Satan in ahah zawhloh Zeisu ~ Pau Do Lian

Satan in ahah zawhloh Zeisu ~ Pau Do Lian

Zeisu thatdingin akileh hekhun in amah kum 33 phata hi. Tua hunlai in Singlamteh pen migilo (crime) te kithahna hi a, tuatelakpan inzong ahuaisia deuhte kithahna mun ahihi. Tua migilo (crime) tesangin Zeisu kithahna amulkim huaizawkna te ih endinga, tua in nang lehkei hong itna hi’ ci in phawk kawm ni.

1. Sikkilh: Sikkilh letma 6pan 8 asau khutme ciabang aliantawh kikilh hi.

2. Sikkilh tawh akikhetna munpen limsungah akhutkuaksung in kisuai mahleh ataktak in akhutbuh (wrist) ah akikilh ahihi. Tua khutbuh (khutbom) pen thagui khempeuh kizopna hi-a, apumpi khempeuh a om thazuitawh kizom hi.

3. Tuathagui pipen aliangko (shoulder) tawh direct in kizom ahihman in akhutbom sikkilh letmat 8tawh akikilh ciangin aliangkozong atangzo nawnlo dinga deihna ahihi. Tua aliangko sukha leh ahusan nazong hamsa ding a thala in kitom/saan theilo dinghi. Tua ahihman in anungzang (backbone) bekzangin huihdiik theilai bek dinghi.

4. Akhe tegel kithuapin kikilhcip hi. Akhetegel kithuapin kilhcip uh ahihman in atha saanthei lo in thala theilo ding a, apumpi dangte panpih in kitomthei nawnlo ding ngimna ahihi.

5. Sisan bei. Mihing khatin (Zeisu zong mihing mah ahih man in) sisan 3.5 litter nei hi ci hi. Akhut, akhe leh alutung pan in siluang ziahziah a, 39 vei sikhiam tawh akiphan khauteep tawh Rom galkap te in sat uh ahih manin sisan omkhempeuh luangkhia khin ta hi.

6. Apang’ zong teipi liante tawh kidawt ahihman in aluangding sisan omnawn lo a, tui hongluang tazen hi.

7. Amelsia khin. Alutung ah liing lukhu kikhusak in liingte in aluzangpan in sun ahihman in sisan amai tangah taaksuk a, 39 vei khauteep tawh kisat in kilometer 2 agamla napan aki khai nang agik mahmah Singlam tehpua in tawllua a, amelsia cip ta hi. Akisatna pan asate anengneng inleng khia ahih manin amel kitelnawnlo hi.

Thuhilhkik na 25:3 “Sat sawmli kipia thei ding a, ahih hangin tua val hilo ding hi. Tua hi kei leh, hih sangin a tamvei zaw mi khat in sat lai leh note’ muhna-ah na sanggampa uh a kineubawl suak ding hi.” Zeisu 39 vei akisat pen Jews mite’ thukham azui uh hi a, Paul in Corinth nihna 11:24 ah 40 sangin1 atawm zaw satna kathuak hi naci hi. Isaiah 53:5 akisat na hangin keimawh na kimai sak hi. Satan in that zolo in a nithum ni in hankhuk pan Zeisu thokik hi. Pau D.Lian