.

Sengam ah vankibawltawm atuh tammahmah a, nektheih taaktheih akipan, zatui tuamtuam, Electronic van tuamtuam leh mawtaw dongin Fake akibawltawm tammahmah hi.

Sen kumpi inzong tuabangin van atuh akibawl ziauziaupen diksa hetlosam uh ahih manin, nungkumsung bekbek inzong tuabangin agamta mi 20,000 val mankhia uh cih kiza hi.

Zomi nungak te’n kizep kipuah nading nalei uh ciangin adiakdiak in hih Chanel, Christian Dior, L’Oreal SA’s Lancome, Estée Lauder Brand te nalei uhciang nakidawm un. Amantaktak zahding sangin akimatluat lawmlawmleh atuh hikhathei hi. Vanminthang, Brand minthang te leiding ciangin amau ii Official Branch Store, Outlet cihte ah leipen khialh omlozaw khading hi.

Sum ngahnading ahih nakleh bawlngamloh, sepngamloh anei mi pawlkhat ommawk ahih manin, lauhuai mahmah hi. Zomi sungahbel tuadan omkei mate? ZD Sawltak #zomidaily